ايماقتار • 16 قازان، 2021

تالاس اۋدانىندا جومارت جاندار اۋىلدى كوركەيتۋدە

205 رەت كورسەتىلدى

قازاق حالقىندا قولدا بارىن وزگەمەن ءبولىسۋ، كومەك قولىن سوزۋ، جومارتتىق تانىتۋ يگى قاسيەت بولىپ سانالادى. عاسىرلار بويى قازاق دالاسىندا جالعاسىپ كەلە جاتقان وسىناۋ ءداستۇردىڭ جەلىسى ۇزىلمەي، بۇگىنگى كۇنگە جەتىپ وتىر.

جامبىل وبلىسىنىڭ اكىمى بەردىبەك ساپارباەۆتىڭ باستاماسىمەن قولعا الىنعان «جومارت تۇلەك» جوباسى دا بۇگىندە ءوز جەمىسىن بەرۋدە. اۋليەاتا وڭىرىنەن شىققان بەلگىلى ازاماتتار دا قازىرگى كەزدە اۋىلدىڭ گۇلدەنۋىنە، دامۋىنا وزدەرىنىڭ ۇلەسىن قوسىپ كەلەدى.

تالاس اۋدانى، تۇرىمقۇل ەلدىمەكەنىنىڭ ازاماتتارى ۇيىمداسىپ، ەلگە، جەرگە دەگەن پەرزەنتتىك قۇرمەتىن ىستەرىمەن كورسەتتى. تۋعان جەرگە تۋ تىگۋدى ماقسات ەتكەن تۇلەكتەر ءوز قاراجاتتارىنا اۋىلدان ۇلى وتان سوعىسىنىڭ ارداگەرلەرىنە ارناپ «ماڭگىلىك الاۋ» ەسكەرتكىشى، بالالار ويىن الاڭى، «ويىق بابا» مەشىتى جانە سۋبۇرقاق سياقتى بىرنەشە نىسان سالىپ، ەل يگىلىگىنە بەردى. بۇل رەتتە اۋىلدان وسىنداي نىسانداردىڭ سالىنعانىنا جەرگىلىكتى تۇرعىندار دا ريزاشىلىقتارىن بىلدىرۋدە. ال، اۋىلدان شىققان اتىمتاي جومارت ازاماتتار بۇل جۇمىسىن ەل تاۋەلسىزدىگىنىڭ 30 جىلدىعىنا ارناپ وتىر.

ج

اتالعان شاراعا اقمولا وبلىستىق سوتىنىڭ توراعاسى دوسجان ءامىروۆ، قازاقستان مۇسىلماندارى ءدىني باسقارماسىنىڭ جامبىل وبلىسى بويىنشا وكىلى بەيبىت مىرزاگەلديەۆ، تالاس اۋداندىق ارداگەرلەر كەڭەسىنىڭ توراعاسى جۇمابەك اسەموۆ، اۋىل قارياسى ءازىمباي بايتەنوۆ جينالعان كوپشىلىككە تىلەكتەستىك ءبىلدىرىپ، وسىناۋ يگى ءىستىڭ اۋىلدا اتقارىلۋى ورىندى ەكەنىن جەتكىزدى. ال، تالاس اۋدانىنىڭ اكىمى قاناتبەك مادىبەك اۋىلدىڭ دامۋىنا ۇلەس قوسقان ازاماتتاردى جامبىل وبلىسى اكىمىنىڭ جانە تالاس اۋدانى اكىمىنىڭ قۇرمەت گراموتاسى مەن العىس حاتىن تابىس ەتتى. سونىمەن قاتار، كاسىپكەر ماقۇلبەك مىرزاقۇلوۆ «شىڭعىسحان» شارۋا قوجالىعىنىڭ اتىنان جاڭا مەشىتتىڭ جۇمىسىنا اتسالىسقان ازاماتتارعا سىي-سياپات جاساپ، قۇرمەت كورسەتتى. اۋىلدىقتاردىڭ ۇيىمشىلدىعىنىڭ ناتيجەسىندە «ويىق بابا» مەشىتى ءبىر جارىم جىلعا جۋىق ۋاقىتتىڭ ىشىندە تولىعىمەن اياقتالدى. جالپى قۇنى 80 ميلليون تەڭگەگە سالىنعان مەشىتكە قارجىلاي دەمەۋشىلىك تانىتقان دا ماقۇلبەك مىرزاقۇلوۆ ەكەنىن ايتا كەتكەن ءجون. جيىندا جيەمبەت بەگادىلوۆ اۋىلدىق ىنىلەرىنىڭ اتىنان ماقۇلبەك مىرزاقۇلوۆقا ات مىنگىزىپ، شاپان جاپتى.

بۇدان كەيىن جينالعان كوپشىلىك «ماڭگىلىك الاۋ» ەسكەرتكىشىنىڭ، بالالار ويىن الاڭىنىڭ، «ويىق بابا» مەشىتىنىڭ جانە سۋبۇرقاقتىڭ اشىلۋ ءساتىن تاماشالادى.

اۋىلدان شىققان سوعىس ارداگەرلەرىنىڭ ەسىمدەرى جازىلعان «ماڭگىلىك الاۋ» ەسكەرتكىشىن «ارالبەك» شارۋا قوجالىعىنىڭ توراعاسى ەرلان ارالبەكوۆ ءوز قاراجاتى ەسەبىنەن سالىپ بەرىپ وتىر. نىساننىڭ قۇرىلىسىنا 5،5 ميلليون تەڭگە جۇمسالعان. ال، «نۇرتاس» شارۋا قوجالىعىنىڭ توراعاسى نۇرداۋلەت سارسەن 3،5 ميلليون تەڭگەگە بالالار ويىن الاڭىن سالسا، «باستاۋباي» شارۋا قوجالىعىنىڭ توراعاسى عالىم باستاۋباەۆ سۋبۇرقاقتىڭ قۇرىلىسىنا ءوز ەسەبىنەن 2،5 ميلليون تەڭگە ءبولىپ، ەل يگىلىگىنە بەردى. تۋعان جەرگە دەگەن پەرزەنتتىك پارىزىن سوزبەن عانا ەمەس، ىسپەن دە دالەلدەپ جۇرگەن ازاماتتار اۋىلدى كوركەيتۋ شارالارى مۇنىمەن شەكتەلمەيتىنىن، الداعى ۋاقىتتا دا جالعاسىن تاباتىنىن ايتىپ وتىر. ەندى تۇرلىباي اۋىلىنان اۋىل جاستارى ءۇشىن سپورت الاڭى مەن قىستىق سپورت زالى سالىناتىن بولادى. سالتاناتتى جيىننان سوڭ كوپشىلىك كوركەمونەرپازداردىڭ ۇيىمداستىرۋىمەن كونتسەرتتىك باعدارلامانى تاماشالادى.

ا

شارا سوڭى الامان بايگە، تاي بايگە سياقتى ۇلتتىق ويىندارعا ۇلاستى. بايگەدەن وزا شاۋىپ كەلگەن جۇيرىكتەرگە ۇيىمداستىرۋشىلار تاراپىنان قارجىلاي سىيلىقتار مەن ارنايى جۇلدەلەر تابىستالدى.

 

سوڭعى جاڭالىقتار

ۇقساس جاڭالىقتار