ەلوردا • 15 قازان، 2021

حالىق ساناعى: ەلوردادا ۇيلەردى جاپپاي ارالاۋ ءجۇرىپ جاتىر

79 رەت كورسەتىلدى

نۇر-سۇلتاندا 1 قازاننان باستاپ ۇلتتىق حالىق ساناعى اياسىندا ينتەرۆيۋەرلەردىڭ ۇيلەردى جاپپاي ارالاۋى باستالدى، دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.

بۇل ەلىمىز تاۋەلسىزدىك العان ساتتەن بەرى ءوتىپ جاتقان ءۇشىنشى حالىق ساناعى. بيىل العاش رەت تسيفرلىق تەحنولوگيالار قولدانىلۋدا. 

جاپپاي ارالاۋ وسى جىلدىڭ 30 قازانىنا دەيىن جالعاسادى. ينتەرۆيۋەرلەر بەلگىلەنگەن مەرزىمدە ساناقتان وتپەگەن تۇرعىنداردى ونلاين رەجيمدە قايتا جازاتىن بولادى. وسى ءىس-شاراعا 1،5 مىڭعا جۋىق ينتەرۆيۋەر-ەسەپتەۋىش تارتىلدى. ولار ۇيلەردى ساعات 9-دان 21:00-گە دەيىن ارالايدى.  

ءداستۇرلى جاپپاي ءۇي-ءۇيدى ارالاۋ كەزەڭىندە بۇرىن ونلاين-ساناقتان وتكەن رەسپوندەنتتەر ەكىنشى رەت قايتا جازىلمايدى. ولار ينتەرۆيۋەرگە ساناق وتكەندىگى تۋرالى بۇرىن الىنعان SMS-حابارلامانى نەمەسە ەلەكتروندىق حابارلامانى كورسەتۋى ءتيىس. 

ساناق كەزىندە دەرەكتەردى جيناۋ ءۇشىن سايكەستەندىرۋ اقپاراتى رەتىندە سۇراۋ سالىنعان ادامنىڭ جسن پايدالانىلادى. بۇل دەرەكتەردىڭ قايتالانۋىنا جول بەرمەيدى. سوندىقتان ونلاين رەجيمدە ساناقتان وتپەگەن رەسپوندەنتتەر ينتەرۆيۋەرلەرگە وزدەرىنىڭ جسن، سونداي-اق بىرگە تۇراتىن ادامداردىڭ جسن ۇسىنۋى جانە ساناق پاراقتارىنىڭ سۇراقتارىنا جاۋاپ بەرۋى قاجەت. 

ءۇي-ءۇيدى ارالاۋ كەزىندە بارلىق قايتا جازىلعان رەسپوندەنتتەرگە ينتەرۆيۋەرلەر ساناقتان وتكەنى تۋرالى انىقتامالار بەرەدى، ولاردى وسى ءىس-شارا اياقتالعانعا دەيىن ساقتاۋ قاجەت. بۇدان باسقا، حالىقتىڭ قامتىلۋىن جانە دەرەكتەردىڭ دۇرىستىعىن تەكسەرۋ ماقساتىندا 2021 جىلعى 1-7 قاراشا ارالىعىندا رەسپوندەنتتەردىڭ 10%-نا قورىتىندى تەكسەرىس جۇرگىزىلەدى. 

حالىق ساناعىنىڭ نەگىزگى كەزەڭىندەگى ينتەرۆيۋەردىڭ سىرتقى كەلبەتى: 

- فوتوسۋرەتى بار بەيدج، وندا ونىڭ تەگى، اتى، اكەسىنىڭ اتى، بەرىلگەن كۇنى جانە قولدانىلۋ مەرزىمى، اۋماقتىق ستاتيستيكا بولىمشەسى باسشىسىنىڭ ءمورى مەن قولى كورسەتىلەدى;

- لوگوتيپى بار كوك شارف;

- لوگوتيپى بار كوك ءتۇستى پورتفەل;

- ەلەكتروندىق ساناق پاراقتارى بار پلانشەت بولادى. 

سانيتارلىق-ەپيدەميولوگيالىق تالاپتاردى ساقتاۋ ماقساتىندا ينتەرۆيۋەرلەر بارلىق قاجەتتى جەكە قورعانۋ قۇرالدارىمەن (ماسكالار، انتيسەپتيكتەرى بار سانيتايزەرلەر) قامتاماسىز ەتىلگەن. 

ءوزىنىڭ ەسەپتىك ۋچاسكەسىن جاپپاي ارالاۋ بارىسىندا ينتەرۆيۋەرلەر ساناق پاراقتارىن بەلگىلى ءتورت نىسان بويىنشا تولتىرادى. ساناق پاراقتارىندا ادامنىڭ جەكە اقپاراتى جانە ونىڭ تۇرعىن ءۇي جاعدايلارى تۋرالى سۇراقتار بار. ونىڭ ىشىندە - جالپى سيپاتتامالارى، ەتنومادەني سيپاتتامالارى، ءبىلىمى مەن ساۋاتتىلىعى، كوشى-قون، نەكە جاعدايى، تۋعان كۇنى، جۇمىسپەن قامتىلۋى، ءومىر ءسۇرۋ كوزدەرى، تىرشىلىك ارەكەتىنىڭ شەكتەلۋى. 

رەسپوندەنتتەرگە بارلىعى 91 سۇراق قويىلادى. ساناق پاراقتارىنا ەنگىزىلگەن ماسەلەلەر تىزبەسى ايتارلىقتاي كەڭەيتىلدى. ساناق كەزىندە جينالعان بارلىق اقپارات قۇپيا بولىپ تابىلادى جانە تەك جالپىلانعان تۇردە قولدانىلادى. 

ۇلتتىق حالىق ساناعىن وتكىزۋ كەزەڭىندە 1446 بىرىڭعاي call-ورتالىعى جۇمىس ىستەيدى، قوڭىراۋلار تەگىن. 

ساناققا قاتىسۋ - بۇل ادامنىڭ اقپاراتتى قاجەت ەتەتىن قوعامنىڭ ءبىر بولىگى ەكەنىن ءتۇسىنۋى. قازىرگى قوعام الەۋمەتتىك جانە باسقا سالالاردا ودان ءارى دامۋ مەن ىلگەرىلەۋ ءۇشىن وزەكتى تسيفرلىق دەرەكتەردى پايدالانۋ قاجەتتىلىگىن سەزىنەدى. ساناق - بۇل مەملەكەتتىك ماڭىزى بار ءىس، ول بارلىق ازاماتتارعا قاجەت. 

حالىق ساناعىنىڭ قورىتىندىلارى ەكونوميكالىق، دەموگرافيالىق جانە الەۋمەتتىك كورسەتكىشتەردى كورسەتەدى جانە بارلىق دەڭگەيدەگى بيۋدجەتتەردى نەعۇرلىم وبەكتيۆتى قالىپتاستىرۋ ءۇشىن نەگىز بولادى. ساناق ناتيجەلەرى ءۇي شارۋاشىلىقتارىنىڭ، نەكە-وتباسى قاتىناستارىنىڭ، مۇمكىندىگى شەكتەۋلى ادامدار ءومىرىنىڭ، حالىقتىڭ تۇرعىن ءۇي جاعدايلارىنىڭ جاي-كۇيىن جاقسارتۋ جونىندەگى مەملەكەتتىك باعدارلامالاردى ازىرلەۋ، ءبىلىم بەرۋ، جۇمىسپەن قامتۋ، تۋ جانە كوشى-قون ماسەلەلەرى بويىنشا شەشىمدەر قابىلداۋ ءۇشىن قاجەت. ساپالى جينالعان اقپارات بيۋدجەتتى جوسپارلاۋ جانە قالا مەن جالپى ەلدىڭ ەكونوميكاسىن دامىتۋ ءۇشىن قاجەت. 

حالىق ساناعىنا قاتىساتىن ءاربىر ازامات مەملەكەتتىڭ جانە ءوزىنىڭ بولاشاعىنىڭ الەۋمەتتىك باعدارلامالارىن جوسپارلاۋعا جانە ازىرلەۋگە باعالى ۇلەس قوسادى. 

ەلوردا تۇرعىندارى مەن قوناقتارىن تۇسىنىستىكپەن قاراپ، ەلىمىزدىڭ ماڭىزدى جانە بىرەگەي وقيعاسى – ۇلتتىق حالىق ساناعىنا بەلسەندى قاتىسۋلارىڭىزدى سۇرايمىز!

ەستەرىڭىزگە سالا كەتەيىك، حالىق ساناعى دەرەكتەرىن جيناۋ پروتسەسى ەكى جولمەن جۇزەگە اسىرىلادى. ولاردىڭ ءبىرى-ۇيلەردى جاپپاي ارالاۋ، ەكىنشىسى - sanaq.gov.kz سايتىنداعى ونلاين-ساۋالناما.

سوڭعى جاڭالىقتار

ۇقساس جاڭالىقتار