ەكىنشى ىسكە قوسۋ كەشەنى ارالىق توننەلدەردەن جانە قازىرگى كەزدە ارلەۋ جۇمىستارى ءجۇرىپ جاتقان «سارىارقا» جانە «ب. مومىش ۇلى» ەكى بەكەتىنەن تۇرادى. مەتروپوليتەننىڭ ءبىرىنشى جەلىسىنىڭ ەكىنشى كەشەنى ۋچاسكەسىنىڭ تراسساسى اباي داڭعىلىنىڭ استىندا, التىنسارين داڭعىلىنان ياسساۋي كوشەسىنە دەيىن باتىس باعىتتا ورنالاسقان. قۇرىلىس ۇزىندىعى ەكى جولدى باعىتتا 3,08 شاقىرىم.
ەكىنشى ىسكە قوسۋ كەشەنىنىڭ جالپى دايىندىعى 91%. بۇگىندە تەمىر-بەتون كونسترۋكتسيالارىنىڭ قۇرىلىسى, ارالىق توننەلدەردى قازۋ اياقتالدى, ساۋلەت-ارلەۋ جۇمىستارى, جولدىڭ جوعارعى قۇرىلىسى اياقتالىپ قالدى. قالعان جۇمىستارعا ينجەنەرلىك جەلىلەردى توسەۋ جانە جابدىقتى ىسكە قوسۋ كىرەدى.
بۇگىندە ورتاشا تاۋلىكتىك جولاۋشىلار اعىنى 30 مىڭ ادام. مامانداردىڭ ەسەپتەۋى كورسەتكەندەي, ەكىنشى ىسكە قوسۋ كەشەنى پايدالانۋعا بەرىلگەن سوڭ ورتاشا تاۋلىكتىك جولاۋشىلار اعىنى شامامەن 86 مىڭ ادامعا جەتەتىن بولادى. بۇل اباي داڭعىلىنداعى كولىك قوزعالىسىن ەداۋىر جەڭىلدەتۋگە جانە مىڭداعان قالا تۇرعىندارى مەن قوناقتارىنىڭ موبيلدىلىگىن ارتتىرۋعا مۇمكىندىك بەرەدى.
«سارىارقا» بەكەتى – تەرەڭ توسەمدى, پيلون ءتيپتى. ۆەستيبيۋلدەن, ەكى كىرۋ توبىنان تۇرادى. 2 ليفت, 8 ەسكالاتور ورناتىلدى. ول «فەميلي» ساياباعىنىڭ جانىنا, №3-8, 12 شاعىن اۋداندار بار, ياعني قالانىڭ ەڭ تىعىز ەلدى مەكەندەرىنىڭ بىرىندە ورنالاسقان.
«ب. مومىش ۇلى» بەكەتى – ۇساق قالانعان, كولوننا ءتيپتى. ەكى جەراستى ۆەستيبيۋلىنەن, التى كىرۋ توبىنان تۇرادى. 6 ليفت, 15 ەسكالاتور قاراستىرىلعان. اباي داڭعىلىنىڭ ءجۇرىس بولىگىنىڭ استىندا, مومىش ۇلى كوشەسىنىڭ باتىسىندا ورنالاسقان. بەكەت جەتىسۋ, جەتىسۋ-2, جەتىسۋ-4, مامىر, مامىر-5, مامىر-7 شاعىن اۋداندارىن قامتيدى.
قالا اكىمى باقىتجان ساعىنتاەۆ جىل سوڭىنا دەيىن ستانسالاردىڭ تەحنيكالىق ىسكە قوسىلۋىن قامتاماسىز ەتۋ ءۇشىن قۇرىلىس-ارلەۋ جۇمىستارىن جوعارى قارقىنمەن جۇرگىزۋدى تاپسىردى. مەتروپوليتەننىڭ ءبىرىنشى جەلىسىنىڭ ەكىنشى كەزەگىنىڭ ءۇشىنشى ىسكە قوسۋ كەشەنى ۋچاسكەسىنىڭ تراسساسى قۇرىلىسى ءجۇرىپ جاتقان اباي داڭعىلىنىڭ استىندا, ياسساۋي كوشەسىنەن ءاشىموۆ كوشەسىنە دەيىن باتىس باعىتتا ورنالاسقان. ۇزىندىعى 2,5 شاقىرىم قوس جولدى باعىتتاعى ارالىق توننەلدەردەن جانە ۇساق توسەلگەن «قالقامان» بەكەتىنەن تۇرادى.
قۇرىلىستى كەلەسى جىلدىڭ سوڭىنا دەيىن اياقتاۋ جوسپاردا. ەسەپتىك جولاۋشىلار اعىنى كۇنىنە شامامەن 93 مىڭ ادام بولادى.
