ونەر • 14 قازان، 2021

سۇلۋ كوكشە – ءان مەن جىردىڭ مەككەسى

77 رەت كورسەتىلدى

بۇل كۇندەرى ەجەلدەن ءان-جىردىڭ التىن بەسىگى اتانعان، ىلكىدەگى رۋحاني ومىرىمىزگە ماڭگى ولمەس مۇرا قالدىرعان سال-سەرىلەردىڭ اسقاق ءۇنى، عاجايىپ سالتاناتىنىڭ سۇلباسى ءالى كۇنگە دەيىن كوگىلدىر اسپاندا كىلكىپ تۇرعان كوكشەتاۋ بيىل قازاقستاننىڭ مادەني استاناسى مارتەبەسىن الىپ وتىر.

وتكەننىڭ ونەگەسىن بۇگىنگىنىڭ بويىنا جۇقتىرۋ پارىز. ەلباسى نۇرسۇلتان نازارباەۆ «بولاشاق­قا باعدار: رۋحاني جاڭعىرۋ» اتتى ەڭبەگىندە ء«بىز جاڭعىرۋ جولىندا بابالاردان ميراس بولىپ، قا­نىمىزعا سىڭگەن، بۇگىندە تامىرىمىزدا بۇلكىلدەپ جاتقان ىزگى قاسيەتتەردى قايتا تۇلەتۋىمىز كەرەك» دەپ اتاپ كورسەتكەن بولاتىن. شىنىندا دا، اتا-بابانىڭ الپىس ەكى تامىرىنداعى، بار بولمىسى مەن بىرەگەي بىتىمىندەگى وزگەشە قاسيەتتىڭ ءوڭى بۇگىنگىنىڭ بەينەسىن نۇرلاندىرسا، جان دۇنيەسىن جايلاسا، سول ارقىلى تۇلەپ، تۇرلەنىپ، ماڭگىلىك ەلدىڭ مارتەبەسىنە قىزمەت ەتسە، عانيبەت ەمەس پە؟!

بيىلعى مامىر ايىن­دا مادە­نيەت جانە ونەر قىز­­مەتكەرلەرى باس قوسقان القا­لى جيىن – «رۋ­حاني قازىنا» رەس­پۋبليكالىق فەس­تيۆالىندە كوك­شەتاۋ 2021 جىلعى قازاق­ستان­نىڭ مادەني استاناسى دەپ جا­ريا­لانعان بولاتىن. مادەني استانانىڭ سيمۆولدىق بەلگىسى قو­سا تاپسىرىلعان. بەلگىمەن بىرگە زور جاۋاپكەرشىلىك تە جۇك­تە­لىپ تۇر­عانداي. جۇمىس اۋقىم­دى، مىندەت مەجەسى بيىك. «قا­زاق­ستاننىڭ مادە­ني استاناسى» جوسپارىن مۇلتىكسىز جۇزەگە اسى­رۋ ءۇشىن وڭىردە جول كارتا­سى جاسالىپ، وبلىستىق اكىم­دىكتىڭ قولداۋىمەن 500-دەن اسا ءىس-شارا وتكىزۋ بەلگىلەندى. وزگە وڭىر­لەردەگى مادەنيەت باسقار­ما­­لارىمەن اقىلداسا وتىرىپ، بار­­لىق جۇمىستى ۇيلەستىرۋ ءۇشىن وبلىستىق مادەنيەت، ارحيۆ­تەر جانە قۇجاتتامالار باس­قار­ما­سىنىڭ جانىنان ارنايى شتاب قۇرىلدى. التى الاش باۋىرىنا باسقان سايىن دالاداعى ساف ال­تىنداي تۇنىپ جاتقان بار ما­دەني مۇرانى شىپ-شىرعاسىن شى­عارماي تولىق قامتىپ، جارقى­راتىپ كورسەتۋ ارقىلى بۇگىنگى زامانداستارىمىزدىڭ كوكىرەگىنە رۋحاني ءنار قۇيىپ، كوڭىل تەرەزەسىن اشۋعا ىقپال ەتەتىن ءىس-شارالار رەسپۋبليكالىق جوسپارمەن استاسىپ جاتتى.

مىنە، بۇگىندە قاسيەتتى كوكشە­تاۋ توپىراعىندا قازاقستان رەس­­پۋبليكاسى مادەنيەت جا­نە سپورت مينيسترلىگىنىڭ ۇيىم­داس­تى­رۋىمەن «سالەم، ەلوردا!» ءىى رەسپۋب­لي­كا­لىق فەستيۆالى ءوتىپ جاتىر. الما­تىدان باستاۋ العان ايتۋلى ونەر مەرەكەسى سۇلۋ كوكشەدە جالعاسىن تاۋىپ، دامي تۇسۋدە.

مۋزەي، كىتاپحانا، تەاتر ۇجىم­دارى قىزعىلىقتى كونتسەرتتەر مەن مادەني-كوپشىلىك شارالارىن ءماندى ەتىپ ۇيىمداستىرۋدا. جامان تۇماۋ جاعادان العالى ءان سۇيەتىن، ءماندى مادەنيەتتىڭ مايەگىن ايىرا بىلە­تىن كوپشىلىك شولىركەپ-اق قالعان ەكەن. جان جادىراتار جاعىمدى جاڭالىقتان قۇلاقتانعان سوڭ بار ىنتا-نيەتى اۋقىمدى شارالار­­عا اۋعان. الاشتىڭ ايتۋلى پەرزەن­تى قاجىمۇقان مۇڭايتپاسوۆ­تىڭ تۋعا­نىنا 150 جىل تولۋىنا ورايلاستىرىلعان ايماقتىق فول­ك­لورلىق فەستيۆال ايرىقشا ءمان­­دى شارا بولدى. بۋراباي باۋ­را­­يىنداعى ايگىلى ابىلاي حان الا­­ڭىندا قوستاناي، سولتۇستىك قازاقستان، قاراعاندى، اقمولا وبلىستارى مەن نۇر-سۇلتان قا­لا­­سىنىڭ ۇزدىك فولكلورلىق ۇجىم­­دارى مەن جەكە ورىنداۋشىلار كيەلى مەكەندى دۋمانعا بو­لەدى. ونەرپازدار دا ولكەنىڭ وتكەنىمەن تانىسۋعا مۇمكىندىك الدى. «فولكلورلىق اسپاپتار مەن ارانجيروۆكا نەگىزدەرى» تاقى­رىبىنداعى سەمينار-ترەنينگكە قاتىستى. اشىق اسپان استىنداعى «بوتاي-بۋراباي» مۋزەيىندەگى مۇ­را­عاتتاردىڭ تىلسىم سىرىن كوكى­رەككە ءتۇيدى. وبلىس ورتا­لى­عىنداعى تاريحي-ولكەتانۋ مۋزە­يىندە «تاۋەلسىزدىك تۋىن بيىك كو­تەرگەن ابىلاي حان»، « ۇلى دالا جاۋھارى»، «التى الاش­تىڭ جام­بىلى»، «قۇت قونعان قوس­تاناي» تاقىرىبىنداعى كورمە كورەر­مەندەر كوڭىلىنەن شىقتى. «استانا-بالەت» تەاترىنىڭ گاس­ترولى مەن اقان سەرى اتىنداعى سول­تۇستىك قازاقستان وبلىستىق فيلار­مونياسىنىڭ ء«بىر شاڭىراقتىڭ استىندا» كونتسەرتتىك باعدارلاما­سى ۇزاق ۋاقىت ەل ەسىندە ساقتالا­تىن ناعىز ءماندى، مازمۇندى شارا بولدى. قوستانايدىڭ نازىمبەك مولداحمەتوۆ اتىنداعى قازاق ۇلت-اسپاپتار وركەسترىنىڭ «دۋ­مان­دى توبىل» جانە ارقالىق جاسوسپىرىمدەر تەاترىنىڭ «ماڭ­گۇرت» دراماسى شوقتىعى بيىك شى­رايلى شىعارمالار رەتىندە كورەر­مەننىڭ كوڭىل كوكجيەگىن كەڭەيتىپ، رۋحاني الەمىنە ويىپ تۇرىپ ولجا سالعان دۇنيە بولدى.

كوكشەتاۋلىق كورەرمەن قوس بىر­دەي كوركەم دۇنيەنىڭ كۋاسى بولدى. ەل تاۋەلسىزدىگىنىڭ 30 جىلدىعىنا جانە شاحمەت قۇسايىنوۆ اتىن­داعى قازاق مۋ­زى­كالىق-دراما تەات­رىنىڭ 25 جىلدىعىنا وراي ۇيىم­داس­تىرىلعان ءىىى ايماقتىق فەس­تي­ۆالىنىڭ شەڭبەرىندە قوستا­ناي، قاراعاندى، پاۆلودار، پەت­رو­پاۆل قازاق تەاترلارىنىڭ قو­يى­لىم­دارى ىلكىمدى ىزدەنىستىڭ ىلگە­رىلەۋىن اڭعارتسا، «تەART-كوكشە» حالىقارالىق ءىىى فەستيۆالى اياسىندا قازاقستان، رەسەي فەدەراتسياسى، قىرعىزستاننىڭ 11 تەاترىنىڭ تاماشا ونەرى كىرپياز كورەرمەن­نىڭ كوڭىل شىمىلدىعىن ايقارا اشىپ، رۋحاني الەمگە قۇيىلعان تازا، ءمولدىر بۇلاقتىڭ باستاۋى بولدى. سىيلى سىباعا مۇنىمەن دە ۇزىلگەن جوق. نۇر-سۇلتان قالاسىنداعى قاليبەك قۋانىشباەۆ اتىنداعى مەملەكەتتىك قازاق اكادەميالىق مۋزىكالىق-دراما تەاترى «كۇي – كەرۋەن، ءان – الەم» باعدارلاماسىن ۇسىنىپ، ۇلى ونەردىڭ ۇلاعاتىن پاش ەتتى.

ونەر كەرۋەنى وڭىردەگى ۇلىلار سالعان سوقپاقپەن جالعاسىپ، كەلە­شەكتىڭ كوكجيەگىنە جەتەلەپ بارادى. كەشەگى كەڭەس زامانىندا كوزى بىتەلگەن قاينار بۇلاق قايتا اشىلعانداي مارجان تامشىلارىن جارقىراتا شاشىپ، ونەر اسپانى جارقىراي جانعان جۇلدىزعا تولى عاجايىپ ءسات بولدى بۇل.

سوڭعى جاڭالىقتار

جەتى وڭىردە 2 گرادۋس ۇسىك جۇرەدى

اۋا رايى • بۇگىن، 18:48

دوللار ارزاندادى

ەكونوميكا • بۇگىن، 15:50

ۇقساس جاڭالىقتار