بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى ءمالىم ەتتى.
«2021 جىلدىڭ قىركۇيەك ايىندا رەسپۋبليكالىق بيۋدجەتتەن زەينەتاقى تولەمدەرىنە 221,2 ملرد تەڭگە, ونىڭ ىشىندە بازالىق زەينەتاقى تولەۋگە – 67,9 ملرد تەڭگە, ىنتىماقتى زەينەتاقى تولەۋگە – 153,3 ملرد تەڭگە ءبولىندى. 2021 جىلعى 1 قازانداعى جاعداي بويىنشا زەينەتكەرلەر سانى 2 ملن 229 مىڭ ادامدى قۇرايدى.
زەينەتاقى تولەمدەرىنىڭ ورتاشا مولشەرى (ونىڭ ىشىندە بازالىق زەينەتاقى) 2021 جىلعى 1 قازانداعى جاعداي بويىنشا 99 887 تەڭگەنى قۇرادى», دەلىنگەن ۆەدومستۆو حابارلاماسىندا.
ايتا كەتەيىك, 2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى, ونىڭ جۇيەسىندەگى تاجىريبەسىن ەسكەرە وتىرىپ, ءار الۋشىعا جەكە تاعايىندالادى.
«زەينەتاقى جۇيەسىندەگى جۇمىس ءوتىلى 10 جىل نەمەسە ودان از بولسا, سونداي-اق ەگەر مۇلدە جوق بولسا, بازالىق زەينەتاقى ەڭ تومەنگى كۇنكورىس دەڭگەيىنىڭ 54%-ىن قۇرايدى, سودان كەيىن 10 جىلدان اسقان ءار جىل ءۇشىن ونىڭ مولشەرى 2%-عا ارتادى. مىسالى, ءسىز 20 جىل قاتىسساڭىز, بازالىق زەينەتاقى كۇنكورىس دەڭگەيى قۇنىنىڭ 74%-ىن, 30 جىل – كۇنكورىس قۇنىنىڭ 94%-ىن قۇرايدى. 33 جانە ودان دا كوپ جىل جۇمىس ءوتىلى بولسا, كۇنكورىس قۇنىنىڭ 100% جوعارى مولشەرىندە بەلگىلەنەدى.
وسىلايشا, مىندەتتى زەينەتاقى جارنالارى نەعۇرلىم تۇراقتى جانە تولىق سالىناتىن بولسا, زەينەتاقى جاسىنا جەتكەندە بازالىق زەينەتاقى تولەمدەرىنىڭ مولشەرى سوعۇرلىم كوپ بولادى», دەپ جازادى ەڭبەك مينيسترلىگى.
