تەڭگە باعامىنىڭ وزگەرۋى قازاقستاندىق تاۋارلار ەكسپورتىنىڭ وسۋىنە جانە ەلدىڭ سىرتقى ساۋدا بالانسىنىڭ جاقسارۋىنا وڭ اسەر ەتەدى.
ءبىرىنشى كەزەكتە, ول ايتارلىقتاي دارەجەدە ەكسپورتقا باعىتتالعان, ءوندىرىسى يمپورتقا ونشا تاۋەلدى ەمەس كاسىپورىندار ءۇشىن وڭ سەرپىن بەرەدى. تەڭگە باعامىنىڭ وزگەرۋى ناتيجەسىندە تاۋارلاردىڭ تەڭگەگە شاققانداعى قۇنى ايتارلىقتاي تومەندەيدى (ياعني تاۋار ءوندىرۋدىڭ وزىندىك قۇنى تومەندەيدى). بۇل قازاقستاندىق ءونىم جەتكىزۋشىلەردىڭ ءونىم باعالارىنىڭ ارتىقشىلىعى ەسەبىنەن سىرتقى رىنوكتاردا باسەكەلەستىك قابىلەتىنىڭ ارتۋىنا جول اشادى.
Kaznex Invest اگەنتتىگى بەس جىلدان استام ۋاقىتتان بەرى وتاندىق ءوندىرۋشى كومپانيالارعا ءوز تاۋارلارىن شەتەلگە شىعارۋعا كومەكتەسۋدە. بۇل ورايدا, وڭدەلگەن ءونىم شىعاراتىن كومپانيالاردىڭ «ەكسپورت-2020» مەملەكەتتىك باعدارلاماسى باستى نازاردا. ولار ماشينا جاساۋ, مەتاللۋرگيا, حيميا, ازىق-ت ۇلىك, فارماتسەۆتيكا, قۇرىلىس كومپانيالارى جانە باسقا دا سالالار. وڭدەۋ سەكتورىنىڭ شامامەن 1500 كاسىپورنى ءۇيدب جىلدارى ىشىندە ءوزىنىڭ شەتەلدەگى بيزنەسىن دامىتۋدا مەملەكەتتىك كومەك الدى. مەنىڭ ويىمشا, تەڭگە باعامىنىڭ وزگەرۋى ەكسپورتتاۋشىلار ءۇشىن قورعاۋ شاراسى قىزمەتىن اتقارىپ, قازاقستاندىق ەكسپورت كولەمىن ۇلعايتۋعا مۇمكىندىك تۋعىزادى. بۇگىندە, قازاقستان الەمدىك ەكسپورتتاۋشىلار تىزىمىندە 42-ءشى ورىن الادى, ال ەكسپورت گەوگرافياسى 1119 ەلدەن تۇرادى.
سونداي-اق, تاۋار ءوندىرۋشى ەكسپورتتاۋشىلارعا قوسىمشا تابىس الۋ مۇمكىندىگىنىڭ پايدا بولاتىنىن دا اتاپ ءوتۋ قاجەت. ونى ولار ءوز وندىرىستەرىن دامىتۋعا باعىتتاي الادى. ول سونداي-اق, وتاندىق كومپانيالاردىڭ شەتەلدىك رىنوكتارداعى باسەكەگە قابىلەتتىلىگىن ارتتىرىپ, ەكسپانسيا ءۇشىن جاعداي تۋعىزادى.
بيىلعى جىلى ءبىز ەكسپورتتى قىرعىزستانعا, تاجىكستانعا, تۇركىمەنستانعا, وزبەكستانعا, ارمەنياعا, رەسەيگە (چەليابى, ومبى, ءنوۆوسىبىر, سامارا, ورىنبور, ەكاتەرينبۋرگ, قازان), قىتاي, يران جانە اۋعانستان ەلدەرىنە شىعارۋدى جوسپارلاپ وتىرمىز. سونداي-اق, ءبىزدىڭ اگەنتتىك كاسىپورىنداردىڭ رەسەيدەگى جانە ورتالىق ازيا ەلدەرىندەگى سالالىق حالىقارالىق كورمەلەرگە قاتىسۋىنا دا ىقپال ەتەتىن بولادى.
ءىس جۇزىندە تەڭگە باعامىنىڭ وزگەرۋى نارىق ەكونوميكاسىنداعى قاجەتتى شارت بولىپ تابىلادى. كوپتەگەن دامۋشى ەكونوميكالار ۆاليۋتا باعامىن تومەندەتتى, ال ول سول ەلدەردىڭ تاۋارلارىن اناعۇرلىم تارتىمدى ەتە ءتۇستى. كەزىندە اقش, قىتاي جانە رەسەي ءدال وسىنداي ۇلتتىق ءوندىرىستى قورعاۋ شارالارىنا باردى.
ەكىنشى جاعىنان العاندا, شەتەلدىك ۆاليۋتاعا قاتىستى ۇلتتىق ۆاليۋتا باعامىنىڭ وزگەرۋى وتاندىق تاۋارلاردىڭ ىشكى رىنوكتاعى باسەكەگە قابىلەتتىلىگىن ارتتىرادى. بۇل شارا يمپورتتىق تاۋارلار باعاسىن ءوسىرىپ, ولاردىڭ جەرگىلىكتى ونىممەن سالىستىرعاندا باسەكەگە قابىلەتتىلىگىن ازايتادى, ءسويتىپ يمپورتقا شەكتەۋ قويادى, ياعني يمپورتتى الماستىرۋ جۇزەگە اسادى. بىلايشا ايتقاندا, ۆاليۋتا باعامىنىڭ وزگەرۋى ۇلتتىق ونەركاسىپ ءۇشىن, اسىرەسە, ينتەگراتسيالىق ۇدەرىستەر شەڭبەرىندە قورعاۋ شاراسى بولىپ تابىلادى.مەيىرجان مايكەنوۆ,
Kaznex Invest ەكسپورت جانە ينۆەستيتسيالار
جونىندەگى ۇلتتىق اگەنتتىگى باسقارما
توراعاسىنىڭ ورىنباسارى.
