وڭىردە جوبانى ءتيىمدى ىلگەرىلەتۋ ماقساتىندا 2020 جىلعا دەيىن ارنايى جوسپار-كەستە تۇزىلگەن بولاتىن. 2019-2020 جىلدارى اۋىل اجارىن كەلتىرىپ, تۇرمىسىن تۇزەۋ باعىتىنداعى 75 جوبا جۇزەگە اسىرىلدى. يگىلىكتى ءىستىڭ ناتيجەسىندە 15 اۋىلدىڭ 80 مىڭعا جۋىق تۇرعىنىنىڭ ءومىر ءسۇرۋ ساپاسى كوپ-كورىم جاقساردى. ەڭ الدىمەن باعدارلاما شەڭبەرىندە ۇزىندىعى 120 شاقىرىم كەنتىشىلىك جولدارعا مۇقيات جوندەۋ جۇمىستارى جۇرگىزىلىپ, سۋاعارلار ورنالاستىرىلدى. قازىر بۇل اۋىلداردىڭ ءىشى جايناپ تۇر. زەرەندى اۋدانىنىڭ ۆيكتوروۆكا جانە بۇلاندى اۋدانىنىڭ كاپيتونوۆكا اۋىلدارىنىڭ 2 مىڭنان استام تۇرعىنى ورتالىقتاندىرىلعان اۋىز سۋمەن قامتاماسىز ەتىلدى. قوس اۋىلدىڭ تۇرعىندارى ۇزاق ۋاقىتتان بەرى تازا سۋدى تۇتىنا الماي, وكپە-نازدارىن ايتىپ كەلگەن بولاتىن. ءتىپتى ەلدى مەكەندەردەن كەيبىر تۇرعىنداردىڭ ۇدەرە كوشۋىنە سەبەپ بولىپ وتىرعان وسى ماسەلە ەدى. جاڭا جوبانىڭ جاقسىلىق شاراپاتىمەن كوپتەن بەرى تۇرعىنداردى مازالاعان جايت ءبىر مەزەتتە شەشىلدى. استراحانكا اۋىلىندا ينجەنەرلىك جەلىلەرى بار قازاندىق, ارشالى كەنتىندە ءبىر مەزەتتە 80-نەن استام ادامدى قابىلدايتىن باسسەينى بار دەنە شىنىقتىرۋ-ساۋىقتىرۋ كەشەنى سالىندى. وعان قوسا, كوشەلەردى جارىقتاندىرۋعا كوڭىل ءبولىندى. باسقا دا بىرقاتار نىسانعا جوندەۋ جۇمىستارى جۇرگىزىلدى.
ءبىر ايتا كەتەرلىگى, قىرۋار شارۋا قولعا الىنعان كەزدە 900-گە جۋىق اۋىل تۇرعىنى ۋاقىتشا بولسا دا جۇمىسقا ورنالاسىپ, تابىس تاپتى. جوبا جۇزەگە اسىرىلا باستاعاننان بەرى 48 ادامعا تۇراقتى جۇمىس ورنى تابىلدى. ەكى قولعا ءبىر كۇرەك تابا الماي وتىراتىن اۋىل تۇرعىندارى ءۇشىن وسىنىڭ ءوزى دەمەۋ.
بيىل ەل تاۋەلسىزدىگىنىڭ مەرەيتويى قارساڭىندا 27 ەلدى مەكەندە 77 جوبانى جۇزەگە اسىرۋعا بيۋدجەتتەن قاراجات ءبولىندى. وسى ارادا وتكەن جىلدارمەن سالىستىرعاندا قاراجات كولەمىنىڭ ەداۋىر قوماقتى ەكەنىن, جوبالار مەن يگىلىككە يە بولاتىن اۋىلداردىڭ سانى كوبەيە تۇسكەنىن ايتا كەتكەن ءجون. 14 جوبا بويىنشا جوسپارلانعان جۇمىس تولىق اياقتالدى. وسى ورايدا, وبلىس ورتالىعىنىڭ ىرگەسىندەگى كراسنويار اۋىلىن ورتالىقتاندىرىلعان جىلۋمەن جابدىقتايتىن جەلى سالىنىپ, مادەنيەت پەن ەگىندىكول اۋىلدارىنداعى جولدار ورتاشا جوندەۋدەن وتكىزىلدى. جاقسى اۋىلىنداعى مادەنيەت ءۇيى كۇردەلى جوندەۋدەن وتكىزىلسە, لوزوۆوە اۋىلىنداعى جول جوندەلدى. نوۆوسەلوۆكا اۋىلىندا دا ءدال وسىنداي جاعىمدى جاڭالىق بار.
اتباسار اۋدانىنىڭ باستاۋ اۋىلىندا جاستار ورتالىعى, جاقسى مەن اقكول اۋىلدارىندا دەنە شىنىقتىرۋ-ساۋىقتىرۋ كەشەندەرى, بۋراباي اۋدانىنىڭ مادەنيەت اۋىلىندا سپورت كەشەنىنىڭ قۇرىلىسى جۇرگىزىلۋدە. سونداي-اق ساندىقتاۋ اۋدانىنىڭ بالكاشينو اۋىلىنداعى ستاديوندى قايتا جوندەۋدە.
جوبا اۋىل تۇرعىندارىنىڭ تۇرمىسىنىڭ جاقسارۋىنا سەپتىگىن تيگىزىپ وتىر. ەگەر وسىنداي جاناشىرلىقپەن بارشا اۋىل گۇلدەنسە, ەل ەڭسەسى ەلدەن ەرەك بيىكتەي بەرەتىنى ءسوزسىز. اۋىل ادامدارى دا مەملەكەت قامقورلىعىن جان جۇرەكتەرىمەن سەزىنىپ وتىر.
