قارۋىن قالامعا ايىرباستاعان

تالاي بوزداقتى قۇربان ەتىپ, تالاي جاۋىنگەردى جارىمجان كۇيگە تۇسىرگەن اۋعان سوعىسىن كەڭەس اسكەرلەرىنىڭ تاستاپ شىققانىنا دا شيرەك عاسىر ۋاقىت بولىپتى. ۇلىنان قاپىدا كوز جازعان انانىڭ كوز جاسى ءالى كەپكەن جوق. ون جىل بويى كىم ءۇشىن, نە ءۇشىن سوعىسقانىن بىلمەگەن ساربازدار 15 اقپاندى مەرەكەلەپ, سول كۇنى ءبىر سەرپىلىپ قالادى. ويتكەنى, 1989 جىلدىڭ ءدال وسى كۇنى ولار اۋعانستان جەرىن ءبىرجولا تاستاپ شىققان-دى. ەلىمىزدەن بۇل سوعىسقا 22 مىڭ سارباز بەن ساردار قاتىسىپ, ولاردىڭ 761-ءى ەلگە تابىتپەن ورالسا, 21-ءى ءىز-ءتۇزسىز كەتكەندەر قاتارىندا دەيدى رەسمي دەرەك. ال ەلوردامىز استانادان (ول كەزدەرى تسەلينوگراد ەدى) بورىشتارىن وتەگەن جاۋىنگەر-ينتەرناتسيوناليستەردىڭ اراسىندا تسەلينوگراد وبلىستىق اسكەري كوميسسارياتىنان اسكەرگە 1981 جىلى شاقىرىلعان ارىپتەسىمىز عالىم قوجابەكوۆ تە بار ەدى. ءوزىنىڭ اسكەري بورىشىن اۋعانستان جەرىندە تولىقتاي وتەپ, ەلگە ەسەن-ساۋ ورالعان ول كەلگەن بويدا قارۋىن قالامعا ايىرباستادى. ونىڭ دالەلى, جوعارى ءبىلىم الا ءجۇرىپ, تسەلينوگراد وبلىستىق «كوممۋنيزم نۇرى» (قازىرگى «ارقا اجارى») گازەتىنە جۇمىسقا تۇرۋى ەدى. وسىندا ءجۇرىپ تەمىرقانات بولعان ول توقسانىنشى جىلى قازاقشاعا سۋساپ جۇرگەن جۇرتشىلىقتىڭ نيەتىنە اشىلعان «اقمولا اقيقاتى» (قازىرگى «استانا اقشامى») گازەتىنە 1995 جىلى اۋىسادى. مىنە, وسىدان كەيىن كەيىپكەرىمىزدىڭ ەكىنشى تىنىسى اشىلىپ, ءوزىن جاڭا قىرىنان كورسەتەدى. ەتكەن ەڭبەك پەن توگىلگەن تەر تەككە كەتسىن بە, ول وسى جەردەن باس رەداكتوردىڭ ءبىرىنشى ورىنباسارلىعىنا دەيىن كوتەرىلەدى. سول ۋاقىتتان بەرى ونىڭ شىعارماشىلىق عۇمىرى وسى گازەتپەن بىتە قايناسىپ كەلەدى. سپورت دەسە, ىشكەن اسىن جەرگە قوياتىن عالىمنىڭ جىلدار بويعى تاجىريبەسىنىڭ جەمىسى سالاعا قاتىستى كىتاپتار جازۋىمەن تولىعۋدا. سونداي-اق, وندىرىستىك تاجىريبەدەن ەلىمىزدىڭ تۇكپىر-تۇكپىرىنەن كەلگەن ستۋدەنتتەرگە اعالىق اقىل-كەڭەستەرىن ايتىپ, باعىت-باعدار بەرۋى دە ولاردىڭ ماماندانۋلارىنا ءوز سەپتىگىن تيگىزۋدە. «كەلەر ۇرپاق سوعىستى كورمەك تۇگىلى, ەستىمەسە ەكەن. بۇل سوعىس ءبىز­بەن كەتسىن. ەلىمىز تىنىش, ىرگە­مىز بەرىك, تاۋەلسىزدىگىمىز تۇعىرلى بولعاي», دەيدى جاۋىنگەر-جۋرناليست. بۇگىندە اياۋلى اكە, قادىرلى جار, قادىرمەندى اتا بولىپ وتىر­عان ع.قوجابەكوۆ سول سوعىس جىلدارىنداعى قارۋلاس دوستارىن ءجيى ەسىنە الىپ وتىرادى. اسىرەسە, وپات بولعان جولداستارىن ويلاعاندا ەسىنە جاۋىنگەر اقىن باقىتبەك سماعۇلدىڭ: جاپىراقسىز تۇر قايىڭ ىرعاتىلىپ, سىڭعىر-سىڭعىر سىر مىنەز, سىرعا قىلىق. ويلاعاندا ءوزىڭدى, قارۋلاس دوس, جاس جۇرەگىم كەتەدى ۋعا تولىپ, دەگەن ولەڭ جولدارى ەرىكسىز ەسكە تۇسە بەرەدى. ايتسە دە ول ەڭسەسىن ءتۇسىر­مەيدى. كەيىنگى تولقىن امان بولسىن دەگەن تىلەگىن ىشتەي قايتالاۋمەن بولادى. ءابدىراحمان قىدىربەك, «ەگەمەن قازاقستان». استانا.