62 پايىز با, الدە 10 پايىز با؟

سوچيدە ءارتۇرلى ۇلت وكىلدەرى تۇرادى. وليمپيادا كەزىندە ورىس حالقى باسىم بولىپ كورىنەدى. بىراق, كوشەدە وزگە ۇلتتىڭ وكىلدەرى دە توبە كورسەتىپ قويادى. قالادا 62 پايىز ورىس تۇرسا, قالعانى باسقا ۇلتتىڭ وكىلدەرى دەگەن دەرەك بار. رەسمي دەرەك وسىلاي دەيدى. 62 پايىز با, الدە 10 پايىز با؟ شىن مانىندە وسىلاي ما؟ بۇعان جاۋاپتى, ارينە, رەسمي مەملەكەتتىك ورگاندار ايتپايدى. وعان جاۋاپتى ءبىز باسقا ەمەس, وسىنداعى قاراپايىم تىرشىلىك كەشىپ جاتقان ورىستاردىڭ وزىنەن ەستىدىك. الەكساندر ەسىمدى جاسى 40-تان اسقان ءسوچيدىڭ بايىرعى تۇرعىنىمەن وليمپيادانىڭ اشىلۋ سالتاناتى كەزىندە جارىستار تۋرالى سويلەسىپ قالعانىمىزدا تانىستىق. اكەسىن ايتپاعاندا, ونىڭ اتاسى دا وسى جەردە تۋىپ-ءوسىپتى. سوندىقتان ول ءوزىن اتاسىنىڭ سوچيدەگى ءۇشىنشى ۇرپاعىنىڭ وكىلىمىن دەپ سانايدى. مىنە, وسى الەكساندر بىزگە سوچي تۋرالى كوپ ادام ەستي بەرمەيتىن, بىلە بەرمەيتىن ءبىراز نارسەنى ايتتى. ونىڭ ەڭ ءبىرىنشى تاڭعالدىرعانى, بىزگە جاقىندا سوچيدە بولعان جەر سىلكىنىسى تۋرالى ايتقانى بولدى. «سوچيدە وليمپياداعا دايىن­دىق جاقسى بولدى. ونى ەشكىم جوق­قا شىعارا المايدى. بىراق وسىندا 24-25 قاڭتار كۇندەرى جەر سىلكىنىسىنىڭ بولعانىن ەشكىم ءبىل­مەيدى», دەدى ول. ونىڭ ايتۋىنشا, قالانىڭ ماڭىنداعى تاۋلى جەرلەردە 6 بالدىق تەربەلىس تىركەل­گەن. الايدا, جەر سىلكىنىسى بول­سا دا ونى رەسەيدىڭ وزىندە ەش­كىم بىلگەن جوق. بۇل اقپارات وتە قۇپيا جاعدايدا بولعان ەكەن. ءبىر قاراعاندا, ونىڭ ايتقانىنا سەنۋگە دە بولادى. ال ەكىنشى جاعىنان العاندا, ءوزىڭ كورمەي, رەسەيدەگى بەيرەسمي اقپارات قۇرالدارىنىڭ ءوزى ايتپاعان سوڭ جەر سىلكىنىسى كۇمان تۋعىزادى. سوچيدە, جوعارىدا ايتقا­نى­مىزداي, رەسمي تۇردە 62 پايىز ورىس حالقى تۇرادى دەسەك, بەيرەسمي مالىمەتتەر قالاداعى ورىستاردىڭ سانى نەبارى 10 پايىزدى عانا قۇرايدى دەيدى. وسىعان دا سەنۋگە-سەنبەۋگە بولادى. وليمپيادا كەزىندە رەسەيدىڭ باسقا وڭىرلەرىنەن تۋريستەر كوپتەپ كەلگەن سوڭ ورىستار 62 پايىز بولۋى مۇمكىن. ال ەرتەڭ ۇيلەرىنە كەتكەندە سولاردىڭ 10 پايىزى قالسا تاڭدانباڭىز. مۇنى ءبىز وليمپياداعا كەلگەن كۇننەن بەرى بايقادىق. كوشەدە ارميان, ازەربايجان, باسقا دا كاۆكاز حالىقتارى كوپتەپ كەزدەسەدى. مىسالى, وليمپياداعا ارنالعان ءباسپاسوز ورتالىعىنىڭ جانىنداعى جەردە ارميانداردىڭ ءدامحانالارىن, كولىك جۋ ورىندارىن كەزدەستىرۋگە بولادى. ءبىر قىزىعى, ولاردىڭ ءوز تىلدەرىندە سويلەپ جۇرگەندەرىن كەزدەستىرگەن جوقپىز. ءبارى ورىسشا سويلەيدى. بالالارى دا ءورىستىلدى بولىپ كەتكەن. قىسقاسى, وسى اۋداندا ەدۆارد, روبەرت, داۆيد دەگەن ەسىمدەر ءجيى اتالادى. ال جالپى, سوچيدە ارميانداردىڭ ءوز اۋداندارى دا بار ەكەن. ولار تىعىز ورنالاسقان. سونىمەن بىرگە, كوشەدە ازەربايجان, چەشەندەرمەن دە كەزىگە الاسىز. سوچيدە چەركەس­تەر دە كوپ بولۋى مۇمكىن. بۇل جەر, قالاي دەگەنمەن, ولاردىڭ اتامەكەنى بولىپ سانالادى. قازىر چەركەستەردىڭ باسىم بولىگى قاراشاي-چەركەس رەسپۋبليكاسىندا, سوسىن تۇركيادا تۇرادى. تۇركياعا كەتكەندەرى وسىدان 150 جىل رەسەي مەن وسمان مەملەكەتىنىڭ اراسىنداعى سوعىستىڭ كەسىرىنەن قونىس اۋدارعان. وتكەن جولى تۇركيادا تۇراتىن چەركەس­تەر سوچي وليمپياداسىنىڭ قار­ساڭىندا جارىستارعا بويكوت جاريالاپ, ءبىراز شۋلاپ ەدى. قازىر ول باسىلعان سياقتى. بىزدىڭشە, بۇل ىسكە رەسەيدىڭ ءوزى ارالاسقانعا ۇقسايدى. ويتكەنى, رەسەي ۇكىمەتى وليمپيادانى وتكىزۋگە 50 ملرد. اقش دوللارىن جۇمساسا, سپورت نىساندارىنىڭ كوبىن تۇرىك كومپانيالارى جۇرگىزگەن دەگەن دەرەك بار. وسىدان-اق انادولى ەلى ساياساتىن اڭعارۋعا بولادى. داستان كەنجالين, «ەگەمەن قازاقستان» – سوچيدەن.