الاماننىڭ توپ باسىنا تالاس باستالدى

سوچيدەگى XXII قىسقى وليمپيا ويىندارىنىڭ جارىستارى تاۋلىگىن 6 اقپاننان باستاپ ەسەپتەگەندە, مۇنداعى ساڭلاقتار بۇرناعى كۇنى ءتورتىنشى سايىستار ساعاتتارىن وتكىزدى. بۇل كۇنى, ياعني 10 اقپاندا ادلەردىڭ اشىق-جابىق ارەنالارىندا بەس مەدالدىڭ جيىنتىعى ساراپقا سالىندى. وندا بياتلون, تاۋ شاڭعىسى, كونكي سپورتى, فريستايلدىڭ موگۋل ءتۇرى جانە شورت-ترەك بويىنشا جۇلدەلەر ساراپقا ءتۇستى. قازاقستان سپورتشىلارى وسى سايىستاردىڭ بارلىعىنا دا قاتىستى. ال توپ باسىندا جالاۋ جەلبىرەتىپ, العا شىعۋعا دەگەن ۇمتىلىس كۇن اسقان سايىن قىزا تۇسۋدە. مۇنىڭ ۇزدىك ۇلگىسى بۇرناعى كۇنى ايقىن كورىندى. تۇسكە دەيىن الدا ەشكىمگە دەس بەرمەي, ەڭ الدا نورۆەگيا سپورتشىلارى تۇر ەدى, كۇن اۋا بۇرىن ۇشتىكتە بولماعان كانادا سارت ەتىپ, كوشتىڭ باسىنا كولبەڭدەپ شىعا كەلدى. مەزگىل اقشامعا قۇلاعان شامادا ءبىرىنشى بەلەستى گوللانديا ساڭلاقتارى اياق استىنان تارتىپ اكەتتى. ال ءتۇن جارىمىندا «ۇيەڭكى جاپىراعى» ەلىنىڭ قۇراماسى قايتادان توپ باسىنا شىقتى. جانعان ءۇمىت پە, جالعان ءۇمىت پە؟ مىنە, وسىلاي بەزبەن باسىن ءسات سايىن الماستىرعان بۇرناعى كۇننىڭ جارىستارى ءتۇس اۋا باستالدى. سونىڭ ىشىندە ءبىزدىڭ كوڭىلىمىزدى ەرتەرەك ەلەڭدەتىپ, ءۇمىتىمىزدى كوبىرەك ۇكىلەگەن وسىلاردىڭ ەڭ سوڭىنان كەرۋەن كەرگەن فريستايلدان ەرلەردىڭ موگۋل باعدارلاماسى بولدى. وسىدان ەكى كۇن بۇرىن يۋليا گالىشەۆا ءبىراز كۇشىن سارپ ەتكەن جارىس سىندى مۇنىڭ فينالى دا ءتۇننىڭ جارىمى اۋا ءتامامدالدى. ادەپكى ەكى ىرىكتەۋ سىناعى كەشكى ساعات 7:30-دا ايداۋ جولعا تۇسكەن سايىستىڭ ءۇش فينالدىق بولىگى ماسكەۋ مەزگىلىمەن تۋرا تۇنگى 22:00-دە قانات جايدى. ول تولىق اياقتالعانشا, ەكى ساعاتتان استام ۋاقىت كەتتى. ءسويتىپ, استانا ۋاقىتىمەن ساعات 2-دەن وتە بيىكتەگى «روزا حۋتور» ەكستريم-پاركىنەن قالاعا قاراي اياڭداپ كەلە جاتتىق. ال جارىس ءبىزدىڭ تالماي تاماشالاۋىمىزعا تولىق مۇمكىندىك بەردى. بۇل جولعى جۇرتتىڭ قاراسى وتكەندەگىدەن دە ەداۋىر كوپ كورىندى. بىزدەن ءۇش جىگىت ءوز حال-قادەرلەرىنشە قيمىل جاساپ كوردى. سونىڭ ىشىندە دميتري بارماشوۆ ەكىنشى كۆاليفيكاتسيادان قالىپ قويسا, دميتري رەيحەرد (سۋرەتتە) پەن پاۆەل كولماكوۆ فينالعا ءوتتى. مۇندا بىزگە پاشانىڭ فينالدىڭ ەكىنشى بولىگىنە دەيىن جەتىپ, 10-ورىنعا تابان تىرەگەنى ايتارلىقتاي جاعىمدى جاڭالىق سەزىلدى. ءبىرىنشى اينالىمنان كەيىن 29 ۇمىتكەردىڭ 12-ءسى كەلەسى كەزەڭگە قادام باستى. بۇدان ءارى تاعى 6 تارلان ءبولىنىپ شىعىپ, مەدال بولىسىنە قىزۋ كىرىسىپ كەتتى. وسى توپقا التىنشى بولىپ ەنگەن رەيحەرد سوڭعى شايقاستا تاعى ءبىر ساتى ىلگەرى شىعىپ, ءتۋرنيردى 5-ورىنمەن تياناقتادى. بىراق بۇل جولى تورەشىلەرگە وكپەمىز قارا قازانداي دەپ ايتا الماساق كەرەك. ديمانىڭ قارسىلاستارىنىڭ ءبارى كىل «سەن تۇر, مەن اتايىن» دەيتىندەي ساقا جىگىتتەر ەدى. التىلىقتىڭ اۋقىمىندا كانادانىڭ – ءۇش, اقش, رەسەي جانە قازاقستاننىڭ ءبىر-بىردەن سپورتشىلارى قايتپاي شايقاستى. اسىرەسە, ءبىر ەلدىڭ ءۇش نويانى شىنىمەن شالت تا, شاباندوز دا كورىندى. سونى دالەلدەپ, ولار العاشقى ەكى ورىندى وزدەرىندە الىپ قالدى. قىزىق بولعاندا, وسىلاردىڭ ەكەۋىنەن دە ىلعي الدا بولىپ كەلگەن ءۇشىنشى وتانداستارى سوڭعى سى­ناقتا ءسال-ءپال قاتەلىككە جول بەرىپ, ءتورتىنشى ورىنعا ىعىسىپ كەتتى. مۇنى بايقاعان رەسەيلىك جانكۇيەرلەردىڭ قۋانىشىندا شەك بولعان جوق. بۇل ولاردىڭ ۇكىلەپ قوسقان ۇمىتتەرى الەكساندر سمىشلياەۆتىڭ كەمىندە قولا مەدال الاتىنىن ءبىلدىرىپ ەدى. ارتىنان راسىندا سولاي بولىپ شىقتى. كانا­دا­لىقتاردىڭ ەڭ سوڭىنان جۇگىرگەن سوڭعى وكىلى ناتيجەسىندە ەكىنشى ورىنعا تۇراقتادى دا, رەسەيلىك ءۇشىنشى ساتىعا قاراي جىلجىپ ءتۇستى. بىراق بۇعان ايىلىن جيعان سمىش­لياەۆ بولعان جوق. جارىستار اياق­تالعان بويدا جۋرناليستەردىڭ بەرگەن سۇراقتارىنا الىپ-ۇشىپ تۇرىپ جاۋاپ بەرگەن ول بۇل جەڭىسىن جاقىندا دۇنيەگە كەلگەن قىزىنا ارنايتىنىن قۋانا حابارلاپ جاتتى. ال چەمپيوندىق تۇعىرعا سوڭعى ساتتە عانا تۇياق ىلىكتىرگەن الەك­ساندر بيلادو وسىمەن ەكىنشى مارتە قاتارىنان وليمپيادانىڭ التىنىن الدى. مۇنىڭ الدىندا ول ءبىرىن­شى چەمپيوندىعىنا وسىدان ءتورت جىل بۇرىن, ءوز ەلىنىڭ تورىندە – كا­نا­دانىڭ ۆانكۋۆەرىندە قول جەتكىزىپ ەدى. بۇعان قاراعاندا, ونىڭ وتانداسى ميكاەل كينگسبەري ءۇشىن بۇل جولعى كۇمىس مەدال ويىندار ورنە­گىن­دەگى ءبىرىنشى جوعارى جۇلدە بولدى. وسىلاي قازاقستان سپورتشىلارى تاعى دا مەدالعا تاياق تاس­تام جەر قالعاندا, وعان جەتە الماي توقتاپ قالدى. ءبىزدىڭ ءۇمىت كۇت­كەن ەكى موگۋلشىمىز دا وسى كورسەت­كىش­تى قايتالادى. مۇنىڭ ءوزى سول ءۇمىتى­مىزدىڭ جانعان شىراق پا, جال­عان سۇراق پا ەكەنىن بىلدىرتپەي, ويدى ءارى-ءسارى ەتىپ تاستادى. سوندا دا بولسا, «قازان اۋزى – جوعارى» دەپ وتىرمىز. سەبەبى, ءبىزدى ەلدەن شىققالى ەلەڭدەتىپ جۇرگەن ەرەن جۇيرىكتەرىمىز سايىس سوقپاعىنا ءالى تولىق تۇسكەن جوق. سوندىقتان جانعان ءۇمىتىمىز ءالى ۇلپىلدەپ تۇر.

مەدالدار قورجىنى

 (12 اقپانعا دەيىنگى مالىمەت)

ورىن	مەملەكەت اتى	التىن	كۇمىس	قولا	جيىنى
1	نورۆەگيا	4	3	4	11
2	كانادا	4	3	2	9
3	گەرمانيا	4	1	0	5
4	گوللانديا	3	2	3	8
5	اقش	2	1	4	7
6	شۆەيتساريا	2	0	0	2
7	رەسەي	1	3	3	7
8	اۆستريا	1	3	0	4
9	فرانتسيا	1	0	2	3
10	بەلارۋس	1	0	0	1
10	وڭتۇستىك كورەيا	1	0	0	1
10	پولشا	1	0	0	1
10	سلوۆاكيا	1	0	0	1
14	شۆەتسيا	0	3	1	4
15	چەحيا	0	2	1	3
16	سلوۆەنيا	0	1	2	3
17	يتاليا	0	1	1	2
17	جاپونيا	0	1	1	2
19	قىتاي	0	1	0	1
19	فينليانديا	0	1	0	1
21	ۇلىبريتانيا	0	0	1	1
21	ۋكراينا	0	0	1	1

ءار كولدىڭ ءوز دۋاداعى بار ەگەر وسى كۇنى سايىسقا سايلانىپ شىققان ساربازدارىمىزدىڭ بارىنەن جوعارى ناتيجە كۇتكەنىمىزدى ايتساق, ونىمىز شىلعي وتىرىك بولىپ شىعار ەدى. اقيقاتى كەرەك, ءار كولدىڭ ءوزى قونار دۋاداعى بولادى. ونى ءبىز دە پايىمداي الامىز. سوندىقتان اتام قازاقتىڭ «الۋان-الۋان جۇيرىك بار, الىنە قاراي شابادى» دەگەن ناقىلىن ءجيى قاپەرىمىزگە كىرگىزىپ قويامىز. ءبىزدىڭ جىگىتتەر دە سولاي الىنە قاراي شاپتى, باعىنا قاراي تاپتى. ولاردان ەكى موگۋلشىمىز – يۋليا گالىشەۆا مەن دميتري رەيحەردتەن كۇتكەن كورسەتكىشتى دامەتكەن جوقپىز. يۋليا دەمەكشى, بۇل قىزىمىز قايسىبىر كۇنى ايتقانى ءوتىپ, اتقانى جەتىپ تۇرعان تورەشىلەر تاراپىنان تارتقان داككىسىنىڭ دۇمپۋىمەن ءوزىنىڭ سپورتتى تاستايتىنىن جايىپ سالىپتى. ءبىز ونىڭ مۇنىسىن اشۋمەن ايتقان البىرت ءسوز شىعار دەپ, الاۋ كوڭىلىمىزدى الدارقاتىپ وتىرمىز. ايتپەسە, 21-گە جاڭا كەلگەن بۇل ورەندەرگە ورەدەن قولىن سوزاتىن وسكەلەڭ بيىكتەر ءالى الدا قول بۇلعايتىنداي. ازىرگە ءبىزدىڭ باعلانداردىڭ باعىندىرعان بيىگى وسىلايشا بەسىنشى ورىن بولىپ وتىر. تاعى ەكى ساڭلاعىمىز جەتىنشى ورىننان تىزگىن تارتتى. بۇلاردىڭ ءبىرىنشىسى يۋليا بولسا, ەكىنشىسى كونكيشى رومان كرەچتىڭ ەنشىسىنە جازىلدى. ادالىن ايتۋىمىز كەرەك, وسى كۇنى «ادلەر-ارەنا» تورىندە 500 مەترلىك قاشىقتىقتا اتوي سالعان بۇل جىگىتىمىز ناعىز ەرلەرگە ءتان قىلىق تانىتتى. كۆاليفيكاتسيادا جەتىنشى ورىننان كورىنگەن ول قورىتىندىسىندا دا وسى ورىندى ۇستاپ قالدى. ال تۇعىر تۇگەلدەي تاعى گوللانديالىق ۇشقىرلاردىڭ قانجىعالارىندا كەتتى. تەك سوڭعى ساتتەردە ءوزارا ورىن اۋىستىرىپ العاندارى بولماسا, الدىڭعى ەكى مەدالدىڭ تاعدىرى تەز شەشىلدى. مۇندا بۇعان دەيىن ۇدايى ءبىرىنشى بولىپ كەلگەن يان سمەەكەنس سوڭىندا ەكىنشى بولىپ قالدى. ونىڭ ورنىن ميحەل ميۋلدەر باستى. ءۇشىنشى ورىنعا ىرىكتەۋ سىناعىن التىنشى بولىپ اياقتاعان رونالد ميۋلدەر ورنالاستى. وسىنداي الىپتاردىڭ اينالاسىنان تابىلعان روماندى دا ءبىز ەندى وسال كورمەدىك. سەبەبى, ول ءوز مۇمكىندىگىنىڭ شەگىنە دەيىن بارىن سالدى. وسىلاي ساڭلاقتارىمىزدىڭ شا­ماسىن بىلگەندىكتەن شىعار, ەر­لەردىڭ 12,5 شاقىرىمدىق قاشىق­تىقتاعى سپرينتتىك بياتلونىندا 29-شى تەپكىشەكتەن تابىلعان يان ساۆيتسكيدىڭ حابارىن العاش ەستى­گەن جۋرناليست ارداق توعىموۆ مۇنى بىردەن جاپ-جاقسى جەتىستىككە بالادى. شىنىندا دا دۇنيەنىڭ ءتورت بۇرىشىنان كىلەڭ ىعاي مەن سىعاي جيىلعان جاھاندىق جارىس­تا العاشقى وتىزدىقتىڭ ىشىنە ىلىگۋدىڭ ءوزى وڭاي شارۋا بولماسا كەرەك. ال ونىمەن قابات تۇسكەن سەرگەي ناۋميك وسىنىڭ الدىنداعى مارەسىنىڭ مەجەسىنەن تابىلىپ, 58-ورىنعا تابان تىرەدى. ال بۇل جولى جۇلدەلى ۇشتىكتى ەكى فرانتسۋز جانە ءبىر چەح سپورتشىسى قۇرادى. اتاپ ايتقاندا, وليمپيادا التىنىن فرانتسۋز مارتەن فۋركاد السا, قولا مەدالعا ونىڭ وتانداسى جان-گيوم بەاتريكس قول سوزدى. كۇمىس مەدال وسىلاردىڭ ورتاسىنداعى ەجەلگى موراۆيا جەرىنەن شىققان وندرجەي موراۆەتسكە بۇيىردى. ءسويتىپ, چەح جىگىتى وسىنىڭ الدىن­داعى 10 شاقىرىمدىق بياتلوندا قولا مەدال العان وتانداسىنان ءبىر بەلەس بيىككە كەتتى. جوعارىداعى ۇشتىك, سونىمەن بىرگە, الدىڭعى سايىستىڭ التىن جۇلدەگەرى نورۆەگ ولە-ەينار بورندالەندى ناگرادا شەگىنەن ءبىر ساتى سىرتقا شىعارىپ جىبەردى. بۇل كۇنگى جارىستاردىڭ باسىن شورت-ترەك بويىنشا سىنعا تۇسۋشىلەر باستاپ ەدى. وندا كانا­دالىق شارل املەن الدىنا جان سالمادى. ەكىنشى ورىنعا قىتاي تيانيۋ حان ورنىعىپ, ءوز ەلىنە ازىرگە ءبىرىنشى جانە سوڭعى ماراپاتتى الىپ بەرسە, رەسەيلىك ۆيكتور ان ءوز قۇراماسىنىڭ قورجىنىنا كەزەكتى قولا مەدالدى سالدى. جالپى سانى 36 ساڭلاق قىرمانىنا قيقۋ قوسقان بۇل بايگەدە ءبىزدىڭ ايدار بەكجانوۆ – 29-شى, ال دەنيس نيكيشا 31-ءشى ناتيجە كورسەتتى. بۇل كۇنى ءبىر جارىس اياقتالماي قالدى. دالىرەگى, ايەلدەردىڭ شانا سپورتى بويىنشا جارىسىنىڭ العاشقى ەكى كەزەڭى عانا وينالدى. ونىڭ سوڭعى ءۇشىنشى جانە ءتورتىنشى جۇگىرىستەرى كەشە تۇندە جاسالدى. ادەپكى كۇننىڭ ەكى سىناعى نەگىزىندە 29-ورىنعا قونىس تەپكەن ەكاتەرينا اكسەنوۆا اتتى قىزىمىزدان دا ەندى تابىس كۇتە الماساق كەرەك. سەرىك ءپىرنازار, «ەگەمەن قازاقستان» – سوچيدەن.