قالىپتى تارتىپپەن جۇمىس ىستەۋدە

قازاقستان تەڭگەسىنىڭ ۆاليۋتا باعامىنا قاتىستى وزگەرىسى جونىندەگى حابار قۇلاعىمىزعا تيىسىمەن, وبلىس ورتالىعى كوكشەتاۋدا ورنالاسقان ەكىنشى دەڭگەيلى بانكتەردى تۇگەل دەرلىك ارالاپ شىققانبىز. قارجى مينيسترلىگى مەن ۇلتتىق بانك باسشىلارىنىڭ استانا جانە الماتى قالالارىندا وتكىزگەن بريفينگتەرىندە اقش-تىڭ 1 دوللارىن 185 تەڭگەدەن ارتىق ساتۋعا بولمايتىندىعى ايتىلعانىمەن, اركىم وزىنشە ات ايدايتىن احۋال بايقالدى. ماسەلەن, «كازكوممەرتسبانك­تىڭ» كوكشەتاۋداعى فيليالىنىڭ كورسەتكىش تاقتاسىندا دول­لار­دىڭ 189 تەڭگەگە ساتىلاتى­نى,­ ال ءبىر دوللاردى 181 تەڭ­گە­دەن ساتىپ الاتىندىعى جازىلىپ قويىلىپتى. بىراق, بۇل­ تاقتا كادۋىلگىدەي دالادا, جۇرت­ كوزىنە تۇسەتىندەي جەردە ەمەس, عيماراتتىڭ ىشكى جاعىنا اۋىس­تى­رىلعان. «بتا بانك» 1 دوللاردى 182 تەڭ­گەدەن ساتىپ الىپ, 188 تەڭ­گەدەن ساۋدالاپ جاتىر. باس عيماراتتاعى كاسسير گاۋھار بەيسەنباەۆا بۇل باعامنىڭ ساعات 15.30-دا ءىلىپ قويىلعانىن ايتادى. سودان بەرى ونىڭ قىز­مە­تىنە ەشكىم جۇگىنبەگەن. اۋىت­قۋ­شىلىقتىڭ ءمانىسىن بىلمەك بو­لىپ ۆاليۋتالىق باقىلاۋ مە­نەدجەرى دينارا باياحينانىڭ الدىنا بارعانبىز. ايتكەنمەن, ول قانداي دا ءبىر تۇسىنىك بەرۋگە وكىلەتتىگى جوقتىعىن ايتتى. بانك ديرەكتورى وسى ماسەلە بويىنشا ۇلتتىق بانكتىڭ بولىمشەسىندەگى ماجىلىسكە كەتكەن كورىنەدى. ال, ديرەكتوردىڭ ورىنباسارى قايرات قابدىراشيتوۆ ءالى ناقتى نۇسقاۋدىڭ كەلىپ تۇسپەگەنىن الدىمىزعا تارتتى. جالپى, ونىڭ پايىمى بۇگىنگى وزگەرىسكە قاتىستى تىرەك دەڭگەيى بار, ءبىز ونى بۇزىپ وتىرعان جوقپىز دەگەنگە كەلەدى. دەمەك, كوكشەتاۋ قالاسىنداعى – 3, اۋداندارداعى 6 اقشا ايىرباس­تاۋ پۋنكتى وسى تارتىپپەن جۇمىس ىستەپ جاتقانى انىق. «تسەسنابانك» فيليالىندا دوللارعا قاتىستى بۇل باعام ساتىپ الۋ – 185,5, ساتۋ 188 تەڭگەدەن بولىپ شىقتى. اقپاراتتىق تاقتا وسىلاي دەپ تۇرعانىمەن كاسسير گۇلميرا ءاشىموۆا ءوز ورنىندا ەمەس, جالپى كاسسادا جۇمىس ىستەپ وتىرعانى تاڭعالدىرادى. بانككە كىرەبەرىستەگى ريزا اتتى مەنەدجەر قىزدان باسشىلاردىڭ ەشقايسىسى ورنىندا ەمەستىگىن بىلدىك. بانكتەردىڭ قۇدايعا قاراعانى «نۇر بانك» بولىپ شىقتى. ولار اقش اقشاسىن 183,5 تەڭگەگە ساتىپ الىپ, 185,5 تەڭگەگە ساۋدالاپ وتىر. ال, «تەمىربانك» پەن «پوشتابانكتىڭ» اقپاراتتىق تاقتالارى بوس تۇر. كوكشەتاۋداعى جەكەمەنشىك اقشا ايىرباستاۋ پۋنكتتەرىنىڭ دەنى ورتالىق بازار اۋدانىندا ورنالاسقان. كوبىسى جابىق تۇر. «ۆاۆيلون» دۇكەنىندەگى پۋنكت­تەن دوللاردى 185 تەڭگەگە وتكىزىپ, 187 تەڭگەدەن ساتىپ الۋعا بولاتىنىن بىلدىك. ال, «استانا» دۇكەنىندەگى اتىن ايتۋدى قالاماعان مەنشىك يەسى 1 دوللاردى 185 تەڭگەدەن ساتىپ الىپ, 189 تەڭگەدەن ساتۋ نيەتىندە ەكەن. بىراق, باعام اۋىسقان بويدا تۇراقتى كليەنتتەردىڭ ءوزى كەلمەي قويعانىن ايتادى. «ريو» ساۋدا, ويىن-ساۋىق ورتا­لىعىنداعى ايىرباس­تاۋ پۋنك­تىن­دەگىلەر دوللاردى 170 تەڭگەدەن دە ساتا الماي وتىرعاندىعىن مالىمدەدى. «شىعىنعا باتاتىن بولدىق» دەگەندى دە ايتىپ جاتىر. باقبەرگەن امالبەك, «ەگەمەن قازاقستان». اقمولا وبلىسى.