اقتوتى رايىمقۇلوۆا قازاقستان مەن قىرعىزستان اراسىنداعى قارىم-قاتىناستاردىڭ تامىرى تەرەڭدە ەكەنىن, تاۋەلسىزدىك العان جىلدارى جاڭاشا قارقىنمەن دامىپ كەلە جاتقانىن, حالىقتار اراسىنداعى ءداستۇرلى باۋىرلاستىق بايلانىستار بارلىق باعىتتا دايەكتى تۇردە دامۋ ۇستىندە ەكەنىن ايتتى.
«قىرعىزستاننىڭ كوپتەگەن تانىمال كينەماتوگرافيسىنىڭ شىعارماشىلىعى قازاقستانمەن, اتاپ ايتقاندا, شاكەن ايمانوۆ اتىنداعى «قازاقفيلم» كينوستۋدياسىمەن تىعىز بايلانىستى ەكەنىن ءبارىمىز بىلەمىز. 1968 جىلى جاس رەجيسسەر بولوت شامشيەۆ حالقىمىزدىڭ زاڭعار جازۋشىسى مۇحتار اۋەزوۆتىڭ «قاراش اسۋىنداعى اتىس» تۋىندىسى جەلىسىندە فيلم ءتۇسىرىپ, وسى ءبىر كەرەمەت جۇمىسىمەن كورەرمەندەردىڭ جوعارى باعاسىن الدى. سونىمەن قاتار بولوت شامشيەۆ تۇسىرگەن قازاق حالقىنىڭ قايسار قىزى, كەڭەس وداعىنىڭ باتىرى ءاليا مولداعۇلوۆانىڭ ەرلىگىن ارقاۋ ەتكەن «مەرگەندەر» ءفيلمى قازاق كينەماتوگرافىنىڭ التىن قورىنا قوسىلدى. بۇل كينو كۇنى بۇگىنگە دەيىن ەكراننان تۇسپەي كەلەدى. ايتا بەرسەك, مۇنداي مىسالدار وتە كوپ. قىرعىزستاندا قازاق كينوسىنىڭ كۇندەرىن ۇيىمداستىرۋ ءبىزدىڭ ەلدەرىمىزدىڭ اراسىنداعى كينويندۋستريا سالاسىنداعى ءوزارا بايلانىستىڭ بىرلەسىپ وركەندەۋى مەن دامۋىنا سەرپىن بەرەتىنىنە سەنىمدىمىن», دەدى مينيستر.
ايتا كەتەيىك, «ماناس» كيونوتەاترىندا باستالعان قازاق كينوسىنىڭ كۇندەرى 9 قازانعا دەيىن جالعاسادى. كورەرمەندەر نازارىنا رۇستەم ابدىراشەۆتىڭ «الماس قىلىش», اقان ساتاەۆتىڭ «توميريس», «جاۋ جۇرەك مىڭ بالا», «اناعا اپارار جول», «قازاق حاندىعى». «التىن تاق» فيلمدەرى مەن تۇردىبەك مايدان مەن تىلەك تولەۋعازىنىڭ «مۇزبالاق», اداي ءابىلدينوۆتىڭ «كۇلتەگىن» انيماتسيالىق ءفيلمى ۇسىنىلادى.
