شاراينا

شۆەيتساريا ميگرانتتارعا قارسى

شۆەيتساريادا جەكسەنبى كۇنى ميگرانتتاردىڭ ەلگە كەلۋىن شەكتەۋ تۋرالى رەفەرەندۋم وتكەن ەدى. ناتيجەسىندە رەسپوندەنتتەردىڭ 50,3 پايىزى شەكتەۋدى جاقتاپ داۋىس بەردى. بۇل – داۋىستاردى ساناۋدىڭ الدىن الا جاسالعان ناتيجەسى.

اقپاراتتارعا قاراعاندا, ميگرانت­تاردىڭ كەلۋىن شەكتەۋدى نەگىزىنەن جەرگىلىكتى سەلولاردىڭ تۇرعىندارى قولداعان. ويتكەنى, ولار ميگرانتتاردىڭ كەلۋى سالدارىنان باعا قىمباتتايدى, سونداي-اق, بۇدان دەنساۋلىق ساقتاۋ سالاسى زارداپ شەگەدى دەپ ەسەپتەيدى. رەفەرەندۋمعا قالا تۇرعىندارى قارسى داۋىس بەرگەن. وسىنداي رەفەرەندۋم وتكىزۋ جونىندەگى باستامانى شۆەيتساريانىڭ حالىق پارتياسى كوتەرگەن بولاتىن. ال ەۋروپالىق وداققا شۆەيتساريا مۇشە ەمەس ەكەندىگىن ايتا كەتەيىك.

ۋكراينالىققا رەسمي ايىپ تاعىلدى

جەتىنشى اقپاندا حاركوۆتەن ىستامبۇلعا ۇشىپ كەلە جاتقان ۇشاقتى باسىپ الماق بولعان ۋكراينا ازاماتىنا رەسمي ايىپ تاعىلدى. تۇركيا پوليتسياسىنىڭ حابارلاۋىنشا, ودان جاۋاپ الىنعاننان سوڭ قاماۋعا الىنعان.

تۇركيا ەلىنىڭ زاڭنامالارى بويىنشا, اۋە كەمەسىن باسىپ الۋعا ارەكەتتەنگەندەر كەمىندە 20 جىلعا سوتتالادى. وقيعا 7 اقپان كۇنى كەشكىسىن ۇشاق بورتىندا بولعان ەدى. بورتىندا 110 جولاۋشى بار ۇشاق ءوز باعىتىمەن ۇشىپ كەلە جاتقاندا, ۋكراينالىق ماس ازامات ءوزىن ۇشقىشتار كابيناسىنا كىرگىزۋىن جانە اۋە كەمەسىن وليمپيا ويىندارىنىڭ اشىلۋ سالتاناتى ءوتىپ جاتقان سوچي قالاسىنا بۇرۋىن تالاپ ەتكەن عوي. مۇنىمەن قويماي ول ۇشاقتى جارامىن دەپ تە قورقىتىپتى. ال ول حاركوۆ قالاسىنىڭ 45 جاستاعى تۇرعىنى ارتەم كوزلوۆ دەگەن بولسا كەرەك.

بۇرىنعى باس پروكۋروردى اتىپ كەتتى

ليۆيانىڭ بۇرىنعى باس پروكۋرورى ابدەلازيز ال-حاسادي اتىپ ءولتىرىلدى. ول ءوزىنىڭ تۋعان قالاسى – دەرناداعى تۋىستارىنا كەلگەن كەزدە وققا ۇشقان. وعان جاسالعان قاستاندىق جاۋاپكەرشىلىگىن قازىرگە ەشكىم موينىنا العان جوق.

ال-حاسادي 2011 جىلى مۋاممار كاددافي بيلىكتەن تايدىرىلىپ, ولتىرىلگەن سوڭ, ەلدىڭ باس پروكۋرورى قىزمەتىنە وتىرعان ەدى. 2013 جىلى دەنساۋلىق جاعدايىنىڭ ناشارلاۋىنا بايلانىستى بۇل قىزمەتتەن وتستاۆكاعا كەتكەن. ليۆيادا جوعارى لاۋازىمدى شەنەۋنىكتەردى ءولتىرۋ ەتەك الىپ بارا جاتقانداي. مىسالى, وسى جىلدىڭ قاڭتارىندا ەلدىڭ ىشكى ىستەر ءمينيسترى مەن ونەركاسىپ ءمينيسترىنىڭ ورىنباسارىنا قاستاندىق جاسالدى.

قىسقا قايىرىپ ايتقاندا:

● رەسەيلىك بۇقارالىق اقپارات قۇرالدارى بۇرىنعى قورعانىس ءمينيسترى اناتولي سەرديۋكوۆقا 2012 جىلى رەسەي باتىرى اتاعىنىڭ بەرىلگەنىن حابارلادى. بۇل اتاق وعان قۇپيا جارلىقپەن بەرىلسە كەرەك. ● بوسنيا مەن گەرتسەگوۆينيا استاناسى ساراەۆودا وسىنىڭ الدىنداعى جاپپاي قارسىلىق اكتسياسى كەزىندە ۇستالعانداردى بوساتتى. ● كاليفورنيادا جول-كولىك وقيعاسى كەزىندە التى ادام مەرت بولدى. اپات ءبىر اۆتوكولىكتىڭ قارسى جولعا شىعىپ كەتۋىنەن ورىن العان.  

قالىڭ قار ابىگەرگە سالۋدا

جاپونيانىڭ جەرگىلىكتى NHK تەلەارناسىنىڭ حابارلاۋىنشا, ەل اۋماعىنا قالىڭ قار ءتۇسۋىنىڭ سالدارىنان جەتى ادام قازا تاۋىپ, ءبىر مىڭعا جۋىق تۇرعىن ءتۇرلى جاراقات العان. اقپاراتقا قاراعاندا, قازا تاپقانداردىڭ ولىمىنە جول-كولىك وقيعالارى سەبەپ بولعان.

زارداپ شەككەندەردىڭ كوپشىلىگى جاراقاتتاردى مۇز باسقان جاياۋ جۇرگىنشىلەر جولدارىندا تايىپ قۇلاعاننان العان كورىنەدى. قالىڭ قاردان, سونداي-اق, بىرقاتار پرەفەكتۋرالاردا 20 مىڭنان استام ءۇي ەلەكتر جارىعىنسىز قالىپ وتىر. بۇلاردان بولەك, بيلىك 300 اۆيارەيستىڭ ۇشۋ ۋاقىتىن اۋىستىرۋعا تۋرا كەلىپتى. بۇل ەلدە قار وتكەن سەندى كۇنى جاۋا باستاعان ەكەن. مۇنداي قالىڭ قار جاپونيادا سوڭعى 45 جىلدان بەرى تۇسپەپتى.

ىزدەۋدەگى ەسىرتكى بارونى ۇستالدى

مەكسيكا پوليتسياسى «ەسىرتكى بارونى» دەپ ايىپتالىپ, اقش بيلىگى تاراپىنان ىزدەستىرۋدە جۇرگەن تيرسو سانچەستى قولعا ءتۇسىردى. ول مەكسيكانىڭ گۋاناحۋاتو شتاتىندا ۇستالعان.

اقش-تىڭ مەملەكەتتىك دەپار­تامەنتى كۇدىكتىنىڭ تۇرىپ جاتقان جەرى تۋرالى اقپارات بەرگەن ادامعا 5 ميلليون دوللار بەرۋگە ۋادە ەتكەن كورىنەدى. ۆەدومستۆو بۇل قارجىنى بەرگەنى جونىندە اقپارات جوق. ال اقش بيلىگى سانچەس 2000-2003 جىلدارى ارالىعىندا اقش اۋماعىنا 76 توننا كوكاين جەتكىزۋدى ۇيىمداستىردى دەگەن كۇدىك كەلتىرەدى. سونىمەن بىرگە, سانچەستى كولۋمبيا قۇقىق قورعاۋ ورگاندارى دا ىزدەستىرىپ جاتقان ەكەن.

كەمەلەرىن نە ءۇشىن اتتاندىردى؟

يران ۇكىمەتى وزدەرىنىڭ بىرنەشە اسكەري كەمەسىن اتلانت مۇحيتىنداعى اقش-تىڭ تەڭىزدەگى شەكاراسىنا اتتاندىردى. بۇل جونىندە «رەيتەر» اگەنتتىگى حابارلادى.

يراننىڭ سولتۇستىك فلوتىنا قولباسشىلىق ەتەتىن ادميرال افشين رەزاي حاددات وسى تۋرالى: «يراننىڭ اسكەري فلوتى اقش-تىڭ تەڭىزدەگى شەكاراسىنا جاقىنداپ كەلەدى. بۇل شارانىڭ وزىندىك ەرەكشەلىگى بار», – دەپ تۇسىنىك بەرگەن ەكەن. كەيبىر ساياساتكەرلەر مۇنى اقش اسكەري تەڭىز كۇشتەرىنىڭ پارسى شىعاناعىنا قاتىسۋىن كۇشەيتۋ دەپ ەسەپتەيدى. يران تارابى قانشا اسكەري كەمە جانە قانشا ادام اتتاندىرعانىن قۇپيا ساقتاپ وتىر. ايتا كەتەيىك, باحرەيندە ورنالاسقان اقش-تىڭ بەسىنشى فلوتىنىڭ كەمەلەرى قازىرگى كەزدە پارسى شىعاناعىندا كەمەلەردىڭ ەركىن ءجۇرۋىن قامتاماسىز ەتۋ ءۇشىن تۇراقتى قىزمەت ەتىپ ءجۇر.

ينتەرنەت ماتەريالدارى نەگىزىندە ازىرلەندى.