ءوز سوزىندە سەنات سپيكەرى مەيمانعا سەزد حاتشىلىعىنىڭ ءحىح وتىرىسىنا قاتىسقانى ءۇشىن العىس ءبىلدىرىپ, فورۋمنىڭ نەگىزگى ماقساتتارى يسلام الەمىنىڭ وڭ پىكىرى مەن قولداۋىنا يە بولعانىن اتاپ ءوتتى.
«ۋاقىت وتكەن سايىن سەزدىڭ حالىقارالىق ارەناداعى ماڭىزى ارتىپ كەلەدى. الداعى ۋاقىتتا نۇر-سۇلتان قالاسىنداعى دىنارالىق ديالوگ بەيبىتشىلىكتى, كەلىسىمدى جانە ىنتىماقتاستىقتى حالىقارالىق دەڭگەيدە قامتاماسىز ەتۋدىڭ ماڭىزدى فاكتورى رەتىندە ءوز ءرولىن اتقارا بەرەدى دەپ سەنەمىز», دەدى ماۋلەن اشىمباەۆ.
سونىمەن قاتار سۇحباتتاسۋشىلار پاندەمياعا بايلانىستى قاجىلىق جاساۋ كەزىندە تۋىندايتىن قيىندىقتاردى تالقىلادى. سەنات توراعاسى پاندەميادان كەيىنگى كەزەڭدە جاعداي تۇراقتالىپ, قازاقستان ازاماتتارى وزدەرىنىڭ ءدىني پارىزدارىن وتەۋگە قايتادان مۇمكىندىك الارىنا ۇمىتتەنەتىنىن جەتكىزدى.
ءىس-شارا سوڭىندا ماۋلەن اشىمباەۆ دۇنيەجۇزىلىك يسلام ليگاسىنىڭ باس حاتشىسىنا 2022 جىلعى قىركۇيەك ايىندا قازاقستان استاناسىندا وتەتىن الەمدىك جانە ءداستۇرلى دىندەر ليدەرلەرىنىڭ VII سەزىنە قاتىسۋ ءۇشىن شاقىرۋ جولدادى.
