«زاۋىتتىڭ تابىستى جۇمىسى – قازاقستان مەن فرانتسيانىڭ جەمىستى ىنتىماقتاستىعىنىڭ جارقىن مىسالى. «قتج» ۇك» اق – زاۋىتتىڭ نەگىزگى تاپسىرىس بەرۋشىسى. 2029 جىلعا دەيىن زاۋىتتا ءبىزدىڭ تاپسىرىسىمىز بار. بۇل كاسىپورىننىڭ تۇراقتى جۇمىس ىستەي الاتىنىن كورسەتەدى. قازاقستاندا جينالعان لوكوموتيۆتەر, 1 520 جولتاباندى كەڭىستىكتەگى ەڭ وزىقتارى. بۇگىن قول قويىلعان كەلىسىم ءبىزدىڭ قارىم-قاتىناسىمىزدى تەرەڭدەتەدى جانە ونى جاڭا جاعدايدا دامىتۋعا مۇمكىندىك بەرەدى», دەدى ق.الماعامبەتوۆ.
2029 جىلعا دەيىن زاۋىت 369 ەلەكتروۆوز, ونىڭ ىشىندە 250 جۇك جانە 119 جولاۋشى تاسىمالدايتىن ەلەكتروۆوز شىعارادى. بۇگىنگى تاڭدا قازاقستاندىق زاۋىت كونۆەيەرىنەن 95 جۇك جانە 27 جولاۋشىلار ەلەكتروۆوزى شىقسا, سونىڭ ىشىندە 24 جۇك لوكوموتيۆى ازەربايجانعا ەكسپورتتالدى. ماشينا 9 مىڭ تونناعا دەيىن تارتۋعا قابىلەتتى, -50-دەن +50 س دەيىنگى تەمپەراتۋرادا جۇمىس ىستەۋگە ارنالعان. ەلەكتروۆوز كابيناسىندا بريگادا جۇمىسى ءۇشىن قولايلى جاعدايلار جاسالعان.
گيوم تريتتەردىڭ ايتۋىنشا, قازاقستاندا Alstom ءوندىرىستى لوكاليزاتسيالاۋدى ۇلعايتادى.
«ەگەر 9 جىل بۇرىن, زاۋىت قۇرىلعان جىلى جەرگىلىكتى قامتۋ 4 پايىزدى عانا قۇراسا, بۇگىندە ءبىز ءوز ءوندىرىسىمىزدى جەرگىلىكتەندىرۋ دەڭگەيىن دامىتا وتىرىپ, 30 پايىزعا جەتكىزدىك. بۇل زاۋىتقا ەۋروپالىق تەحنولوگيانى بەرۋدىڭ جانە تارتۋ ترانسفورماتورلارىن شىعارۋدى ۇيىمداستىرۋ ارقىلى مۇمكىن بولدى», دەدى ول.
سونىمەن قاتار وسى جىلدىڭ جازىندا زاۋىت قازاقستاندا تولىق قۇراستىرىلعان العاشقى جولاۋشىلار لوكوموتيۆىن شىعاردى. زاۋىتتا 850 ادام ەڭبەك ەتسە, سونىڭ 95%-ى – جەرگىلىكتى كادرلار.
