ءوز كەزەگىندە بيزنەس وكىلدەرى اتالعان سالانى دامىتۋدىڭ جولدارىن ۇسىندى. ولاردىڭ پىكىرىنشە قولونەرشىلەردىڭ بىرلەسكەن جوبالارى قولعا الىنىپ, قالانىڭ وزىندىك برەندى قالىپتاسۋى كەرەك.
تۋريزم, سىرتقى بايلانىستار جانە كرەاتيۆتى يندۋستريا باسقارماسىنىڭ باسشىسى بەكسۇلتان ءادىلحانوۆ ناقتى كورسەتكىشتەر مەن جۇزەگە اسىپ جاتقان جوبالارعا توقتالىپ, شىمكەنتتە 2 439 ازامات كرەاتيۆتى يندۋستريا سالاسىندا كاسىبىن دوڭگەلەتىپ وتىرعانىن مالىمدەدى.
«سالاداعى كاسىپكەرلەردەن تۇسكەن سالىق كولەمى 4,8 ملرد تەڭگەنى قۇراپ, الدىڭعى جىلمەن سالىستىرعاندا 500 ملن تەڭگەگە ارتقان. 2025 جىلى اشىلعان «Shymkent Creative Hub» كرەاتيۆتى حابىندا قولونەرشى, ديزاينەر, زەرگەرلەر جانە سۋرەتشىلەر مەن كينوستۋديالار بەلسەندى جۇمىس اتقارىپ, 141 ءىس-شارا ۇيىمداستىردى. سونىمەن قاتار قالادا جارمەڭكە, بايقاۋ, فورۋمدار مەن كورمەلەر وتكىزىلىپ, كرەاتيۆتى ونىمدەردى نارىققا شىعارۋعا جانە ودان پايدا تابۋعا جاعداي جاسالىپ جاتىر. ال بيىل كرەاتيۆتى يندۋستريا كاسىپكەرلەرى اراسىندا مەگاپوليستىڭ دامۋىنا ارنالعان قىسقامەتراجدى فيلمدەر بايقاۋىن وتكىزۋ جوسپاردا بار», دەدى ب.ءادىلحانوۆ.
جيىندا سونداي-اق مەملەكەت باسشىسىنىڭ تاپسىرماسىمەن قۇرىلعان «كرەاتيۆتى يندۋستريا قورىنىڭ» قىزمەتى تۋرالى دا اقپارات بەرىلدى. قور اياسىندا كرەاتورلاردىڭ بىرىڭعاي تسيفرلى ءتىزىلىمى ازىرلەنىپ, 2026 جىلدان باستاپ ارنايى پلاتفورما ارقىلى جوبالاردى ىرىكتەۋ مەن قارجىلاندىرۋ تەتىكتەرى ىسكە قوسىلماق. جالپى قور تاراپىنان قولداۋدى تەك رەسمي تىركەلگەن كرەاتورلار عانا الا الادى.
