5 قازان كۇنى كەشكى 19:27-دە كەزەكشى پۋلتىنە ماحامبەت اۋدانى, ورتاقشىل اۋىلى, جاسكەلەنوۆ كوشەسىندەگى ءۇيدىڭ اۋلاسىنا جينالعان 22 دانا بۋما ءشوپ جانىپ جاتقانى تۋرالى حابار كەلىپ ءتۇستى.
«وقيعا ورنىنا №11 ءوسب-ءنىڭ ءورت سوندىرۋشىلەرى 19 ساعات 45 مينۋتتا جەتتى. ءورت 23 ساعات 07 مينۋتتا تولىعىمەن سوندىرىلگەن. الايدا, 6 قازان كۇنى 00 ساعات 02 مينۋتتا ماحامبەت اۋداندىق پوليتسيا بولىمىنەن ورتاقشىل اۋىلىندا كامەلەت جاسىنا تولماعان ءۇش بالانىڭ بەلگىسىز جاعدايدا جوعالعانى تۋرالى حابارلاما كەلگەن. ىزدەستىرۋ جۇمىستارىنا تجد 11 قىزمەتكەرى, 3 بىرلىك تەحنيكاسى, 2 كينولوگيالىق ەسەپ, پوليتسيا دەپارتامەنتى قىزمەتكەرلەرى مەن اۋىل تۇرعىندارى جۇمىلدىرىلعان. جوعالعان 2014 جىلعى ەكى بالا مەن 2012 جىلعى ءبىر بالانىڭ دەنەسى ورتەنگەن ءشوپتىڭ اراسىنان تابىلدى. ولاردىڭ دەنەسى پد قىزمەتكەرلەرىنە تاپسىرىلىپ, سوت-مەديتسينالىق ساراپتاماسى تاعايىندالدى», دەلىنگەن تجم حابارلاماسىندا.
ۆەدومستۆو ءورت قاۋىپسىزدىگى شارالارىن قاتاڭ ساقتاۋ كەرەك ەكەنىن, سول سياقتى بالالاردى قاراۋسىز قالدىرماۋ قاجەت ەكەنىن ەسكەرتتى.
