اقمولالىق ديقاندار استىقسىز ەمەس

الدىن-الا جاسالعان ەسەپكە قاراعاندا, گەكتار بەرەكەسى 8,6 تسەنتنەردەن اينالۋدا. كوكتەمنىڭ قامىن كۇزدە ويلايتىن ديقاندار 529,8 مىڭ توننا ساپالى تۇقىمدى قامبالارىنا قۇيىپ الدى. بۇل قاجەتتى كورسەتكىشتىڭ 91,6 پايى­زى. كۇزگى دالا جۇمىستارىنا تيا­ناقتى دايىندالعان ەسىل اۋدا­نى­نىڭ ديقاندارى وبلىستا ەگىن ورا­عىن ءبىرىنشى بولىپ اياقتادى. اۋدان اكىمىنىڭ ورىنباسارى اس­قار­­بەك ماقسىمحاننىڭ ايتۋىنا قا­­راعاندا, اۋدان ديقاندارى 438,2 مىڭ گەكتار القاپتان 306,7 مىڭ توننا التىن استىق جيناپ العان.

– گەكتار بەرەكەسى 7 تسەنتنەر­دەن اينالدى. بيىلعىداي قۋاڭشىلىق جىلى تاۋبە دەرلىك, – دەيدى اۋدان اكىمىنىڭ ورىنباسارى, – كوكتەمگى ەگىسكە قاجەتتى 45,5 مىڭ توننا تۇقىم تازارتىلىپ, قامباعا قۇ­يىل­دى. اۋداندا «زارەچنىي» جانە «نوۆو-پريرەچنىي» سەرىك­تەس­تىكتەرى جاۋاپتى ناۋقاندى العاش­قىلاردىڭ ءبىرى بولىپ تاپ-تۇيناقتاي ەتىپ اياقتاپ شىقتى. بۇل سەرىكتەستىكتەردىڭ ارقايسىسى 30 مىڭ گەكتار القاپقا ەگىلگەن ءداندى جانە بۇرشاق داقىلدارىن جيناپ الدى.

بۇگىندە ەڭبەك مايدانىنىڭ ەكپىنى قىزىل قىرمانعا اۋعان. ديقاندار ءداندى داقىلدار جينالىپ الىنعان القاپتاردا جەر وڭدەۋ جۇمىستارىن باستاپ كەتتى. ءبىر ايتا كەتەرلىگى, قاۋقارى مول سەرىك­تەستىكتەر الەۋمەتتىك جاعى­نان از قامتىلعان وتباسىلارىن قىسقا قاجەتتى مال ازىعىمەن تو­لىق قامتاماسىز ەتتى. بۇل جۇمىس­قا اۋدانداعى وتىزعا جۋىق ءىرى سەرىكتەستىكتەر مەن جۇزدەن استام شارۋاسى شيراق قوجالىقتار ءبىر كىسىدەي اتسالىسقان.

ەرەن ەڭبەگىمەن تانىلعان ەسىل­دىك­تەردىڭ وكشەسىن جارقايىڭ, ات­باسار اۋدانىنىڭ ديقاندارى دا باسىپ كەلەدى. ايتالىق, جەرى قۇنارلى جارقايىڭ اۋدانىنىڭ ەگىستىك القابى – 615,7 مىڭ گەك­تار. وبلىستاعى ەڭ ءىرى اۋدان سانا­تىندا. بۇل اۋداندا دا ەڭ­بەك ەكپىنى وزگەلەرگە ۇلگى بولار­لىق­تاي. بۇگىنگە دەيىن بارلىق ەگىس ال­قابىنداعى 588 مىڭ گەكتار جەردىڭ ءونىمى جينالىپ, 294 مىڭ توننا استىق قىرماندارعا جەتكىزىلدى. ما­شينا-تراكتور پاركىن ءبىرشاما جاڭعىرتۋ ارقىلى ەڭبەك ونىمدىلىگى دە جوعارى. اشىق كۇندەرى 20 مىڭ گەكتارعا جۋىق القاپ ورىلادى. گەكتار بەرەكەسى ورتاشا ەسەپپەن 7,5 تسەنتنەردەن اينالۋدا. كوك­تەمگى ەگىسكە قاجەتتى 63 مىڭ توننا تۇقىمنىڭ 95,2 پايىزى قامباعا قۇيىلدى.

اتباسارلىق ديقاندار بيىل 373,4 مىڭ گەكتار جەرگە ءداندى دا­قىلدار تۇقىمىن سىڭىرگەن بو­لا­تىن. كۇننىڭ ءاربىر اشىق ءسا­تىن ءتيىمدى پايدالانعان اۋدان ديقان­دارى بارلىق القاپتىڭ 95 پايىزىن جيناپ الدى. جەردە ونگەندى جەردە قالدىرماۋعا تىرىسقان ەڭ­بەككەرلەر 265,6 مىڭ توننا استىق باستىردى. بۇل اۋداندا دا گەكتار بەرەكەسى 7,5 تسەنتنەردەن اينالۋدا. قاجەتتى تۇقىمنىڭ تولىق قورى جاسالدى.

ساندىقتاۋ اۋدانىنىڭ دي­قان­­دارى قۋاڭشىلىق جىل­دىڭ وزىن­دە دە ءتاپ-ءتاۋىر ءونىم ءوسىر­دى. اۋدان­داعى 306,4 مىڭ گەك­تار ال­قاپتا وسىرىلگەن ءداندى داقىل­دار­دىڭ 91,6 پايىزى جينالدى. وز­گە اۋداندارعا قاراعاندا بيىل ساندىقتاۋدىڭ ىرىسى ءبىرشاما مول ەكەنىن ايتا كەتەلىك. گەكتار بەرەكەسى 12,7 تسەنتنەردەن اينالۋدا. اۋدانداعى «بەلگرادسكوە», «USاگرو» سەرىكتەستىكتەرى مەن «ليۋبيموۆى» شارۋا قوجالىعى ەگىن وراعىن ەرتە اياقتادى. ءداندى داقىلدار القاپتارىنىڭ كەي تۇسىنداعى ءتۇسىم دە جوعارى. ايتا­لىق, «بەلگورودسكوە» سەرىكتەستىگى 17,5, «سۆوبودنوە» سەرىكتەستىگى 20, «ماكسيموۆكا» سەرىكتەستىگى 21,2 تسەنتنەردەن ءونىم جينادى.

كورسەتكىشتەرگە كوڭىل اۋدار­ساڭىز, ءبىر القاپتىڭ جومارت, ءبىر ال­قاپتىڭ ساراڭ ەكەندىگىن باي­قايسىز. توپىراق قۇرامى, تابي­عاتى بىركەلكى وڭىردەگى ءونىم كولەمى ارقيلى. دەمەك جەر دە ءتىلىن تاپ­قانعا يەدى-اۋ.