سىناققا تاجىريبە الماسۋ ءۇشىن ەكىنشى رەت بەلارۋس رەسپۋبليكاسىنىڭ ارنايى جاساعىنىڭ ماماندارى كەلدى.
كۆاليفيكاتسيالىق سىناقتار جىل سايىن ەلىمىزدىڭ ءار ءتۇرلى كليماتتىق جاعدايىندا وتەدى جانە ەكى كەزەڭنەن تۇرادى. وسى جولى ەلىمىزدىڭ بارلىق وڭىرىنەن كەلگەن كۇرەڭ بەرەت كيۋگە ۇمىتكەر 350 اسكەري قىزمەتشى كۆاليفيكاتسيالىق سىناق تاپسىرۋعا ىنتا تانىتسا, ولاردىڭ تەك 73-ءى عانا اقتىق سىنعا جىبەرىلدى.
العاشقى اينالىمدا ۇمىتكەرلەر ارنايى جابدىقتارمەن كەدەرگىلەر ارقىلى 25 شاقىرىمدى ءوتىپ, 13 ءنورماتيۆتى تاپسىرا جۇگىردى. ولاردىڭ ىشىندە سۋلى ايماقتى كەسىپ ءوتۋ, پراكتيكالىق اتىس جۇرگىزۋ سەكىلدى سىناقتار بولدى. ال ەمتيحاننىڭ شارىقتاۋ شەگى, ياعني, سوڭعى كەزەڭىندە ۇمىتكەرلەر ءۇش كۇرەڭ بەرەت يەگەرىمەن توعىز مينۋت كولەمىندە جەكپە-جەككە ءتۇسۋى كەرەك بولدى. تەك وسىدان مۇدىرمەي وتكەندەر عانا سىناقتى ءساتتى ورىنداپ شىققان بولىپ ەسەپتەلەدى.
بيىلعى سىناقتىڭ قورىتىندىسى بويىنشا 14 جاۋىنگەر عانا مارەگە دەيىن جەتىپ, كۇرەڭ بەرەت يەگەرى اتاندى. كۆاليفيكاتسيالىق سىناقتاردىڭ قورىتىندى كەزەڭى جانە سىناقتان وتكەن جاۋىنگەرلەرگە «بۇركىت» ارنايى ماقساتتاعى ءبولىنىسىنىڭ سيمۆولىن سالتاناتتى تاپسىرۋ شاراسىنا ۇلتتىق ۇلان باس قولباسشىلىعى جانە بەلارۋس رەسپۋبليكاسىنىڭ ارنايى جاساعىنىڭ وكىلدەرى قاتىستى.
ايتا كەتەيىك, ارنايى ماقسات جاۋىنگەرى ءۇشىن كۇرەڭ بەرەت – شەبەرلىكتىڭ بيىك فورماسى بولىپ تابىلادى. وعان تەك ۇزدىكتەردىڭ ۇزدىگى عانا قول جەتكىزەدى.
