حالىقتىڭ ساندىك-قولدانبالى ونەرى – الەمدىك كوركەم مادەنيەتتىڭ نەگىزى, دانالىق پەن اسەمدىكتىڭ تاۋسىلماس قاينار كوزى. سان عاسىردان بەرى جالعاسىپ كەلە جاتقان قولونەر ۇلتتىق ويۋ-ورنەك پەن قورشاعان الەمنىڭ سان قيلى بەدەرىن بەينەلەپ, تىلسىم تاريح قويناۋىنان سىر شەرتەدى. ءتۇرلى-ءتۇستى رەڭگە بويانعان اسەمدىك پەن كوركەم شەبەرلىكتىڭ ادەمى ۇلگىلەرى ۇسىنىلعان كورمە كوپشىلىك نازارىن وزىنە اۋداردى. اسىلىندا, ۇلتتىق سالت-ءداستۇر مەن ادەت-عۇرىپتى ەسكە سالۋىمەن قۇندى. وبلىس اۋداندارىنان كەلگەن قولونەر شەبەرلەرى كوز مايىن تاۋىسىپ جاساعان تاماشا تۋىندىلارىمەن تانىستىردى. قايتا جاڭعىرعان كونەنىڭ كوزى الاش جۇرتىنىڭ ىقىلىم زاماننان بەرى ونەردى سەرىك ەتكەندىگىن اڭعارتادى.
– كورمەگە 11 اۋدان مەن ءۇش قالانىڭ قولونەر شەبەرلەرى قاتىسۋدا, – دەدى وبلىستىق «قوعامدىق كەلىسىم» مەكەمەسىنىڭ باسشىسى ەرمەك نۇعىمانوۆ. – بيىل اسسامبلەيا جۇمىسىنا ءبىرشاما وزگەرىستەر ەنگىزىپ, بارلىق اۋدانداردى قامتىپ جۇمىس ىستەدىك. وسىنداي شارالار بارلىق اۋدانداردا وتكىزىلدى. حالىقتىڭ ءتول ونەرىن كەڭىنەن ناسيحاتتاۋعا اتسالىستىق. ەڭ قۋانىشتىسى, ونەر ۇزىلمەگەن ەكەن.
قوسشى قالاسىنان كەلگەن شەبەرلىكتىڭ شىڭىنا شىققان نۇرجان ءدىلمانوۆ ۇلتتىق اسپاپتاردىڭ 52 ءتۇرىن جاسايدى ەكەن. كۇي اۋەنىمەن ورعي سەكىرگەن ورتەكەسى تالعامپاز قاۋىمنىڭ كوڭىلىنەن شىقتى.
– دومبىرادان باستاپ, قازاقتىڭ بارلىق ۇلتتىق اسپاپتارىنىڭ ءتۇر-ءتۇرىن جاسايمىن. شاڭقوبىز, جەتىگەن, قوبىز, باس دومبىرا, سازسىرناي, سىلدىرماق, اساتاياق سەكىلدى اسپاپتاردى بۇگىندە مەكتەپ وقۋشىلارى مۋزىكا ساباعىنا, ونەر كوللەدجدەرىنىڭ ستۋدەنتتەرى جەكە وزدەرىنە كوپتەپ تاپسىرىس بەرۋدە. بۇگىندە ءۇش شاكىرت تاربيەلەپ شىعاردىم, ولار دا ءوز شەبەرحانالارىن اشىپ, ۇلتتىق اسپاپ تۇرلەرىن تاپسىرىسپەن جاسايتىن دارەجەگە جەتتى, – دەيدى شەبەر.
حالقىمىزدىڭ مادەنيەتى مەن ءداستۇرىن نىعايتۋعا باعىتتالعان بىرقاتار جاڭا جوبالار ىسكە اسىرىلۋدا. ەل تاۋەلسىزدىگىنىڭ 30 جىلدىعى اياسىندا وبلىستا «30 يگى ءىس», «مىڭ بالا», «قازاقتانۋ» عىلىمي-اعارتۋشىلىق جانە ء«بىر شاڭىراق استىندا – ءبىر ماقساتقا» جوبالارى قولعا الىنعان. بۇگىنگى شارا سونىڭ ءبىر دالەلى.
قازىلاردىڭ شەشىمىمەن ءبىرىنشى ورىندى قوسشى قالاسىنان كەلگەن اعاش جانە تەرى شەبەرى اسحات بوزىمباي يەلەنسە, باس جۇلدەگە شورتاندىلىق سۋرەتشى-قولونەرشى بەكتاس كارىم لايىق دەپ تانىلدى. كورمە سوڭى ءان-جىرعا ۇلاستى. كورمەدەن قۇرقول قايتقاندار جوق. تالاپكەرلەردىڭ بارلىعىنا سىي-سياپات تابىس ەتىلدى. ەڭ باستى ولجا – ۇلتتىق مۇرانىڭ ۇلىقتالىپ, قايتا جاڭعىرۋى بولدى.
