جىل باسىنان بەرى قاراعاندى وبلىسىندا كوروناۆيرۋس ينفەكتسياسىن جۇقتىرۋدىڭ 98 898 جاعدايى تىركەلىپ, 90 110 ادام جازىلىپ شىققان. ياعني بۇل كورسەتكىش 91,1%-دى قۇرايدى. بۇگىندە وبلىس «سارى» ايماققا ەنگەن. سوڭعى اپتادا ينفەكتسيانىڭ جاڭا جاعدايلارى 21%-عا تومەندەگەن. دەگەنمەن, نەگىزگى شەكتەۋ شارالارىنىڭ ساقتالاتىنىن جەتكىزدى سپيكەر.
– پاندەميا دەنساۋلىق ساقتاۋ جۇيەسىن دامىتۋ جوسپارلارىنا, ونىڭ ىشىندە قارجىلاندىرۋ اعىنىن ۇيلەستىرۋگە تۇزەتۋلەر ەنگىزدى. نەگىزگى كۇشتەر مەن قۇرالدار ءارتۇرلى اۋىرلىقتاعى كوروناۆيرۋس ينفەكتسياسى بار ناۋقاستاردى دياگنوستيكالاۋ مەن ەمدەۋگە ارنالعان ينفراقۇرىلىمدى دامىتۋعا باعىتتالدى. سونىمەن قاتار وڭىردە Ashyq جوباسى ءساتتى جۇزەگە اسىپ كەلەدى. جوباعا 12 مىڭنان استام كاسىپكەر قاتىسۋدا. بۇل ەل بويىنشا ءۇشىنشى كورسەتكىش, – دەپ اتاپ ءوتتى ە.الپىسوۆ.
سونىمەن قاتار وبلىس اكىمىنىڭ ورىنباسارى كوروناۆيرۋس ينفەكتسيامەن كۇرەسۋ ءۇشىن وبلىستا قىسقا مەرزىمدە زاماناۋي ەمدەۋ-دياگنوستيكالىق جابدىقتارمەن جابدىقتالعان ءتۇرلى دەڭگەيدەگى ستاتسيونارلار مەن ەمحانالاردى بىرىكتىرەتىن كلاستەرلىك جۇيە قۇرىلعانىن حابارلادى. جاعداي كۇردەلەنگەن كەزدە وبلىستا 5 679 توسەكتىك ورىن, ونىڭ ىشىندە 434 رەانيماتسيالىق ورىن اشىلعان. ەپيدەميالىق جاعدايدىڭ تۇراقتانۋىنا بايلانىستى قازىر توسەكتىك ورىن قۋاتى 3 353-كە دەيىن تومەندەدى, ونىڭ تورتتەن ءبىر بولىگى عانا جۇمىس ىستەيدى. جان ساقتاۋ بولىمشەلەرىندە 44 ادام جاتىر. 25 كومپيۋتەرلىك توموگرافيا كابينەتى جۇمىس ىستەپ تۇر. وبلىستىق بيۋدجەت ەسەبىنەن 40 مەديتسينالىق ۇيىمدا كەۋدە قۋىسى اعزالارى توبىنىڭ باستاپقى دياگنوستيكاسى ءۇشىن قاجەتتى زاماناۋي تسيفرلى رەنتگەن-اپپاراتتار ورناتىلعان. وبلىستا جالپى قۋاتتىلىعى تاۋلىگىنە 15 مىڭ تەستتەن اساتىن 10 پتر-زەرتحانا بار.
بۇدان بولەك, 105 بىرلىك مەديتسينالىق جابدىق ساتىپ الۋ جوسپارلانعان. بيىلعى جىلدىڭ سوڭىنا دەيىن قوسىمشا بەس كومپيۋتەرلىك توموگراف ورناتۋ كوزدەلگەن: ونىڭ ەكەۋى قالالاردا جانە ۇشەۋى جاڭاارقا, وساكاروۆ جانە قارقارالى اۋداندىق اۋرۋحانالارىندا بولادى.
سونداي-اق وبلىستا كوروناۆيرۋس ينفەكتسياسىنا قارسى جاپپاي يممۋنداۋ جالعاسۋدا. سپيكەر وڭىردە ءبىرىنشى كومپونەنتپەن 523 مىڭنان استام ادام, ەكىنشى كومپونەنتپەن شامامەن 465 مىڭ ادام ەگىلگەنىن ايتتى.
– ءىرى ونەركاسىپتىك كاسىپورىنداردىڭ جۇمىسشىلارى اراسىندا ۆاكتسينالاۋدىڭ جوعارى دەڭگەيى ءىرى ينفەكتسيا وشاقتارىنىڭ پايدا بولۋىنا جول بەرمەدى جانە كاسىپورىنداردىڭ تۇراقتى جۇمىسىن قامتاماسىز ەتتى. وتكەن جىلى شاحتالار, وندىرىستىك الاڭدار جانە كەيبىر وندىرىستەر جابىلعان كەزدەر بولدى. بۇگىنگى تاڭدا جاعداي تۇبەگەيلى وزگەردى, ۆاكتسينالاۋدىڭ جوعارى كورسەتكىشى ءىرى ونەركاسىپتىك كاسىپورىندارعا ۇزدىكسىز جۇمىس ىستەۋگە مۇمكىندىك بەرەدى. تەك «ارسەلورميتتال تەمىرتاۋ» ۋچاسكەلەرىندە جۇمىسشىلاردىڭ 90%-دان استامى ەگىلدى, بۇل كاسىپورىننىڭ تۇراقتى جۇمىس ىستەۋىن قامتاماسىز ەتتى, – دەدى ە.الپىسوۆ.
بريفينگ بارىسىندا قازىرگى ۋاقىتتا وبلىستا مەكتەپتەردەگى جاعدايدىڭ ءبىرشاما شيەلەنىسىپ كەتكەنى ايتىلدى. وقۋ جىلىنىڭ باسىندا العاشقى ون كۇندە وقۋشىلار اراسىندا اۋرۋشاڭدىقتىڭ ءوسۋى تىركەلگەن. دەگەنمەن, سپيكەر ءبىلىم بەرۋ نىساندارىندا سانيتارلىق-ەپيدەميالىق تالاپتاردىڭ ساقتالۋىنا تۇراقتى مونيتورينگتىك تەكسەرۋلەر جۇرگىزىلەتىنىن جەتكىزدى. «ىندەت جۇقتىرۋدىڭ ءاربىر جاعدايى بويىنشا كۆي ودان ءارى تارالۋىنا جول بەرمەۋ جونىندەگى ءىس-شارالار كەشەنى جۇزەگە اسىرىلادى. قابىلدانعان شارالار سوڭعى اپتالاردا سىرقاتتانۋشىلىق دەڭگەيىن 2,5 ەسە تومەندەتۋگە مۇمكىندىك بەردى», دەپ اتاپ ءوتتى ە.الپىسوۆ.
قاراعاندى وبلىسى
