وبلىس ورتالىعىنداعى مۇمكىندىگى شەكتەۋلى جاندارعا ارنالعان «مەرگەن» سپورت كلۋبىنىڭ جانىنان تاعدىر تالكەگى ءتانىن عانا ەمەس, جانىن دا جارالاعان بالالارعا ارنالعان بولىمشەنىڭ اشىلۋى وسى ورايداعى ۇزاق ۋاقىت شەشىمىن تاپپاي كەلگەن ماسەلەنى وڭىنان شەشىپ بەردى. قازىر «ەرەكشە ءومىر» قوعامدىق قورىنىڭ قامقورلىعىنداعى بالالار بارلىق جاعداي جاسالعان سپورت زالىنا بارىپ, دەنساۋلىقتارىن شىنىقتىرىپ ءجۇر. ءبىر ايتا كەتەرلىگى, اۋەل باستا سپورت زالى جوندەۋدەن وتكىزىلە قويماعان ەدى. جاقسى جاڭالىقتان قۇلاقتانعان بالالار دا ۇزاق ۋاقىت سارعايا توسىپ ءجۇردى. جاڭا بولعانىمەن, جوندەۋ وتكىزىلمەگەننەن كەيىن كوڭىل قۇلازىتىپ تۇرادى ەكەن.
كوكشەتاۋلىق كاسىپكەر ارتەم سينەلنيكوۆ مۇمكىندىگى شەكتەۋلى بالالاردىڭ جايىن ويلاپ, ولاردى قۋانتقىسى كەلدى. قولى ەپسەكتى قۇرىلىسشىلاردىڭ قالاعىنان كەيىن زال ادام تانىماستاي ادەمى كەيىپكە ەندى.
– مۇنداي بالالاردان قاراجات اياۋدىڭ قاجەتى جوق, – دەيدى كاسىپكەر. – ءبىز ءالى دە كومەكتەسە بەرەتىن بولامىز.
قازىر سۇيىكتى سپورتتارى بويلارىن سەرگىتكەن بالالار جارىق, قۇرقىلتايدىڭ ۇياسىنداي جىپ-جىلى سپورت زالىندا جاتتىعىپ ءجۇر. وزدەرى دە ءجيى باس قوساتىن, شىمىر بولىپ شىنىعاتىن سۇيىكتى ورىندارىنا ۇزبەي كەلۋگە ىنتالى. «ەرەكشە ءومىر» قوعامدىق قورىنىڭ جەتەكشىسى ءاليا راحىمبەكوۆانىڭ ايتۋىنا قاراعاندا, مۇمكىندىگى شەكتەۋلى جاندارعا جۇرەك جىلۋىن دارىتاتىن ۇجىم 2018 جىلى قۇرىلعان. 2 مەن 13 جاس ارالىعىنداعى بالالارمەن لوگوپەدتەر, پسيحولوگتەر جۇمىس ىستەيدى.
– سپورت زالىنا وتە ساپالى جوندەۋ جۇمىستارى جاسالدى, – دەيدى ول. – بار جان-تاندەرىن سالىپ ىستەگەندەرى كورىنىپ تۇر. مۇنداي زالدا جاي عانا جاتتىققاننىڭ ءوزى جان-دۇنيەلەرىن شۋاقتاندىرادى. الداعى ۋاقىتتا ءار بالانىڭ دەنساۋلىعىنا بايلانىستى جەكە اينالىساتىن سپورت جابدىقتارىن الماقشىمىز.
بارلىق بالا باقىتتى بولۋ ءۇشىن جاراتىلعان. پەشەنەلەرىنە بۇيىرعان پەيىشتەي ورىندا اعا بۋىننىڭ پەيىلىنەن جۇرەكتەرىنە جىلۋ قۇيىلعان جاسوسپىرىمدەر الاڭسىز جاتتىعىپ ءجۇر قازىر.
