ناقتى قابىلەتى بار, ءبىلىمى جوعارى جاستاردىڭ مۇعالىم ماماندىعىنا بەت بۇرۋىنا جاعداي جاساۋ نازارعا الىنۋدا. بۇرىن ۇبت تاپسىرعان وقۋشىلاردىڭ ىشىندە تومەن بالل جيناعان وقۋشىلار مۇعالىم ماماندىعىنا ءتۇسىپ كەتەتىن ەدى. ال بۇگىندە, كەرىسىنشە, «التىن بەلگى» يەگەرى اتانعان جاستاردىڭ باسىم بولىگى مۇعالىم ماماندىعىن تاڭداۋدا. بۇل نەنى بىلدىرەدى؟ مەملەكەتتىڭ ماڭىزدى سالالارىنىڭ ىشىندە باسقا ماماندىققا قاراعاندا مۇعالىم ماماندىعىنىڭ ماڭىزدى ەكەنىن ءتۇسىنىپ كەلە جاتقانىمىزدىڭ ءبىر بەلگىسى دەپ ايتا الامىن.
سونىمەن قاتار جاڭارتىلعان ءبىلىم بەرۋ مازمۇنى بويىنشا كوپتەگەن وزگەرىس بار. بۇرىن وقۋشى باعا ءۇشىن وقيتىن بولسا, قازىر وقۋشى ءبىلىم ءۇشىن وقۋ كەرەكتىگىن ءتۇسىنىپ كەلە جاتىر. سەبەبى بۇگىندە وقۋ بارىسىندا بالاعا ناقتى دەسكريپتور بەرىلەدى. سول دەسكريپتور شەڭبەرىندە باعالاۋ كريتەريلەرى ۇسىنىلادى. وسىعان سايكەس وقۋشى ءوز ءبىلىمىنىڭ ناقتى قاي دەڭگەيدە تۇرعانىن انىقتاي الادى. بۇل ارقىلى وقۋشىلار اراسىندا قاراما-قايشى پىكىرلەر تۋىندامايدى. سونداي-اق ساباقتا ءارتۇرلى ءادىس-تاسىلدەر كەڭىنەن قولدانىلادى. مىسالى, ديالوگتىك وقىتۋ ءادىسى, دجيگسو ءادىسى, فيشبوۋن ءادىسى جانە رولدىك ادىستەردى ايتۋعا بولادى.
ءوزىم ەلورداداعى ءماشھۇر ءجۇسىپ اتىنداعى №57 ورتا مەكتەپتە 10 جىل كولەمىندە ۇستازدىق ەتىپ كەلەمىن. وسى ۋاقىت ارالىعىندا ءبىراز وقۋشىم وليمپيادا, عىلىمي جوبا سايىستارىندا, عىلىمي-پراكتيكالىق كونفەرەنتسيالاردا, ءارتۇرلى بايقاۋلاردا جەڭىمپاز اتاندى. مەن ساباقتا ۆيزۋالدى دەرەكتەردى كەڭىنەن قولدانامىن. ويتكەنى وقۋشى كىتاپتاعى ءماتىن تۇرىندەگى اقپاراتتاردى وقۋى مۇمكىن, بىراق ونى تەز ۇمىتىپ قالادى. سول ءماتىن تۇرىندەگى اقپاراتتاردى اۋديو, بەينەگرافيكا, دياگرامما, انيماتسيا تۇرىندە جەتكىزۋگە تىرىسامىن. بۇل وقۋشىلاردىڭ ەستە ساقتاۋ قابىلەتتەرىن, شىعارماشىلىق ىزدەنىستەرىن ارتتىرۋعا ىقپال ەتەدى.
قازىر ءبىلىم جانە عىلىم مينيسترلىگى جاڭا جوبالاردى جۇزەگە اسىرىپ جاتىر. ونىڭ ءبىرى – «تسيفرلى مۇعالىم» جوباسى. بۇل ارقىلى تسيفرلى تەحنولوگيانى قولدانىپ, قازاقستان بويىنشا بىلىكتى ۇستازدار كوپتەگەن مەكتەپتىڭ وقۋشىلارىن بىرلەستىرە وتىرىپ, ساباق بەرۋگە مۇمكىندىك الادى. بولاشاقتا وقۋشى مۇعالىمدى تاڭداۋ دارەجەسىنە جەتۋىمىز كەرەك. بۇل مۇعالىمدەر اراسىندا دا باسەكەلەستىكتى ارتتىرىپ, ساپالى ءبىلىم بەرۋگە جاعداي تۋعىزادى.
2020-2021 وقۋ جىلىندا «حابار» تەلەارناسىنىڭ قولداۋىمەن تۇسىرىلگەن «تەلە-ساباق» جوباسىنا جىل بويى قاتىسىپ, «بالاپان» تەلەارناسىنان 120-دان اسا ساباق بەردىم. مەنىڭ ساباقتارىم رەسپۋبليكا كولەمىندە قازاقستاننىڭ تۇكپىر-تۇكپىرىندەگى وقۋشىلارعا كورسەتىلدى. ءدال وسىنداي تاجىريبە كورسەتىپ جاتقانىما قۋانامىن جانە ەلىمىزدىڭ ءبىلىم بەرۋ سالاسىن دامىتۋ جولىندا ايانباي ەڭبەك ەتۋگە, بار بىلگەنىمدى بولاشاق ۇرپاققا ۇيرەتۋگە تىرىسامىن.
«ۇزدىك پەداگوگ-2021» بايقاۋىنا قاتىسىپ, قالا كولەمىندە جانە رەسپۋبليكا كولەمىندە جەڭىمپاز اتانىپ, وسىناۋ اتاققا يە بولدىم. ءبىلىم جانە عىلىم مينيسترلىگى تاراپىنان «ۇزدىك پەداگوگ» توسبەلگىسىمەن ماراپاتتالدىم.
سارۆار كۋلمەتوۆ,
ءماشھۇر ءجۇسىپ اتىنداعى
№57 ورتا مەكتەپتىڭ گەوگرافيا ءپانىنىڭ مۇعالىمى
