فوتو: جەتىسۋ وبلىسى اكىمدىگى
جەرگىلىكتى ماڭىزى بار قورعالاتىن نىساندار تىزىمىنە ەنگىزىلگەن «تاسباقا» ەكوپاركىنىڭ اۋماعى 38 گەكتار بولسا, «چەركاساي» ەكوپاركىنىڭ اۋماعى 21 گەكتار بولماق, سول سياقتى «قويتاس» پاركى ەكو-پارك مارتەبەسىن يەلەنەدى.
وبلىستىق تۋريزم باسقارماسىنىڭ باسشىسى ساكەن تۇكىباەۆتىڭ ايتۋىنشا, بۇل 3 ەكوپاركتەر وڭىردەگى ەكولگيالىق جانە مادەني-تانىمدىق ءتۋريزمدى دامىتۋعا تىڭ سەرپىن بەرەدى.
«تالدىقورعاننان ءۇش شاقىرىم جەردە ورنالاسقان «تاسباقا» ەكوپاركى قوناقتاردىڭ بىركۇندىك جانە دەمالىس كەزىندەگى تىنىعۋىنا قولايلى بولماق. وندا شولۋ الاڭى, اۆتوتۇراق جاسالىپ, بەسەدكالار, سانيتارلىق توراپتار, ورىندىقتار, قوقىس كونتەينەرلەرى قويىلادى. ال تەكەلى قالاسى ماڭىنداعى «چەركاساي» ەكوپاركى وتباسىلىق ءارى بەلسەندى دەمالىس ءۇشىن قولايلى بولادى. «قويتاس» ەكوپاركىنە كەلسەك, ول سارقان قالاسىنىڭ ىشىندە ورنالاسقان. ونىڭ ءبىر ەرەكشەلىگى – تابيعي لاندشافتى ساقتالعان, وندا «جوڭعار الاتاۋى» مەملەكەتتىك ۇلتتىق تابيعي پاركىندە وسەتىن اعاشتار وتىرعىزىلىپ, پاركتى مەكەندەيتىن جانۋارلاردىڭ مۇسىندەرى ورناتىلعان, جالپى ۇلتتىق پاركتىڭ فلوراسى مەن فاۋناسىنان كەڭىنەن حابار بەرەدى», دەدى ساكەن تۇكىباەۆ.
