جالپاق الەمدى ىندەت قۋسىرعالى ەلدى كوروناۆيرۋس شەڭگەلىنەن قالاي امان الىپ قالامىز دەگەن سۇراق كۇن تارتىبىندە. حالىق اراسىندا اقپاراتتىق ءتۇسىندىرۋ جۇمىستارى ۇدايى جۇرگىزىلۋدە.
ىندەت باستالعانى وبلىستا كوروناۆيرۋس ينفەكتسياسىمەن اۋرۋدىڭ 40 مىڭنان استام وقيعاسى تىركەلدى. ونىڭ 83 پايىزى بيىل ورىن الىپ وتىر. ىندەتتىڭ سالدارىنان 397 ادام قايتىس بولدى. ونىڭ ىشىندە 2020 جىلى 109 ناۋقاستىڭ ومىردەن وزعانىن ايتا كەتەلىك.
وڭىردە كوروناۆيرۋس ينفەكتسياسىنا مۇمكىندىگىنشە توسقاۋىل قويىلۋدا. وسىنداي جۇمىستاردىڭ ناتيجەسىندە بيىل قىركۇيەك ايىنىڭ 30-ى كۇنى ءوڭىر جاسىل ايماققا كوشتى. تامىز ايىندا ىندەتكە شالدىعۋ كورسەتكىشى 0,9 پايىزعا تومەندەدى. سونىمەن قاتار اۋرۋحانالارداعى ادامدار سانى دا كەمىدى. شىلدە ايىندا 1 425 ادام اۋرۋحانالاردا ەم قابىلداسا, بۇگىندە بۇل كورسەتكىش 410 ادامعا ازايدى. جان ساقتاۋ بولىمشەسىندە جاتقان اۋىر ناۋقاستار دا بۇرىنعىداي كوپ ەمەس. ناقتىراق ايتساق, 50 پايىزعا كەمىدى. تامىز ايىندا وبلىستىڭ اۋرۋحانالارىندا 115 ادام جان ساقتاۋ بولىمشەلەرىندە جاتسا, سوڭعى ايدا 57 ادام ەم قابىلداۋدا.
ناۋقاستار سانىنىڭ ازايۋى اۋرۋحاناداعى جۇكتەمەنى ءۇش ەسە تومەندەتۋگە مۇمكىندىك بەرىپ وتىر. بۇگىندە وڭىردەگى ىندەت شەڭگەلىنە ىلىككەن ناۋقاستار 17 جۇقپالى اۋرۋلار اۋرۋحاناسىندا ەم-دوم قابىلداۋدا. قاۋىپتىڭ بەتى قايتقانىمەن, قامسىز وتىرۋعا تاعى بولمايدى. قازىرگى كۇنى اۋرۋحانالاردا 2,5 مىڭ توسەكتىك ورىن دايىن. وندا بارلىق جاعداي جاسالعان.
– دەنساۋلىق ساقتاۋ سالاسىنىڭ ماتەريالدىق-تەحنيكالىق بازاسىن جاقسارتۋ ءۇشىن رەسپۋبليكالىق جانە وبلىستىق بيۋدجەتتەن 1,5 ملرد تەڭگە قاراجات ءبولىنىپ, 221 دانا مەديتسينالىق قۇرال-جابدىقتار الىندى, – دەدى وبلىس اكىمىنىڭ ورىنباسارى اينا ەرمەكقىزى, – بۇگىنگى كۇنى وبلىستىڭ مەديتسينا ۇيىمدارىندا 447 جاساندى تىنىس الۋ اپپاراتى بار.
وبلىستا 147 ءموبيلدى بريگادا تۇراقتى جۇمىس ىستەۋدە. سالاعا زامان تالابىنا ساي سەرپىن بەرۋ ءۇشىن 8 وتاندىق جىلجىمالى مەديتسينالىق كەشەن ساتىلىپ الىندى. بۇل كەشەندەر 8 اۋداننىڭ حالقىنا قىزمەت ەتەدى. بۇعان دەيىن دە ءدال وسىنداي 3 كەشەن بولعان. جاڭالارى قوسىلعان سوڭ مەديتسينا قىزمەتكەرلەرىنىڭ قولى ۇزارىپ قالدى. سالا قىزمەتكەرلەرىن كولىكپەن قامتاماسىز ەتۋ دە ءبىرشاما وڭ جولعا قويىلعان. ىندەت باستالعالى 2,5 ملرد تەڭگەگە 58 سانيتارلىق اۆتوكولىك الىندى. ءدارى-دارمەكپەن قامتاماسىز ەتۋگە دە ۇدايى كوڭىل بولىنۋدە. بۇل ورايدا قازىر جەتىسپەۋشىلىك جوق دەپ ايتۋعا ابدەن بولادى.
– وبلىستا ەكى ايعا جەتەتىن ءدارى-دارمەك قورى بار, – دەدى اينا ەرمەكقىزى, – ىندەت باستالعالى وبلىستاعى مەديتسينا مەكەمەلەرىنە جالپى قۇنى 915 ملن تۇراتىن 85 ءتۇرلى ءدارى-دارمەك جەتكىزىلدى. ونىڭ ۇستىنە جەكە ءدارى-دارمەك قورى قالىپتاستىرىلۋدا. بۇعان جەرگىلىكتى بيۋدجەتتىڭ قارجىسى جۇمسالۋدا. ەڭ قاجەتتى ءدارى-دارمەك قورى جاسالدى. ەمحانالار ارقىلى حالىققا قولجەتىمدى بەس ءتۇرلى ءدارى-دارمەكتىڭ قاجەتتى مولشەرى قامتاماسىز ەتىلدى. تۇراقتاندىرۋ قورىنا قوسىمشا 500 ملن تەڭگە قاراجات قاراستىرىلعان. قازىر وبلىستاعى ءدارىحانالاردا ادامداردى ىندەتتەن اراشالاپ الىپ قالۋعا سەپتىگىن تيگىزەتىن ءدارى-دارمەكتىڭ ءبارى بار. ايتپاقشى, وڭىردە 352 ءدارىحانا جۇمىس ىستەيدى. ولار «امانات», «گەليكا», «ستوفارم», «ارشا» ءتارىزدى ءدارى-دارمەك جەتكىزەتىن ءىرى ۇجىمدارمەن كەلىسىمشارت جاسادى.
بارلىق مەديتسينا قىزمەتكەرلەرى جەكە قورعانىس قۇرالدارىمەن قامتاماسىز ەتىلگەن. قازىر مەديتسينالىق بەتپەردە, قولعاپ, ارنايى كوستيۋمدەر ءتارىزدى قورعانىس قۇرالدارى جەتكىلىكتى. 8 زەرتحانا ۇزدىكسىز جۇمىس ىستەپ, ءبىر تاۋلىكتىڭ ىشىندە 3 مىڭعا جۋىق تەست قورىتىندىسىن تالدايدى. جامان تۇماۋمەن بىرگە كۇز ايلارىندا پايدا بولاتىن تۇماۋ ءتارىزدى جۇقپالى اۋرۋدىڭ الدىن الۋعا دا دايىندىق جۇمىستارى جاسالۋدا.
ءبىلىم سالاسىنداعى ىندەتتىڭ الدىن الۋعا بايلانىستى قويىلعان سۇراققا وبلىستىڭ باس سانيتارلىق دارىگەرى ايناگۇل مۋسينا جاۋاپ بەردى.
– جاڭا وقۋ جىلى باستالعالى وڭىردەگى ءبىلىم وشاقتارىنداعى احۋال باستى نازاردا. ەگەر سىنىپتاعى ءبىر بالا اۋىرسا, وندا تۇگەل سىنىپ جانە اتا-انالارى دا وقشاۋلانادى, – دەدى ايناگۇل سوۆەتقىزى.
ىندەتتىڭ الدىن الۋعا بايلانىستى قىرۋار جۇمىس اتقارىلدى. سوڭعى اپتادا عانا وبلىستاعى 360 نىسان قاۋىپسىزدىك شارالارىن ساقتاۋعا بايلانىستى تەكسەرىلىپ, ءتارتىپ بۇزۋشىلىقتىڭ 15 وقيعاسى انىقتالدى. قاۋىپسىزدىك شارالارىن ساقتاماعان نىسان يەلەرىنە جالپى كولەمى 700 مىڭ تەڭگەگە جۋىق 10 اكىمشىلىك ايىپپۇل سالىندى. ىندەتتىڭ الدىن الۋعا Ashyq پلاتفورماسىنىڭ سەپتىگى ءتيىپ وتىرعانىن ايتا كەتۋگە بولادى.
سارى ايماققا كوشكەنىمىزبەن ساقتىق شارالارىن قاپەردەن شىعارماعان ءلازىم. ونىڭ ەڭ باستى شارتى دەر كەزىندە تۇرعىنداردىڭ ەكپە ەكتىرۋى. بۇل ورايداعى وبلىستاعى كورسەتكىش سوڭعى اپتادا 1,5 ەسە ۇلعايدى. وبلىس جۇرتشىلىعىنىڭ ەكپە ەكتىرىپ, ءوز دەنساۋلىقتارىنا مۇقيات بولۋىنا دەر كەزىندە جۇرگىزىلگەن ۇگىت-ناسيحات شارالارىنىڭ اسەرى ءتيىپ وتىر. ەكپە ەكتىرۋ ىسىنە قوعامدا وزىندىك سالماعى بار, ءسوزى ءۋالى تۇلعالارمەن قاتار, مەديتسينا سالاسىنىڭ تاجىريبەلى ماماندارى, جاستار قوزعالىسىنىڭ بەلسەندىلەرى ۇلەس قوسۋدا. الەۋمەتتىك جەلىلەردە وڭ سيپاتتاعى تالدامالى تۇسىنىك جۇمىستارى ۇزبەي جۇرگىزىلۋدە. وسى ورايدا الەۋمەتتىك جەلىلەردە 7 مىڭنان استام, ال وبلىستىق جانە اۋداندىق بۇقارالىق اقپارات قۇرالدارىندا مىڭعا جۋىق ماقالالار جاريالانعان.
بۇگىندە ەكپەنىڭ العاشقى كومپونەنتىن 300 مىڭعا جۋىق ادام نەمەسە ەكپە الۋعا ءتيىستى تۇرعىنداردىڭ 69 پايىزى الدى. ال ەكىنشى كومپونەنتتى 250 مىڭ ادام نەمەسە حالىقتىڭ 61 پايىزى قابىلداپ ۇلگەردى. بۇل ماسەلە جەرگىلىكتى اتقارۋشى بيلىكتىڭ نازارىندا. سوڭعى ايدا ەكپە ەگەتىن ورىنداردىڭ سانى بەس ەسە كوبەيدى. شالعاي اۋىلداردا 11 جىلجىمالى مەديتسينالىق كەشەن جۇمىس ىستەۋدە.
كوكشەتاۋ قالاسى تۇرعىندارىنان تۇسكەن ەكپە ەگۋ كەزىندە دەنساۋلىق ساقتاۋ سالاسى قىزمەتكەرلەرىنىڭ ءوز جۇمىسىنا سالعىرت قاراۋى تۋرالى شاعىمعا وبلىستىق دەنساۋلىق ساقتاۋ باسقارماسىنىڭ باسشىسى ناريمان سىزدىقوۆ ء«اربىر ادامنىڭ دەنە قىزۋى, جالپى جاعدايى مۇقيات تەكسەرىلۋى كەرەك. الداعى ۋاقىتتا بۇل جاعدايلارعا ەرەكشە كوڭىل اۋداراتىن بولامىز» دەپ جاۋاپ بەردى.
ىندەتتىڭ بەتى قايتقانىمەن, قايتا ورشۋىنە جول بەرمەۋ ءۇشىن ساقتىق شارالارىن ەستەن شىعارۋعا بولمايدى.
