«قىركۇيەك ايىندا «ۋچاسكە» جەدەل الدىن الۋ شاراسى اياسىندا 1,7 ميلليونعا جۋىق پاتەر مەن جەكە ۇيلەردى ارالاپ, 130 مىڭنان استام ساياجايلار مەن 33 مىڭعا جۋىق شارۋا قوجالىقتارى, قىستاقتار مەن ۋچاسكەلەر تەكسەرىلدى. 29 مىڭنان استام جالدامالى پاتەر تەكسەرىلدى, وندا مەملەكەتتىك كىرىستەر ورگاندارىندا تىركەۋسىز تۇرعىن ءۇيدى جالعا بەرگەن 5 مىڭعا جۋىق فاكتى انىقتالدى», دەدى ءنۇردىلدا وراز مينيسترلىكتە وتكەن بريفينگتە.
تۇرعىلىقتى جەرى بويىنشا 92 مىڭنان استام ازاماتتىق قارۋ يەلەرى تەكسەرىلگەن, ناتيجەسىندە 1,2 مىڭعا جۋىق ادامنىڭ ازاماتتىق قارۋ ساقتاۋ ەرەجەلەرىن بۇزعانى انىقتالعان.
الدىن الۋ شاراسى باستالعالى پوليتسيا قىزمەتكەرلەرى 200 مىڭعا جۋىق اكىمشىلىك قۇقىق بۇزۋشىلىقتىڭ, ونىڭ ىشىندە 3,5 مىڭ ۇساق بۇزاقىلىق فاكتىسىنىڭ, تۇرمىستاعى 4,3 مىڭ بۇزۋشىلىقتىڭ, 30 مىڭنان استام كوشى-قون زاڭناماسىنىڭ جولىن كەسكەن.
