اقتوتى رايىمقۇلوۆا قۇتتىقتاۋ سوزىندە قازاق جانە وزبەك حالقىنىڭ تۋىستىق, دوستىعىنىڭ تاريحى تەرەڭدە ەكەنىن, ەكى ەلدىڭ ءتىلى مەن مادەنيەتى تامىرلاس ەكەنىن ايتتى.
«ەكى ەل اراسىندا ىنتىماقتاستىقتىڭ بەرىك قۇقىقتىق جۇيەسى قۇرىلدى. وسى ۋاقىتقا دەيىن ماڭگىلىك دوستىق تۋرالى كەلىسىم-شارت (1998 جىل) جانە ستراتەگيالىق ارىپتەستىك تۋرالى كەلىسىم-شارت نەگىزىندە اعايىن مەملەكەتتەر اراسىنداعى جان-جاقتى ىنتىماقتاستىق پەن ءوزارا سەنىم قاعيداتتارى جازىلعان بىرقاتار قۇجات كۇشىنە ەنگەن. مەملەكەتتەرىمىز اراسىنداعى ىنتىماقتاستىقتىڭ نىعايۋى قازاقستان مەن وزبەكستان باسشىلارىنىڭ دوستىق, كورشىلىك جانە ستراتەگيالىق ارىپتەستىكتى نىعايتۋعا دەگەن ساياسي ەرىك-جىگەرى مەن ءوزارا ۇمتىلىسىنىڭ ارقاسىندا مۇمكىن بولىپ وتىر. وسى ورايدا قازاقستان مەن وزبەكستان اراسىنداعى گۋمانيتارلىق بايلانىستىڭ ورنى ەرەكشە ەكەنىن اتاپ وتكىم كەلەدى. مادەنيەت پەن ونەر ورتاداعى كوپتەگەن يگى ءىستىڭ ىرگەتاسىنا اينالدى. قازاقستاننىڭ تۇڭعىش پرەزيدەنتى نۇرسۇلتان نازارباەۆ ايتىپ وتكەندەي, ء«بىزدىڭ ماقساتىمىز – وسى قارىم-قاتىناستى, ءوزارا سەنىمدى نىعايتىپ, ونى كەيىنگى ۇرپاققا جەتكىزۋ». بۇگىندە ەكى مەملەكەت اراسىندا ونەر سالاسىنداعى بايلانىس بەلسەندى دامىپ كەلەدى. ماسەلەن, جىل سايىن وزبەكستاندىق شەبەرلەر الماتىدا وتەتىن ورتالىق ازيا قولونەرشىلەرىنىڭ جارمەڭكەسىنە قاتىسادى. نۇر-سۇلتان مەن ەلىمىزدىڭ باسقا قالالارىنداعى كوركەم گالەرەيالارى مەن مۇراجايلارىندا تانىمال وزبەك سۋرەتشىلەرىنىڭ كورمەلەرى وتەدى. مۋزىكا جانە تەاتر ۇجىمدارى ەلىمىزدە تۇراقتى تۇردە ونەر كورسەتۋدە. ءوز كەزەگىندە, ءبىزدىڭ ارتىستەرىمىز سامارقاندا وتەتىن مۋزىكا فەستيۆالىنە بەلسەندى قاتىسىپ جاتىر», دەدى اقتوتى رايىمقۇلوۆا.
ۆەدومستۆونىڭ ءباسپاسوز قىزمەتىنىڭ جازۋىنشا, وسىدان كەيىن مينيستر ەكى ەل اراسىنداعى كينو سالاسىنداعى ارىپتەستىكتىڭ تاريحى تەرەڭدە ەكەنىن, قازاقستان مەن وزبەكستان بىرلەسىپ بىرقاتار تاماشا فيلم تۇسىرگەنىن ايتقان.
ء«بىز مەليس ابزالوۆ, دامير ساليموۆ, شۋحرات ابباسوۆ, الي حامراەۆ سىندى باسقا دا كوپتەگەن كورنەكتى, ونەر شەبەرىنىڭ ەسىمىن ماڭگى ەستە ساقتايمىز. قازىرگى وسكەلەڭ ۇرپاقتىڭ وسى يگى ءداستۇردى جالعاستىرۋعا كۇش سالىپ كەلە جاتقانى قۋانتادى. وزبەك كينەماتوگرافيستەرى ءوز فيلمدەرىن قازاقستاندىق كينوفەستيۆالدەردە تۇراقتى كورسەتۋدە. مىسالى, وزبەكستاننىڭ حالىق اقىنى ەركين ۆاحيدوۆتىڭ «التىن قابىرعا» شىعارماسى نەگىزىندە تۇسىرىلگەن «كورشىلەر» اتتى فيلم وسىنىڭ دالەلى», دەدى مينيستر.
