فۋتزالدا برازيليا تاجىريبەلى قۇرامانىڭ ءبىرى سانالادى. اتالعان قۇراما الەم چەمپيوناتىندا بەس دۇركىن چەمپيون اتاعىن جەڭىپ العان. ەكى قۇراما تارتىستى ويىن وتكىزدى. ناتيجەسىندە ويىننىڭ 12-مينۋتىندا قازاقستاندىق فۋتزالشىلار قارسىلاستار قاقپاسى ماڭىندا شابۋىل ۇيىمداستىردى. ول برازيليالىق قاقپاشى گيتتاعا ءتيىپ, اۆتوگول سوعىلدى. وسىلايشا ءبىرىنشى كەزەڭنەن كەيىن قازاقستان قۇراماسى قارسىلاسىنان 1:0 ەسەبىمەن باسىم ءتۇستى.
ەكىنشى كەزەڭدە تارتىستى جەكپە-جەك ودان ءارى ءوربىدى. ويىننىڭ 25-مينۋتىندا قازاقستاندىق قۇرامادان تاينان ويلاماعان جەردەن ءوزىنىڭ قاقپاسىنا گول سوعىپ الدى. ول 31-مينۋتتا قارسىلاستار قاقپاسىنا گول سوعىپ, قايتادان قازاقستان قۇراماسى العا شىقتى. دەگەنمەن ودان كەيىن برازيليالىقتار قاتارىنان رودريگو 32, فەرراو 34, لە 35-مينۋتتاردا كوزدەگەن نىسانادان ءمۇلت كەتكەن جوق. قازاقستان قارسىلاسىنان 2:4 ەسەبىمەن جەڭىلىپ قالدى. ناتيجەسىندە برازيليا الەم چەمپيوناتىنىڭ قولا جۇلدەسىنە قول سوزدى. قازاقستان ءتورتىنشى ورىنعا تۇراقتادى.
سونداي-اق, بۇگىن فينالدا پورتۋگاليا جانە ارگەنتينا قۇرامالارى شەبەرلىك بايقاسادى. كەزدەسۋ ەلوردا ۋاقىتىمەن 22:50-دە باستالىپ, «Qazsport» تەلەارناسىنان تىكەلەي ەفيردە كورسەتىلەدى. ەسكە سالساق, توپتىق كەزەڭدە قازاقستان قۇراماسى كوستا-ريكادان 6:1, ليتۆادان 3:0 ەسەبىمەن باسىم بولسا, ۆەنەسۋەلامەن 1:1 ەسەبىمەن تەڭ وينادى. ودان كەيىن 1/8 فينالدا تايلاندتان 7:0 ەسەبىمەن باسىم ءتۇسىپ, شيرەك فينالدا يراندى 3:2 ەسەبىمەن ءسۇرىندىردى. ال جارتىلاي فينالدا پورتۋگاليامەن وۆەرتايمدا 2:2 ەسەبىمەن تەڭ ءتۇسىپ, پەنالتي تەبۋدە قارسىلاسىنا جول بەردى.
قازاقستان قۇراماسى بۇدان بۇرىن الەم چەمپيوناتى فينالدىق ساتىسىندا ەكى مارتە باق سىنادى. 2000 جىلى ءبىرىنشى كەزەڭنەن اسا الماسا, 2016 جىلى 1/8 فينالعا دەيىن جەتتى.
