پرەزيدەنت كەشەندى ارالاپ كورۋ بارىسىندا «KAZ Minerals Aktogay» كومپانياسى جۇمىسىنىڭ نەگىزگى كورسەتكىشتەرىمەن تانىسىپ, كەن ءوندىرۋ پروتسەسىن كوردى. سودان كەيىن مەملەكەت باسشىسى جاڭا سۋلفيد فابريكاسىنىڭ جۇمىسىن باستاۋعا رەسمي تۇردە رۇقسات بەردى جانە كاسىپورىن قىزمەتكەرلەرىنىڭ الدىندا ءسوز سويلەدى.
قاسىم-جومارت توقاەۆ جيىنعا قاتىسۋشىلاردى كەن بايىتۋ فابريكاسىنىڭ ىسكە قوسىلۋىمەن قۇتتىقتاپ, ۇلتتىق يندۋستريانى دامىتۋعا تىڭ سەرپىن بەرەتىن جوبانىڭ ستراتەگيالىق ماڭىزى بار ەكەنىن ايتتى.
«مەن جولداۋىمدا بىلتىر يندۋستريالاندىرۋدىڭ 10 جىلدىعىندا وڭدەۋ ونەركاسىبىنىڭ ەكونوميكانى دامىتۋعا قوسقان ۇلەسى العاش رەت تاۋ-كەن ونەركاسىبىنىڭ ۇلەسىنەن اسىپ ءتۇسىپ, 13 پايىزعا جەتكەنىن ايتقان ەدىم. بيىلعى 8 ايدىڭ قورىتىندىسى بويىنشا وڭدەۋ ونەركاسىبىنىڭ ءوسۋ قارقىنى ساقتالىپ, شامامەن 6 پايىزعا جەتىپ وتىر. يندۋستريالاندىرۋ كارتاسى اياسىندا 12 مىڭ جاڭا جۇمىس ورنى اشىلىپ, 120-دان استام جاڭا ءوندىرىس ىسكە قوسىلدى. جىل سوڭىنا دەيىن «ونەركاسىپ ساياساتى تۋرالى» زاڭ قابىلدانادى. جالپى ءبىزدىڭ مىندەتىمىز – 2025 جىلعا قاراي وڭدەۋ ونەركاسىبىنىڭ ەكسپورتىن 1,5 ەسە, ال ەڭبەك ونىمدىلىگىن 30 پايىزعا ارتتىرۋ. ول ءۇشىن بىزگە يندۋستريا 4.0 ەلەمەنتتەرى بار ءارى ونىمدەرىن ەكسپورتتايتىن زاماناۋي كاسىپورىندار قاجەت. جاڭا كەن بايىتۋ فابريكاسى وسىنداي تالاپتارعا ساي كەلەدى», دەدى پرەزيدەنت.
سونىمەن قاتار پرەزيدەنت ءوز سوزىندە كاسىپورىن قىزمەتكەرلەرىنىڭ ەل ەكونوميكاسىن دامىتۋعا زور ۇلەس قوسىپ وتىرعانىن اتاپ ءوتتى. مەملەكەت باسشىسى جاڭا فابريكانى ىسكە قوسۋدىڭ الەۋمەتتىك-ەكونوميكالىق تۇرعىدان ءتيىمدى تۇستارىن ايتتى.
«وڭدەلگەن ءونىمنىڭ ەكسپورتى ارتادى. 700 جاڭا جۇمىس ورنى اشىلىپ, سالىقتان بيۋدجەتكە قوسىمشا 80 ميلليون دوللار كىرىس كىرەدى. كومبينات شىعىس قازاقستان وبلىسىنداعى جاڭا الەۋمەتتىك نىسانداردىڭ قۇرىلىسىنا, ءبىلىم بەرۋ جانە ەمدەۋ مەكەمەلەرىنىڭ جابدىقتالۋىن جاقسارتۋعا بەلسەندى اتسالىسادى. بۇل – بيزنەستىڭ الەۋمەتتىك جاۋاپكەرشىلىگىنىڭ لايىقتى ۇلگىسى», دەدى قاسىم-جومارت توقاەۆ.
مەملەكەت باسشىسى كاسىپورىننىڭ بىرەگەيلىگىن اتاپ ءوتىپ, كەشەن باسشىلىعىنىڭ الەۋمەتتىك جاۋاپكەرشىلىگىن جوعارى باعالادى.
«قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ كۇش-جىگەرىنىڭ ارقاسىندا ەلىمىزدە يندۋستريا سالاسىندا وسىنداي ءىرى نىساندار بوي كوتەرۋدە. مۇنداي نىساندار ونەركاسىپتىڭ ءمانىن تۇسىنەتىن الەمدىك جانە يندۋستريالىق قوعامداستىقتاردىڭ ءجىتى نازارىندا. بۇل – بيزنەستىڭ الەۋمەتتىك جاۋاپكەرشىلىكتى سەزىنۋىنىڭ ايقىن دالەلى. كومبينات باسشىلىعىنا الەۋمەتتىك جانە تۇرمىستىق ماسەلەلەرگە باسا ءمان بەرگەنى ءۇشىن العىس بىلدىرەمىز», دەدى پرەزيدەنت.
پرەزيدەنت فابريكانى قىسقا مەرزىم ىشىندە سالىپ بىتىرگەن قۇرىلىسشىلارعا ريزاشىلىعىن ءبىلدىردى.
بۇل تاۋەلسىزدىكتىڭ 30 جىلدىعىنا لايىقتى تارتۋ بولدى. مەن بۇعان دەيىن وسىنداي ناقتى جوبالاردى جۇزەگە اسىرۋعا ءمان بەرۋ قاجەتتىگىن ايتقان ەدىم. جاڭا كاسىپورىن – سونىڭ ايقىن دالەلى, دەدى مەملەكەت باسشىسى.
سونىمەن قاتار فابريكانى ىسكە قوسۋ راسىمىندە «KAZ Minerals PLس» ديرەكتورلار كەڭەسىنىڭ توراعاسى ولەگ نوۆاچۋك جانە كاسىپورىننىڭ جاس ماماندارى ءسوز سويلەپ, قازاقستان پرەزيدەنتىنە جان-جاقتى قولداۋ كورسەتكەنى ءۇشىن العىس ايتتى.
«KAZ Minerals» كومپانيالار توبى يندۋستريالىق-يننوۆاتسيالىق دامۋ مەملەكەتتىك باعدارلاماسىن جۇزەگە اسىرۋ اياسىندا 2017 جىلى اقتوعاي كەن بايىتۋ كەشەنىنىڭ وندىرىستىك قۋاتىن كەڭەيتۋ جوباسىن قولعا الدى. كومبيناتتىڭ ەكىنشى فابريكاسىنىڭ ىسكە قوسىلۋى كەن وڭدەۋ كولەمىن جىلىنا 25-تەن 50 ميلليون تونناعا دەيىن ارتتىرۋعا مۇمكىندىك بەرەدى. جالپى, اقتوعاي I جانە اقتوعاي II جوبالارىن قوسا العاندا كەن ورنىن يگەرۋگە تارتىلعان ينۆەستيتسيانىڭ مولشەرى 3,2 ميلليارد دوللارعا جەتتى.
2022 جىلدان باستاپ كەن ورنىندا 190 مىڭ توننا مىس, ونىڭ ىشىندە 20 مىڭ توننا كاتودتى مىس وندىرىلەدى دەپ جوسپارلانىپ وتىر. كەشەندە جالپى 3 مىڭنان استام ادام جۇمىس ىستەيدى. كاسىپورىندا وزىق تەحنولوگيالار, سونىڭ ىشىندە جاساندى ينتەللەكتىگە نەگىزدەلگەن باعدارلامالار كەڭىنەن قولدانىلادى.
