«ەر ادام تەرگەۋشىنىڭ شوتىنا تەلەفون ءنومىرى بويىنشا اقشا اۋدارعان, بىراق بۇل تۋرالى قاۋىپسىزدىك باسقارماسى دەرەۋ حابارلادى», دەپ جازادى جەرگىلىكتى باق.
ورال قالالىق سوتىندا 52 جاستاعى ەر ادامعا قاتىستى ۇكىم شىعارىلعان. ءىس ماتەريالدارى بويىنشا ورتا مەكتەپتىڭ ەلەكتريگىنە قاتىستى سوتقا دەيىنگى تەرگەۋ جۇرگىزىلدى. وعان جاس بالالاردى ازعىندادى دەگەن ايىپ تاعىلعان.
«ايىپتالۋشى ونىڭ ءىسىن جۇرگىزگەن تەرگەۋشىنىڭ تەلەفون ءنومىرىن ءبىلىپ, وعان تەرگەۋدىڭ ناتيجەسىنە وزگەرىس ەنگىزۋ ءۇشىن بانكتەگى شوتىنا تەلەفون ءنومىرى ارقىلى 50 مىڭ تەڭگە اۋدارۋعا شەشىم قابىلداعان. تەرگەۋشىنىڭ ءوزى بۇل جايلى بەيحابار بولعانى ايتىلادى. تەرگەۋشى پارا الۋدان باس تارتىپ, قاۋىپسىزدىك باسقارماسىنا جۇگىندى», دەلىنگەن ءىس ماتەريالدارىندا.
ەر ادام كىناسىن تولىقتاي مويىنداپ, وكىنەتىنىن ايتتى.
«سوت ۇكىمىمەن ول لاۋازىمدى ادامعا پارا بەرگەنى ءۇشىن كىنالى دەپ تانىلدى. وعان 562 مىڭ تەڭگە كولەمىندە ايىپپۇل سالىندى. ۇكىم زاڭدى كۇشىنە ەنگەن جوق جانە وعان شاعىم جاسالۋى مۇمكىن», دەلىنگەن قۇجاتتا.
جاس بالالاردىڭ ازعىندىق فاكتىسى بويىنشا پوليتسيا دەپارتامەنتىنىڭ ءباسپاسوز قىزمەتى قىلمىستىق ءىس سوتقا جىبەرىلگەنىن حابارلادى. كۇدىكتى قاماۋدا.
