بۇل تۋرالى Boxingscene.com اقپاراتتىق پورتالى جازدى.
بۇعان دەيىن رەسەيدەگى دوپينگ رەجيمىن اشكەرەلەگەن كانادالىق پروفەسسور ءوزىنىڭ 149 بەتتەن تۇراتىن بايانداماسىندا 2016 جىلعى جازعى وليمپيادا ويىندارىنىڭ 11 جەكپە-جەگىن تەرگەگەن.
تەرگەلگەن جەكپە-جەكتەر اراسىندا اۋىر سالماقتاعى رەسەيلىك ەۆگەني تيششەنكو مەن قازاقستاندىق ۆاسيلي لەۆيتتىڭ فينالدىق كەزدەسۋى دە بار. وندا تيششەنكو شارشى الاڭدا لەۆيتتىڭ سوققىلارى باسىم بولعانىنا قاراماستان, تورەشىلەردىڭ ءبىراۋىزدان شەشىمىمەن جەڭىسكە جەتتى. وسىلايشا جەمقور شەنەۋنىكتەر مەن تورەشىلەر التىننىڭ كىمگە بۇيىراتىنىن الدىن-الا ويلاستىرعان.
سونداي-اق, يرلانديالىق مايكل كونلان مەن رەسەيدىڭ تاعى ءبىر بوكسشىسى ۆلاديمير نيكيتين اراسىنداعى جەڭىل سالماقتاعى شيرەك فينالدىق جەكپە-جەك جانە 91 كەلى سالماقتا بريتاندىق دجو دجويستى جەڭگەن فرانتسۋزدىق توني يوكا دا تەرگەۋدەن وتكەن.
باياندامادا AIBA حالىقارالىق بوكس اسسوتسياتسياسىندا سىبايلاس جەمقورلىق فاكتىلەرىنىڭ كوپ جىلدار بويىنا قايتالانىپ جاتقاندىعى جازىلعان. سونىمەن قاتار ريچارد ماكلارەننىڭ جازبالارىندا «2012 جىلى لوندوندا وتكەن بوكس ويىندارىنىڭ تۋرنيرىندە دە سىبايلاس جەمقورلىق بار» دەگەن دەرەكتەر كەلتىرىلگەن.
«بۇل ايبا-نىڭ پايداسى ءۇشىن نەمەسە ۇلتتىق فەدەراتسيالار مەن ولاردىڭ وليمپيادالىق كوميتەتتەرىنە, كەيدە جارىس ۇيىمداستىرۋشىلارىنا قارجىلىق جانە ساياسي قولداۋ كورسەتۋ ءۇشىن, العىس ايتۋ ءۇشىن جاسالدى. بۇگىنگى تاڭدا جۇرگىزىلگەن تەرگەۋ مۇنداي مانيپۋلياتسيالاردا كەيدە التى تاڭبالى سومالار قولدانىلعان دەگەن قورىتىندىعا كەلدى», دەلىنگەن باياندامادا.
ەۆگەني تيششەنكونىڭ يتاليالىق كلەمەنت رۋسسونى جەڭۋى دە سىبايلاس جەمقورلىقپەن بايلانىستى بولۋى مۇمكىن دەگەن كۇدىك بار.
