نەگىزگى ويىنداعى العاشقى گولدى پورتۋگاليالىق انيلتون سەزار پاني سوقتى. ەكىنشى تايمنىڭ بىتۋىنە 40 مينۋتتاي قالعاندا قازاقستان قۇراماسىنىڭ فۋتبولشىسى داۋرەن نۇرعوجين ەسەپتى تەڭەستىردى.
ال قوسىمشا ۋاقىتتا ءۇشىنشى گولدى قازاقستاندىق فۋتبولشى دۋگلاس سالسا, پورتۋگاليالىق برۋنۋ كوەليۋ ەسەپتى تەڭەستىردى.
قۇرامالار پەنالتي سەرياسىنا مۇمكىندىك الدى. ول 4:3 ەسەبىمەن پورتۋگاليا قۇراماسىنىڭ پايداسىنا شەشىلدى.
ءسويتىپ پورتۋگاليا قۇراماسى الەم چەمپيوناتىنىڭ فينالىنا جولداما الدى. فينالدا ارگەنتينا قۇراماسىمەن كەزدەسەدى.
ال قازاقستان فۋتبولشىلارى 3 قازاندا برازيليا قۇراماسىنا قارسى ويناپ, ءۇشىنشى ورىنعا تالاسادى.
ماتچتان كەيىن فۋتزالدان قازاقستان قۇراماسىنىڭ باس باپكەرى پاۋلو ريكاردو كاكا ويىن تۋرالى پىكىرىن ايتتى.
«ەكى قۇراما دا جاقسى وينادى. ءبىز پەنالتيدە جەڭىلدىك. بۇل (پورتۋگاليا قۇراماسىنىڭ جەڭىسى) – لوتەرەيا ەمەس, ويىن كومپونەنتى. … ءبىزدىڭ جىگىتتەر برازيلياعا قارسى وينايدى. ولار دا وسال قارسىلاس ەمەس. ەندى ەڭ ماڭىزدىسى – جىگىتتەر جاقسى دەمالىپ, كۇش جيناۋى كەرەك», دەدى پاۋلو ريكاردو كاكا.
ال قازاقستان قۇراماسىنىڭ قاقپاشىسى يگيتا ويىن تۋرالى بىلاي دەدى:
«قۇراما الاڭدا جەڭىس ءۇشىن بار كۇشىن سالدى, جاقسى ويىن كورسەتتى. تەك پەنالتيدە ساتتىلىك جەتپەدى. الدا ءالى ويىن بار. قازاقستاندىقتارعا, بىزگە جانكۇيەر بولۋىن توقتاتپاسىن دەگىم كەلەدى. بارىنە العىسىم شەكسىز», دەدى يگيتا.
ايتا كەتەيىك, فۋتزالدان قازاقستان قۇراماسى 2016 جىلى الەم چەمپيوناتىنىڭ 1/8 فينالىندا يسپانيا قۇراماسىنان جەڭىلگەن ەدى.
