كوكشەتاۋدىڭ كۇزى بيىل سالقىن. بوزقىراۋ دا ادەتتەگىدەن ەرتە ءتۇستى. كەيبىر كۇندەرى كۇندىز ءسال شۋاق بولعانىمەن, ءتۇن سۋىق. ونىڭ ۇستىنە وڭمەنىڭنەن وتەتىن سۋىق جەل كۇن سايىن ۇدەتە سوعۋدا. جىلۋ بەرىلمەگەن كوپقاباتتى ۇيلەردىڭ تۇرعىندارى قوڭىر كۇزدە-اق جاۋراي باستادى. «كوكشەتاۋ جىلۋ» كوممۋنالدىق كاسىپورنىنىڭ باس ينجەنەرى دانيار اقىباەۆتىڭ ايتۋىنا قاراعاندا, جازدا قالانىڭ بۋ قازاندىقتارىنا جوندەۋ جۇمىستارى جۇرگىزىلگەن. جىلۋ قالا اكىمىنىڭ تاپسىرماسى بويىنشا 21 قىركۇيەكتەن باستاپ ءىشىنارا بەرىلە باستاعان. العاشقى ون كۇن بويى جىلۋ ماگيسترالىنىڭ بويىنداعى كەم-كەتىك جوندەلىپتى. جيىرما تاۋلىككە جەتەتىن 38,4 مىڭ توننا كومىر بار.
– وبلىس ورتالىعىنداعى 912 كوپ قاباتتى تۇرعىن ءۇيدىڭ 897-ءسىن جىلۋ جۇيەسىنە قوستىق, – دەيدى كوممۋنالدىق كاسىپورىننىڭ جەدەل باسقارۋ قىزمەتىنىڭ باسشىسى ۆالەري مينگۋلوۆ, – ءبىلىم جانە دەنساۋلىق ساقتاۋ سالاسى مەكەمەلەرىنە جىلۋ بەرىلە باستادى. كوپقاباتتى 6 ۇيدە جىلۋ ەسەپتەگىش قۇرالى جوق. 9 قاباتتى تۇرعىن ءۇيدىڭ جەرتولەسى سۋعا تولىپ تۇر. سارىارقا شاعىن اۋدانىندا اۆتوماتتاندىرىلعان جىلۋ بەكەتتەرى قويىلعان. بۇل جەردە جۇمىس ىستەۋگە ءتيىستى ءىت ماماندارى جەتىسپەيدى. م ۇلىك يەلەرىنىڭ بىرلەستىگى مەن پاتەر يەلەرى كووپەراتيۆتەرىنىڭ باسشىلارى قاجەتتى ماماندى ىزدەپ تابۋعا اسىعاتىن ەمەس. بۇل شاعىن اۋداننىڭ كەيبىر تۇرعىن ۇيلەرىندە جىلۋ ەسەپتەگىشتەرى دە جوق. دەمەك, بۇل ۇيلەرگە جىلۋ بەرىلمەيدى.
سونداي-اق ۆاسيلكوۆكا, بىرلىك شاعىن اۋداندارىنىڭ №1, 9, 33 جانە 35 كوپقاباتتى تۇرعىن ۇيلەرىندە, «جانسايا» تۇرعىن ءۇي كەشەنىندە, كوتتەدجدەرگە ورنالاسقان بالاباقشالاردا جىلۋ جوق. سەبەپ, جىلۋ ەسەپتەگىش قۇرالدارى قويىلماعان. بۇل ماسەلە جاز بويى ويلاستىرىلماعاندىقتان, تاياۋ ارادا شەشىلە قويادى دەۋ قيىن. «وركەن» بالاباقشاسى دا جىلۋعا جارىماي وتىر. قىس قاباعىن تۇكسيتىپ كەلە جاتقاندا, الدەقاشان توزىعى جەتكەن جىلۋ قۇبىرلارى ەندى اۋىستىرىلىپ جاتىر. جىلۋدىڭ تولەماقىسى دا جىلدار بويى تولەنبەي, قوردالانىپ قالعان. ءبىز قارىزدىڭ قانشالىقتى ەكەنىن بىلگىمىز كەلىپ «كوكشەتاۋ جىلۋ» كوممۋنالدىق كاسىپورنىنىڭ باسشىلارىنان قانشا مارتە سۇراعانىمىزبەن, ماردىمدى جاۋاپ الا المادىق. قالا باسشىلارى ايتۋعا رۇقسات ەتپەيدى دەيدى. قايتا جاھانعا جار سالىپ بورىشكەرلەردەن قوردالانىپ قالعان قارىزدى ءوندىرىپ السا, ءتاپ-ءتاۋىر قاراجات جيناقتالىپ, وزدەرىنىڭ قولدارى ۇزارىپ قالماي ما؟! سول قاراجاتقا جاز بويى جوندەۋ جۇمىستارىن جۇرگىزۋگە ابدەن بولار ەدى. قازىر قازاندىقتان جىلۋ ايدايتىن سورعىلاردىڭ توزىعى جەتكەندىكتەن, قىسىم جەتكىلىكسىز بولىپ تۇر.
– بۇرىن ءبىزدىڭ شاعىن اۋدان قازاندىققا تىكەلەي قوسىلۋشى ەدى, – دەيدى «التىن» پاتەر يەلەرى كووپەراتيۆىنىڭ توراعاسى اداي ەسەنتۇروۆ. بۇل جۇيە نەگە ەكەنىن كىم ءبىلسىن, جازدىگۇنى بۇزىلىپ تاستالدى. ءبىزدىڭ كووپەراتيۆكە قاراستى كوپقاباتتى 35 تۇرعىن ءۇي ورتالىق جىلۋ جۇيەسىنىڭ قايتقان جەلىسىنە قوسىلدى. قىسىم بولماعاندىقتان, پاتەرلەرگە جىلۋ بەرە الماي وتىرمىز.
كووپەراتيۆ توراعاسىمەن بىرگە جەرتولەگە ءتۇسىپ كوردىك. جىلۋ بەرۋ جۇيەسىندە قانجىلىم عانا جىلۋ بار ەكەن. قىسىم بولماعاندىقتان, سونىڭ ءوزى پاتەرلەرگە كوتەرىلە الماي تۇر. قىس كەلمەي-اق قالتىراپ وتىرعان بىرەر پاتەرگە باس سۇقتىق. تۇرعىندار ارىز-شاعىمدارىن ايتىپ-اق جاتىر.
