وتكەن تاۋلىكتە COVID-19 ىندەتىنە شالدىعۋدىڭ 79 وقيعاسى ورىن الدى. بۇگىندە وبلىستا 433 ادام ارنايى ەمدەۋ مەكەمەلەرىندە ەم قابىلداۋدا. 57 ناۋقاس جان ساقتاۋ بولىمىندە جاتىر. ءبىر الاڭداتارلىعى, سوڭعى ايلاردا مەكتەپ وقۋشىلارىنىڭ ىندەتكە شالدىعۋ وقيعاسى جيىلەپ كەتتى. ايتالىق, وقۋ جىلىنان باستاپ 440 وقۋشى قاتەرلى دەرتتىڭ قارماعىنا ءىلىنىپ وتىر. ونىڭ 158-ءى دەرتتى ءبىلىم وشاعىنان تىس جەرلەردە جۇقتىرعانى انىقتالعان. قاۋىپتىڭ الدىن الۋ ماقساتىندا 76 وقۋ ورنىنىڭ 130 سىنىبى قاشىقتان وقۋعا كوشىرىلگەن. جاڭا وقۋ جىلىنان باستاپ جوعارى وقۋ ورنى ستۋدەنتتەرىنىڭ اراسىندا 64 ادام ىندەتكە شالدىعىپ وتىر. وسى ورايدا ششۋچينسك قالاسىنداعى جوعارى تەحنيكالىق كوللەدجدە – 11, كوكشەتاۋ قالاسىنداعى «ارنا» كوللەدجىندە – 5, ازاماتتىق قورعانىس كوللەدجىندە 4 ىندەتكە شالدىعۋ وقيعاسى تىركەلدى. شوقان ءۋاليحانوۆ اتىنداعى ۋنيۆەرسيتەتتە دە 12 ستۋدەنتتىڭ كوروناۆيرۋس جۇقتىرعانى بەلگىلى بولىپ وتىر.
ىندەتتىڭ الدىن الۋدىڭ جالعىز جولى – ەكپە ەكتىرۋ. وبلىس سپۋتنيك V, سينوفارم, QazVac ۆاكتسيناسىمەن تولىق قامتاماسىز ەتىلگەن. مەملەكەت باسشىسىنىڭ تاپسىرماسىنا وراي, ءتورتىنشى توقساندا Phizer ۆاكتسيناسى جەتكىزىلمەك. وتاندىق ۆاكتسينانىڭ شەتەلدىك ەكپەدەن ەش كەمدىگى جوعى الدەقاشان دالەلدەنگەن. بۇل ارادا كوڭىلدە الاڭداۋشىلىق تۋدىراتىن سەبەپ جوق. ناۋقان باستالعالى وبلىسقا 350 650 دوزا جەتكىزىلىپ, بۇگىنگە دەيىن 282 123 ادام ەكپە الدى. بۇل بارلىق تۇرعىنداردىڭ 68,6 پايىزى. ەكپە الۋدىڭ كورسەتكىشى ءار اۋداندا ءارتۇرلى. دەمەك, ۇيىمداستىرۋ, ماسەلەنىڭ ءمان-جايىنا ەلدىڭ كوزىن جەتكىزىپ, ۇعىندىرۋ جۇمىستارىنىڭ تالاپقا ساي ەمەس ەكەنى ايتپاسا دا تۇسىنىكتى. قورعالجىن جانە جارقايىڭ اۋداندارىنىڭ تۇرعىندارى ماسەلەنىڭ ءمانىسىن جاقسى ءتۇسىنىپ, تۇگەل ەكپە ەكتىرگەن. وسى ورايدا تسەلينوگراد, بۋراباي, زەرەندى اۋداندارى مەن كوكشەتاۋ قالاسىندا ەكپە ەگۋ ءالى دە سىلبىر ءجۇرىپ جاتىر.
شىنتۋايتىندا, وبلىستا ەكپە ەكتىرۋ كورسەتكىشى وتكەن ايمەن سالىستىرعاندا ءبىرشاما تومەندەدى. مامانداردىڭ ايتۋىنا قاراعاندا, ونىڭ نەگىزگى سەبەبى – الەۋمەتتىك جەلىدە ەتەك الىپ كەتكەن جالعان حابارلاردىڭ اسەرى. وسىعان وراي, الەمدە ەكپە ەڭ الدىمەن اۋرۋدىڭ جەڭىل وتۋىنە اسەر ەتىپ, COVID-19 سالدارىنان ناۋقاستاردىڭ شەتىنەۋى ازاياتىنى عىلىمي نەگىزدە دالەلدەنىپ وتىرعانىن تاعى ءبىر قايتالاپ ايتۋعا ءماجبۇرمىز. ءتىپتى مىسالدى الىستان ىزدەۋدىڭ دە قاجەتى جوق. وبلىستا 282 123 ەكپە ەگىلگەن ادامنىڭ نەبارى 125-ءى عانا اۋرۋعا شالدىقتى. بۇل جالپى ەكپە العان حالىقتىڭ 0,04 پايىزى عانا. وسى ارادا ەكپە الدى دەلىنگەنىمەن, جالعان قۇجات جاساتۋشىلاردىڭ دا بولعانىن ەسكەرۋ كەرەك. بالكىم, ەكپە العان سوڭ اۋرۋعا شالدىققاندار سول جالعان قۇجات جاساتۋشىلار بولۋى مۇمكىن. وبلىستا ەكپە الدىم دەپ جالعان قۇجات جاساتۋشىلارعا بىرنەشە قىلمىستىق ءىس قوزعالدى.
قىركۇيەك ايىنىڭ ورتا شەنىنەن باستاپ تۇماۋعا قارسى ەكپە ەگۋ ناۋقانى باستالدى. بيۋدجەت قارجىسى ەسەبىنەن «گريپپول پليۋس» رەسەيلىك ۆاكتسيناسىنىڭ 87 961 دوزاسى الىندى. ۇجىمدىق يممۋنيتەتتى قالىپتاستىرۋ ءۇشىن تۇرعىنداردىڭ كەم دەگەندە 10 پايىزى تۇماۋعا قارسى ەكپە ەكتىرۋگە ءتيىستى. ونىڭ ىشىندە ءبىرىنشى كەزەكتە مەديتسينا قىزمەتكەرلەرى, بالالار, ەسەپتە تۇرعان سوزىلمالى سىرقاتى بار ناۋقاستار ەگىلەدى.
وبلىستا 4 397 نىسان Ashyq پلاتفورماسى ارقىلى جۇمىس ىستەۋدە. جۇمىس بارىسىندا بارلىعى 1 416 ادامنىڭ «قىزىل», 465 ادامنىڭ «سارى» مارتەبەمەن جۇرگەنى انىقتالعان. 419 ادامعا 19,7 ملن تەڭگە كولەمىندە ايىپپۇل سالىندى. جىل باسىنان بەرى 28 237 نىسان كارانتيندىك شارالاردى ساقتاۋعا بايلانىستى تەكسەرىستەن وتكىزىلىپ, 604 مارتە تالاپ بۇزىلعانى انىقتالدى.
اقمولا وبلىسى
