ايماقتار • 29 قىركۇيەك، 2021

الماتىدا 10 جاڭا تۇرعىن ءۇي سالىنىپ جاتىر

70 رەت كورسەتىلدى

الماتىدا تۇرعىن ءۇي قورىن قالپىنا كەلتىرۋ باعدارلاماسى اياسىندا 549 پاتەرلىك 10 جاڭا تۇرعىن ءۇي سالىنىپ جاتىر، دەپ حابارلايدى Egemen.kz.

الماتى قالالىق اكىمدىگىنىڭ مالىمەتىنە سۇيەنسەك، جەتىسۋ اۋدانىنداعى كرىلوۆ-سكريابين-گونچاروۆ-رايىمبەك ۋچاسكەلەرىندە 304 پاتەرلىك، كازاكوۆ-سكريابين-بوتكين-رايىمبەك ۋچاسكەلەرىندە 183 پاتەرلىك 2 كوپ فۋنكتسيونالدى تۇرعىن ءۇي كەشەنىنىڭ قۇرىلىسى 40%-عا اياقتالدى.

سونداي-اق، تۇركسىب اۋدانىنداعى مولداعاليەۆ-ساۋرانباەۆ-چەرنىشەۆسكي-تولستوي كوشەلەرىنىڭ شارشىسىندا 62 پاتەرلىك 3 كوپپاتەرلى تۇرعىن ءۇيدىڭ قۇرىلىسى باستالدى. مۇندا تۇرعان توزىعى جەتكەن ۇيلەردىڭ ورنىنا زاماناۋي تۇرعىن ۇيلەر بوي كوتەرەدى. قۇرىلىس اياقتالعاننان كەيىن بۇدان بۇرىن ولاردا تۇرعان تۇرعىندار جاڭا پاتەرگە كوشەدى.

جاڭا قۇرىلىستار سەيسميكالىق توزىمدىلىكتى ەسكەرە وتىرىپ جانە بارلىق زاماناۋي ستاندارتتارعا سايكەس، ونىڭ ىشىندە، حالىقتىڭ ءجۇرىپ-تۇرۋى شەكتەۋلى توپتارىنىڭ قولجەتىمدىلىگى مەن ءومىر ءسۇرۋىنىڭ ىڭعايلىلىعىن نازارعا الا وتىرىپ جوبالانعان. جاڭا تۇرعىن ۇيلەردەن باسقا، اۋماقتاردا حالىققا قىزمەت كورسەتۋ، الەۋمەتتىك نىساندار سالىنادى، جاڭا جەلىلەر تارتىلادى جانە قوعامدىق كەڭىستىكتەر پايدا بولادى. قۇرىلىستى قارجىلاندىرۋدى جەكە ينۆەستورلار جۇزەگە اسىرادى.

تۇرعىن ءۇيدىڭ جالپى اۋدانى 96 مىڭ شارشى مەتردەن اسادى. العاشقى ۇيلەر 2022 جىلى پايدالانۋعا بەرىلەدى.

ەستەرىڭىزگە سالا كەتەيىك، تۇرعىن ءۇي قورىن قالپىنا كەلتىرۋدىڭ 2021-2025 جىلدارعا ارنالعان باعدارلاماسى الماتى قالاسى اكىمدىگىنىڭ قاۋلىسىمەن بەكىتىلگەن. ونى ىسكە اسىرۋ اياسىندا 708 توزىعى جەتكەن ءۇيدى اۋىستىرۋ جانە ولاردىڭ ورنىندا 683 جاڭا تۇرعىن ءۇي سالۋ كوزدەلگەن.

 

سوڭعى جاڭالىقتار

ددسۇ QazVac-تى قاشان مويىندايدى؟

كوروناۆيرۋس • بۇگىن، 12:35

ۇقساس جاڭالىقتار