وندا قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ يندۋستريالاندىرۋ كارتاسىنىڭ ىسكە اسىرىلۋ بارىسى جايلى ەسەپ بەردى. «2021 جىلى وڭىرلەر جالپى سوماسى 1,23 ترلن تەڭگە بولاتىن 128 جوبانى ىسكە قوسۋدى جوسپارلاپ وتىر. 12 مىڭ تۇراقتى جۇمىس ورنى اشىلادى. جوبالاردىڭ ەڭ كوبى شىمكەنت قالاسىندا – 17 جوبا, قاراعاندى جانە شىعىس قازاقستان وبلىستارىندا - 14 جوبادان», دەگەن مينيستر وسى وڭىرلەردە وڭ سەرپىن بايقالعانىن ايتتى.
يندۋستريالاندىرۋ كارتاسى شەڭبەرىندە قالامىزدا بيىل 17 جوبانى ىسكە اسىرۋ جوسپارلانعان. ونىڭ شەڭبەرىندە 40 ملرد تەڭگە كولەمىندەگى ينۆەستيتسيا تارتىلىپ, 758 جاڭا جۇمىس ورىنى اشىلماق. ونىڭ ىشىندە بيىلعى توعىز ايدا 5 جوبا ىسكە قوسىلىپ, 385 جاڭا جۇمىس ورىنى اشىلدى. تارتىلعان ينۆەستيتسيا كولەمى 12,6 ملرد. تەڭگەنى قۇرايدى. جىل سوڭىنا دەيىن قازاقستانداعى بىرەگەي كاسىپورىن – «KazAlPack» الليۋميني بانكالار ءوندىرىسى ىسكە قوسىلادى. 145 جۇمىس ورنىمەن اشىلاتىن بۇل جوبانى ىسكە اسىرۋعا 23,4 ملرد تەڭگە ينۆەستيتسيا تارتىلعان. جىلدىق قۋاتى 500 ملن دانا قالبىر بانكالار شىعاراتىن كاسىپورىن ەلىمىزدەگى شكى سۇرانىستىڭ 65 پايىزىن قامتاماسىز ەتپەك.
ەلىمىزدىڭ ەنەرگەتيكا مينيسترلىگى ۇيلەستىرۋشىسى بولىپ تابىلاتىن ەنەرگەتيكا سالاسىنداعى رەسپۋبليكالىق يندۋستريالاندىرۋ كارتاسىنا شىمكەنت قالاسىنان 1 جوبا ەنگەن. «شىمكەنت حيميالىق كومپانياسى» جشس-ءنىڭ مەتيل ترەت بۋتيل ەفيرى مەن پروپيلەن ءوندىرىسى كاسىپورنىن قۇرۋ ءۇشىن 25 ملرد تەڭگە ينۆەستيتسيا تارتىلعان. كاسىپورىن 350 ادامدى جۇمىسپەن قامتىپ, جىلىنا 57 مىڭ توننا ءونىم شىعارماق. كاسىپورىن كەلەسى جىلى ىسكە قوسىلاتىن بولادى.
مەملەكەت باسشىسى قازاقستان حالقىنا ارناعان جولداۋىندا 2025 جىلعا قاراي وڭدەۋشى ونەركاسىپ ەكسپورتىن 1,5 ەسە, ەڭبەك ونىمدىلىگىن 30 پايىزعا ۇلعايتۋ مىندەتىن بەلگىلەدى. يندۋستريالاندىرۋ كارتاسىنىڭ جوبالارىن ۋاقتىلى ءارى ساپالى ىسكە اسىرۋ وسى مىندەتتەرگە قول جەتكىزۋدى قامتاماسىز ەتەدى.
