«الدىمەن نۇر-سۇلتان قالاسىنىڭ ءالى دە بولسا «قىزىل» ايماقتا ەكەنىن ۇمىتپاعان ءجون. ال توي-تويمالاق جاساۋعا بەرىلگەن رۇقساتقا كەلسەك, شاعىن جانە ورتا بيزنەس وكىلدەرى تاراپىنان كوپتەگەن وتىنىشتەر كەلىپ ءتۇستى.
باق وكىلدەرىن مەملەكەتتىك ورگانداردا ءوتىپ جاتقان شارالارعا تىكەلەي كىرگىزبەۋ - اقپارات الۋدا شەكتەۋ قويۋ دەۋگە بولمايدى. بىزدە باق-تىڭ جۇمىسىنا كەدەرگى كەلتىرىپ, شەك قويۋ دەگەن ماسەلە جوق. پارلامەنت, ۇكىمەت ۇيىندە ءوتىپ جاتقان بارلىق ءىس-شارالار جۇرتشىلىققا ونلاين تاراتىلادى», دەدى قر پرەمەر-ءمينيستردىڭ ورىنباسارى ەرالى توعجانوۆ ۇكىمەت ۇيىندە ونلاين وتكەن ءباسپاسوز ءماسليحاتىندا.
سونداي-اق, پرەمەر-مينيستر ورىنباسارى ەلىمىزدە كارانتين تالاپتارى بار ەكەنىن تاعى ءبىر ەسكە سالىپ, ماسكا تاعۋ جانە الەۋمەتتىك اراقاشىقتىقتى ساقتاۋعا شاقىردى.
«تىلشىلەردىڭ اقپارات الۋىنا قاتىستى شەكتەۋلەر جوق. قاجەت جاعدايدا ءتيىستى ورگانعا رەسمي ساۋال جولداي الادى, ودان بولەك, كۇندەلىكتى ونلاين ءباسپاسوز ءماسليحاتى ۇيىمداستىرىلىپ جاتىر.
ونىڭ بارىسىندا باق وكىلدەرى ءوز ساۋالدارىن قۇزىرلى ورگان وكىلدەرىنە تىكەلەي قويا الادى. بۇگىندى تاڭدا سانيتارلىق تالاپتاردى ساقتاي وتىرىپ, تىلشىلەردىڭ تىكەلەي قاتىسۋىمەن ءباسپاسوز ءماسليحاتىن وتكىزۋ ماسەلەسى قارالىپ جاتىر», دەيدى ول.
سول سياقتى ەرالى توعجانوۆ الداعى ۋاقىتتا تىلشىلەردىڭ قاتىسۋىمەن وتەتىن ءىس-شارالارعا Ashyq جۇيەسىمەن كىرگىزىلەتىنىن ەسكەرتتى.
