ارمەنيا كەدەن وداعىنا (وعان رەسەي, قازاقستان جانە بەلورۋسسيا مۇشە) كىرگىسى كەلەتىنىن مالىمدەدى. ءتىپتى بۇل جونىندە ارمەنيا پرەمەر-ءمينيسترى تيگران ساركسيان رەسەي ۇكىمەتى باسشىسىنىڭ ءبىرىنشى ورىنباسارى يگور شۋۆالوۆپەن كەلىسسوز دە جۇرگىزىپتى.
بىراق بۇل ەل وداققا مۇشە مەملەكەتتەردىڭ ەشقايسىمەن شەكارالاس ەمەس. ارمەنيا رەسەيدىڭ باسقا ەلدەردىڭ ورتاسىندا جاتقان كالينينگراد وبلىس-انكلاۆىنىڭ جاعدايىندا بولماق. سونداي-اق بۇكىلالەمدىك ساۋدا ۇيىمى دا ءوز مۇشەلەرىنىڭ باسقاداي كەدەندىك وداققا كىرگەنىن قۇپتامايدى. ال ارمەنيا – بسۇ-عا مۇشە. دەمەك, ماسەلە كوپ.
پارلامەنتتەگى توبەلەس
ۋكراينا پارلامەنتى – جوعارعى رادادا وركەنيەتتى ەلگە جاراسپايتىن جاعداي بولدى: رەسەيدىڭ قارا تەڭىزدەگى فلوتىنىڭ قىرىمدا بولۋى جونىندەگى كەلىسىمدى تالقىلاۋدى دەپۋتاتتار كوشە بۇزاقىلارىنشا توبەلەسكە اينالدىردى. اۋزى-مۇرنى قاناعاندار ءوز الدىنا, پارلامەنتتىڭ جۇمىسىنا جول بەرمەس ءۇشىن بارريكادالار ۇيىمداستىردى. مۇنىڭ ءبارىن الەم تەلەارنالارى ءبىرىنشى كەزەكتە كورسەتىپ جاتتى. ەلدىڭ ابىرويىن تۇسىرەتىن مۇنداي ارەكەتتەرگە بارعان دەپۋتاتتارعا جازا قولدانۋ جولىن دا ىزدەستىرگەن ءجون-اۋ دەيسىڭ.
ەسىرگەندەر ەسكەرتەدى
بەلگىسىز بىرەۋلەر Facebock الەۋمەتتىك جەلىسىنە سەربيا پرەزيدەنتى بوريس ءتاديچتى قورقىتقان جولداۋ ورنالاستىرىپتى. ەلدىڭ قۇقىق قورعاۋ ورگاندارى وعان شىنداپ قاراۋ كەرەكتىگىن مالىمدەپ وتىر. ىشكى ىستەر مينيسترلىگى Facebock جەلىسىنەن الگى قورقىتۋشىلاردىڭ مەكەن-جايىن سۇراپتى. مۇنداي قورقىتۋلار بۇرىن دا بولعان ەكەن. ىشكى ىستەر ءمينيسترى يۆيتسا داچيچ تە ەسىرتكى كارتەلدەرىنەن وسىنداي قورقىتۋلار الىپتى. 2003 جىلى پرەمەر-مينيستر زوران دجيندجيچ سونداي قورقىتۋدان كەيىن مەرگەننىڭ وعىنان قازا تاپقان ەدى.
جوق ەلدىڭ پرەزيدەنتى بار
جاقىندا سۋداندا پرەزيدەنت سايلاۋى ءوتتى. قازىرگى ەل پرەزيدەنتى ومار حاسان ءال-باشير جەڭىسكە جەتتى. ول سايلاۋ ارقىلى, مىنە, 24 جىل بيلىك تىزگىنىن ۇستاپ كەلەدى. سونداي-اق ول حالىقارالىق قىلمىستىق سوت اسكەري قىلمىسى ءۇشىن ىزدەۋ سالعان بىردەن-ءبىر مەملەكەت باسشىسى. بىراق ءال-باشير ءوز ەلىنە تولىق بيلىك قۇرماۋى مۇمكىن. وڭتۇستىك سۋداننىڭ حالقى 92,99 پايىزبەن سالۆا كيردى پرەزيدەنت سايلادى. سۋداندا ءبىرازدان كەيىن رەفەرەندۋم وتەدى. وندا وڭتۇستىك سۋداننىڭ تاۋەلسىزدىگى تۋرالى ماسەلە شەشىلەدى. وندا وڭتۇستىك تاۋەلسىزدىك السا, ونىڭ پرەزيدەنتى دايىن.
بريتانيا بايلارى – باسقالار
“Sunday ءTىmes” گازەتى ۇلىبريتانيانىڭ ەڭ باي ادامدارىنىڭ ءتىزىمىن ءتۇزىپتى. ونىڭ باسىندا ۇندىستاندىق بيزنەسمەن لاكشمي ميتتال (34,4 ميلليارد دوللار) مەن رەسەيلىك بيزنەسمەن رومان ابراموۆيچ (11,4 ميلليارد دوللار) تۇر. ەڭ باي دەگەن اعىلشىن ۆەستمينيستر گەرتسوگى جەرالد كابەنديچ گروسۆەنور عانا ءۇشىنشى ورىندا (10,3 ميلليارد دوللار) ەكەن.
چاۆەس نە ايتپايدى
ۆەنەسۋەلانىڭ ايقايى كوپ پرەزيدەنتى ۋگو چاۆەس كورشىسى كولۋمبيانى اقش-تىڭ بارلاۋشىلىق وپەراتسيالارىنا قاتىسىڭ بار دەپ ايىپتادى. وعان نەگىز – ۆەنەسۋەلانىڭ بارلاۋشىلارى كولۋمبيانىڭ جەرىنەن اقش ۇشاقتارىن كورىپ قالىپتى. دەمەك, ولار اقش-تىڭ ۆەنەسۋەلاعا قارسى ارەكەتىن قولدايدى. كولۋمبيا جاعى دا, اقش جاعى دا چاۆەستىڭ ايقاي ايىبىنا جاۋاپ تا بەرمەگەن. ءسىرا, ولار چاۆەس نە ايتپايدى دەسە كەرەك.
قىسقالارعا قىسپاق
نەمىستىڭ اۆتوكولىكتى پايدالانۋعا بەرەتىن ءبىر كومپانياسى وزدەرىنىڭ جارناماسىندا فرانتسيا پرەزيدەنتى نيكوليا ساركوزيدىڭ بويىنىڭ الاسالىعىن ءاجۋا ەتىپتى: “مادام برۋني سياقتى وزدەرىڭىزگە قىپ-قىسقا فرانتسۋز الىڭىزدار” دەگەن ءسوز جازىلعان حەتچبەك شىعارىپتى. ارتىق كەتكەندەرىن اڭعارعان ءSىxt كومپانياسى كەيىن كەشىرىم سۇراعانداي, بۇل جاي ءازىل ەدى دەپ اقتالىپتى. ال اڭگىمە ەل باسشىلارى بويىنىڭ قىسقالىعى تۋرالى بولسا, كحدر كوسەمى كيم چەن ير مەن رەسەي پرەزيدەنتى دميتري مەدۆەدەۆ ساركوزيدەن دە الاسا ەكەن.
بەتىڭدى اشىپ ءجۇر
بەلگيا پارلامەنتىنىڭ تومەنگى پالاتاسى قوعامدىق ورىنداردا ءپارانجى جانە حيدجاب كيىپ جۇرۋگە تىيىم سالعان زاڭ قابىلدادى. بۇل زاڭدى قولداپ 150 دەپۋتاتتىڭ 148-ءى قول كوتەرىپتى. زاڭدى بۇزعاندارعا 15-25 ەۋرو ايىپ سالىنادى, ايتپەسە 7 كۇنگە دەيىن قاماۋعا الىنادى. بۇل زاڭنىڭ قابىلدانۋىنىڭ باستى سەبەبى – بەتىن جاپقان ادامدى تانۋعا بولمايدى, سوندىقتان ول قوعامدىق قاۋىپسىزدىككە نۇقسان كەلتىرۋى مۇمكىن. بۇل زاڭ كۇشىنە ەنۋى ءۇشىن ونى پارلامەنت سەناتى دا قولداۋى كەرەك. بۇل زاڭعا قارسىلار دا بار – ونى ادام قۇقىنا قايشى دەيدى ولار.
ازىرلەگەن ماماديار جاقىپ.
