ماۋلەن اشىمباەۆ قازاقستان پرەزيدەنتى قاسىم-جومارت توقاەۆ پەن تۇركيا پرەزيدەنتى رەجەپ تايىپ ەردوعان ەكى ەلدىڭ ءوزارا قارىم-قاتىناسىن دامىتۋعا ەرەكشە نازار اۋدارىپ وتىرعانىن اتاپ ءوتتى. تۇڭعىش پرەزيدەنت – ەلباسى نۇرسۇلتان نازارباەۆ مەملەكەتتەرىمىز اراسىنداعى باۋىرلاستىق بايلانىستاردى ودان ءارى نىعايتۋعا باسا كوڭىل ءبولىپ كەلەدى.
تاراپتار ىنتىماقتاستىقتىڭ قازىرگى جوعارى دەڭگەيىن ەكىجاقتى جانە كوپجاقتى سيپاتتاعى پارلامەنتتىك ديپلوماتيا اياسىندا نىعايتۋدى جالعاستىرۋ ماڭىزدى دەگەن ورتاق پىكىرگە كەلدى.
«الداعى كەزەڭدە بىزگە ەكى ەل پارلامەنتتەرى اراسىنداعى ءوزارا قارىم-قاتىناستى نىعايتۋدىڭ ماڭىزى زور. ءبىز سالالىق كوميتەتتەردىڭ ىنتىماقتاستىق توپتارىنىڭ كەزدەسۋلەرىن تۇراقتى وتكىزىپ, دوڭگەلەك ۇستەلدەر ۇيىمداستىرىپ, زاڭنامالىق تاجىريبەمەن بولىسە الامىز. مۇنداي الاڭداردا ەكىجاقتى قارىم-قاتىناستاردى دامىتۋ مەن حالىقارالىق كۇن ءتارتىبى بويىنشا ورتاق ۇسىنىستاردى تالقىلاۋعا جانە قالىپتاستىرۋعا بولادى», دەدى ماۋلەن اشىمباەۆ.
تاراپتار اڭگىمە بارىسىندا لوگيستيكا, تسيفرلىق تەحنولوگيا, عارىش, تۋريزم, مادەنيەت, ءبىلىم بەرۋ جانە ساۋدا-ەكونوميكالىق قاتىناستار سالالارىنداعى ارىپتەستىكتى دامىتۋدىڭ كەلەشەگىن تالقىلادى.
سەنات توراعاسى ماۋلەن اشىمباەۆ كەزدەسۋ سوڭىندا قازاقستان مەن تۇركيا اراسىنداعى دوستىق قارىم-قاتىناستاردى نىعايتۋعا قوسقان زور ۇلەسى ءۇشىن ارىپتەسىنە العىس ايتىپ, بۇل ساپار پارلامەنتارالىق ىنتىماقتاستىققا جاڭا سەرپىن بەرەتىنىنە سەنىم ءبىلدىردى.
