الەم • 24 قىركۇيەك، 2021

ۋكراينا وليگارحتار ىقپالىن شەكتەيتىن زاڭ قابىلدادى

13 رەت كورسەتىلدى

ۋكراينانىڭ جوعارعى راداسى ۋكراينالىق وليگارحتاردىڭ ساياسي جانە ەكونوميكالىق ىقپالىن شەكتەۋ تۋرالى زاڭ قابىلدادى، دەپ حابارلايدى Egemen.kz.

بۇل تۋرالى Deutsche Welle اگەنتتىگى مالىمدەدى.

279 دەپۋتات «ەكونوميكالىق نەمەسە ساياسي سالماعى ەلەۋلى ادامداردىڭ (وليگارحتاردىڭ) شامادان تىس اسەر ەتۋىمەن بايلانىستى ۇلتتىق قاۋىپسىزدىككە تونەتىن قاتەرلەرگە قارسى ءىس-قيمىل تۋرالى» زاڭدى قولداپ داۋىس بەردى. ەندى زاڭ جوباسى ەل پرەزيدەنتى ۆلاديمير زەلەنسكيدىڭ ماقۇلداۋىنا جىبەرىلەدى.

زاڭعا سايكەس، پرەزيدەنت، پرەمەر-مينيستر جانە ورتالىق بانكتىڭ باسشىسى سياقتى جوعارى لاۋازىمدى تۇلعالار وليگارح دەپ تانىلعان ادامدارمەن كەز كەلگەن مامىلەنى جاريالاۋى كەرەك. زاڭ وليگارحتى انىقتاپ، بيلىككە وسى كريتەريلەرگە سايكەس كەلەتىن ادامداردى انىقتاۋعا مۇمكىندىك بەرەدى. قۇجاتتىڭ جارامدىلىق مەرزىمى شەكتەۋلى 10 جىل ەكەنى كورسەتىلگەن.

وليگارحتارعا ساياسي پارتيالاردى قارجىلاندىرۋعا نەمەسە مەملەكەتتىك اكتيۆتەردى جەكەشەلەندىرۋگە تىيىم سالىنادى. زەلەنسكيدىڭ ايتۋىنشا، بۇل ەرەجەلەر ۋكراينانى ونداعان جىلدار بويى ەلدىڭ ساياسي جۇيەسىن بۇلدىرگەن قۋاتتى كاسىپكەرلەردەن قورعاۋ ءۇشىن قاجەت.

زاڭ ۋكراينادا ۇلتتىق قاۋىپسىزدىك جانە قورعانىس كەڭەسى (ۇقكك) قۇراستىراتىن ارنايى «وليگارحتاردىڭ ءتىزىلىمىن» قۇرۋدى كوزدەيتىنى ايتىلدى.

ەسكە سالايىق، ۋكراينا پرەزيدەنتى ماۋسىم ايىنىڭ باسىندا پارلامەنتكە وليگارحتار تۋرالى زاڭ جوباسىن ۇسىنعان بولاتىن. پرەزيدەنت اكىمشىلىگى بۇل زاڭ جوباسى وليگارح انىقتاماسىنا جاتاتىن ادامداردىڭ نەگىزگى قۇقىقتارىن بۇزبايدى، تەك وسى ادامداردىڭ شەڭبەرىن انىقتايدى جانە ولاردىڭ مەملەكەتتىك قىزمەتكەرلەرمەن اشىق قارىم-قاتىناس ەرەجەلەرىن بەكىتەدى دەپ حابارلادى.

 

سوڭعى جاڭالىقتار

6 ءوڭىر «جاسىل» ايماقتا تۇر

كوروناۆيرۋس • كەشە

دەپۋتاتتى پىشاقتاپ كەتتى

الەم • 15 قازان، 2021

شەتەلدىك ۆاكتسينالار اقىلى بولادى

كوروناۆيرۋس • 15 قازان، 2021

ۇقساس جاڭالىقتار