وقيعا • 24 قىركۇيەك، 2021

ەر ادام 5 جىل بۇرىن اجىراسقان ايەلىن پىشاقتاپ تاستادى

20 رەت كورسەتىلدى

قوستاناي وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى 33 جاستاعى دارينا احماديەۆانىڭ ولىمىنە قاتىستى اتىشۋلى ءىستى قاراپ جاتىر، دەپ حابارلايدى Egemen.kz.

وسى جىلدىڭ 16 ماۋسىمىندا جۇمىستان شىققان ايەلدى بۇرىنعى كۇيەۋى ازامات مولداحمەتوۆ قۋىپ جەتىپ، كەزەكتى جانجال ۇستىندە دەنەسىنىڭ بىرنەشە جەرىنە پىشاق سالعان. مويىن ارتەرياسىنا تۇسكەن جاراقاتتىڭ تەرەڭ بولۋى سەبەبىنەن دارينا احماديەۆا جەدەل جاردەم كولىگىندە جان تاپسىردى. دارينانىڭ ارتىندا 11 جاسار ۇلى قالعان.

5 جىلدان بەرى ايەلىنىڭ سوڭىنا تۇسكەن ازامات مولداحمەتوۆ بۇرىنعى ايەلىن پىشاقتاعان سوڭ ءوز ىشىنە پىشاق سالعان. ونى ەكىنشى جەدەل جاردەم بريگاداسى اۋرۋحاناعا جاتقىزىپ، قالالىق اۋرۋحانانىڭ حيرۋرگتەرى وتا جاسادى.

جانتۇرشىگەرلىك وقيعادان كەيىن قر قك 99 -بابى «ادام ءولتىرۋ» بويىنشا ءىس قوزعالدى.

سوت الدىندا جابىرلەنۋشى دەپ تانىلعان مارقۇم دارينا احماديەۆانىڭ اپكەسى اسەل شامعانوۆا ءسىڭلىسىنىڭ وتباسىندا تابىستىڭ بولماۋى مەن كۇيەۋى تاراپىنان بولعان قىزعانىشتىڭ سالدارىنان وتباسىن ساقتاپ قالۋ مۇمكىن بولماعاندىعىن جەتكىزدى. الايدا ءسىڭلىسىنىڭ بۇرىنعى كۇيەۋىنە بالاسىمەن قارىم-قاتىناس جاساۋعا تىيىم سالماعانىن، سوڭعى كەزدەرى  دارينا احماديەۆاعا سەنى ولتىرەمىن دەپ ءجيى جازعانىن ايتتى. 

سوتتالۋشى ازامات مولداحمەتوۆ ءوز كەزەگىندە بالاسى 8 جاسقا تولعاندا 2 اي كورۋگە مۇمكىندىك بەرمەگەنىن ايتىپ، قىلمىسىن تولىق مويىنداعان.

بۇگىندە تەرگەپ-تەكسەرۋ امالدارى جالعاسىپ جاتىر.

 

 

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار