اۋىل شارۋاشىلىعى مينيسترلىگىنىڭ مالىمەتىنشە, 197,8 مىڭ توننا مايلى داقىل, 2 142,7 مىڭ توننا كارتوپ, 3 730,1 مىڭ توننا كوكونىس داقىلدارى, 2 581,3 مىڭ توننا باقشا داقىلدارى جينالعان. ەگىن ەگەتىن نەگىزگى ءۇش ءوڭىر – اقمولا, قوستاناي جانە سولتۇستىك قازاقستان وبلىستارىندا 10,6 ملن گەكتار ەگىن القابى جينالىپتى. بۇل جالپى الاڭنىڭ 91,4 پايىزى. ورتاشا ونىمدىلىك گەكتارىنا 8,4 تسەنتنەردى قۇراپ, جينالعان ءونىم 8,9 ملن تونناعا جەتتى.
«استىقتىڭ جالپى ءتۇسىمى 15,3 ملن تونناعا جەتەدى دەگەن بولجام بار. سونىڭ ىشىندە بيدايدىڭ ءتۇسىمى 10,5 ملن تونناعا جۋىقتاۋى مۇمكىن. ۇلتتىق ستاتيستيكا بيۋروسىنىڭ دەرەكتەرىنە سايكەس 2021 جىلدىڭ 1 تامىزىنداعى جاعداي بويىنشا رەسپۋبليكادا ءداندى جانە ءداندى-بۇرشاقتى داقىلدار 3,5 ملن توننا, ونىڭ ىشىندە بيداي 2,8 ملن توننا بولعان. وتكەن جىلدان قالعان استىقتى ەسەپتەگەندە شامامەن 18,8 ملن توننا استىق بار. ونىڭ 13,3 ملن تونناسى – بيداي. استىقتىڭ قاجەتتىلىك ەسەپتەرىنە سايكەس ىشكى تۇتىنۋعا 7,6 ملن توننا بيداي, ونىڭ ىشىندە ازىق-ت ۇلىك قاجەتتىلىكتەرىنە 3 ملن توننا, جەمگە 2 ملن توننا, تۇقىمعا 1,8 ملن توننا, ونەركاسىپتىك وڭدەۋگە 0,8 ملن توننا استىق قاجەت», دەلىنگەن مينيسترلىك مالىمدەمەسىندە.
بيدايدىڭ ەكسپورتتىق الەۋەتى ۇندى قوسا ەسەپتەگەندە شامامەن 5,5-6 ملن توننا كولەمىندە باعالانىپ وتىر. كوكتەمگى ەگىس جانە كۇزگى جيىن-تەرىن جۇمىستارىن جۇرگىزەتىن فەرمەرلەرگە مەملەكەتتىك قولداۋ كورسەتۋ اياسىندا قارجى جەتكىلىكتى دەڭگەيدە بولىنەدى. ازىق-ت ۇلىك كەلىسىمشارت كورپوراتسياسى اۋىل شارۋاشىلىعى ونىمدەرىن فورۆاردتىق ساتىپ الۋدى جۇزەگە اسىرماق.
سونداي-اق ۆەدومستۆو مينەرالدى تىڭايتقىش, تۇقىم, پەستيتسيد ساتىپ العان شارۋالارعا سۋبسيديا بەرەدى جانە سۋارمالى جەرگە جۇمسالاتىن سۋ شىعىنىنىڭ ءبىر بولىگىن وتەيدى. ينۆەستيتسيالىق سۋبسيديا باعدارلاماسى اياسىندا تەحنيكا ساتىپ العان, اۋىل شارۋاشىلىعى ونىمدەرىن ساقتاۋ جانە قايتا وڭدەۋ وبەكتىلەرىن قۇرعان, جىلىجايلار مەن وسىمدىك باقتارىن سالعان, سۋارۋ جۇيەلەرىن قۇرعان ءارى كەڭەيتكەن جانە تاعى باسقا دا ىرگەلى ىستەردى قولعا العان فەرمەرلەر شىعىندارىنىڭ ءبىر بولىگى وتەلەدى.
ەگىن جيناۋ جۇمىستارىن ۋاقتىلى اتقارۋ ءۇشىن فەرمەرلەرگە 396,5 مىڭ توننا جەڭىلدەتىلگەن ديزەل وتىنى بولىنگەن. 2021 جىلدىڭ 16 قىركۇيەگىندەگى جاعداي بويىنشا 247,5 مىڭ توننا جەتكىزىلىپتى. مۇناي وڭدەۋ زاۋىتىنداعى وتىننىڭ ءليترى 156 تەڭگە (تونناسى 189,0 مىڭ تەڭگە), وپەراتورلاردىڭ جەتكىزۋ قىزمەتىنىڭ قۇنىن قوسا ەسەپتەگەندە دە ديزەل وتىنىنىڭ وڭىرلەردەگى ورتاشا باعاسى قىمبات ەمەس. شارۋالار ونىڭ ءبىر ءليترىن 177 تەڭگەدەن الادى.
«رەسپۋبليكادا 28,8 ملن توننا استىق ساقتايتىن مۇمكىندىك بار. ونىڭ ىشىندە استىق قابىلداۋ كاسىپورىندارىندا 12 ملن توننا, فەرمەرلەردە 16,8 ملن توننا استىق ساقتايتىن ورىن بار. بيىلعى ەگىن جيناۋ ناۋقانى شتاتتىق رەجىمدە جانە جوسپارلانعان كەستەگە سايكەس ءجۇرىپ جاتىر. جۇمىستى ۋاقىتىندا اتقارۋعا قاتىستى بارلىق ماسەلە مينيسترلىكتىڭ تۇراقتى باقىلاۋىندا. ءتيىستى مونيتورينگ پەن تالداۋ جاسالىپ وتىرادى», دەپ حابارلادى ۆەدومستۆو.
