ەكونوميكا • 23 قىركۇيەك، 2021

23،2 ملن توننا ءشوپ دايىندالدى – اشم

32،8 ميلليون باستان استام مالدى قىستان امان-ەسەن الىپ شىعۋ ءۇشىن وبلىس اكىمدىكتەرىمەن بىرلەسىپ جەم-ءشوپ دايىنداۋ جوسپارى ايقىندالدى. بۇل تۋرالى قر اۋىل شارۋاشىلىعى مينيسترلىگى مالىمدەدى، دەپ حابارلايدى Egemen.kz.

دانا مىرزاقادىر

«مالعا بەرەتىن ەكپە ءشوپ القابى 3،2 ملن گەكتاردى قۇرايدى. بۇل وتكەن جىلمەن سالىستىرعاندا 13 مىڭ گەكتارعا ارتىق. ال مالعا جەم رەتىندە بەرىلەتىن داقىلداردىڭ ەگىس القابى 2،6 ملن گەكتار. 2021 جىلدىڭ 22 قىركۇيەگىندەگى جاعداي بويىنشا 23،2 ملن توننا ءشوپ جينالدى. بۇل جوسپاردىڭ (23،8 ملن توننا) 98%-عا ورىندالعانىن كورسەتەدى. بۇدان بولەك، 1،5 ملن توننا (94%) پىشەندەمە، 1 ملن توننادان استام (53%) سۇرلەم، 2،9 ملن توننا (61%) سابان دايىندالدى»، دەلىنگەن مينيسترلىك مالىمەتىندە.

بيىلعى اۋا رايىنىڭ قولايسىزدىعى مال ازىعى قورىن جيناۋعا ەداۋىر قيىندىق تۋعىزدى. اتاپ ايتقاندا، قۇرعاقشىلىقتىڭ كەسىرىنەن جايىلىمداردىڭ باسىم بولىگى قۋراپ قالدى، تابيعي شابىندىق جەرلەردە دە ءشوپ قالىڭ بولمادى.

«جاعدايدى تۇراقتاندىرۋ ءۇشىن مينيسترلىك ناقتى شارالار قابىلداۋدا. جەم-ءشوپ دايىنداۋ ماسەلەلەرى بويىنشا جەرگىلىكتى جانە ورتالىق اتقارۋشى ورگانداردىڭ قىزمەتىن ۇيلەستىرۋ جونىندەگى رەسپۋبليكالىق جەدەل شتاب قۇرىلىپ، جۇمىس ىستەپ جاتىر. قۇرعاقشىلىقتان زارداپ شەككەن ايماقتارعا قارجىلاي كومەك كورسەتىلدى. ماسەلەن، ماڭعىستاۋ مەن قىزىلوردا وبلىستارىنداعى جەم-ءشوپ ساتىپ الۋعا جۇمسالعان شىعىنداردى وتەۋگە ۇكىمەت رەزەرۆىنەن 3،6 ملرد تەڭگە ءبولىندى. بۇگىنگى تاڭدا ماڭعىستاۋ وبلىسىندا 1،2 ملرد تەڭگە يگەرىلىپ، 632 شارۋا قوجالىعى مەن 6021 جەكە قوسالقى شارۋاشىلىقتىڭ شىعىنى تولەندى. قىزىلوردا وبلىسىنا 1،7 ملرد تەڭگە ءبولىنىپ، ونىڭ 1 ملرد تەڭگەسى 692 شارۋا قوجالىعىنىڭ شىعىنىن وتەۋگە جۇمسالدى»، دەپ اتالىپ وتكەن حابارلامادا.

ماڭعىستاۋ وبلىسىنىڭ اكىمدىگى جەرگىلىكتى بيۋدجەتتەن ءشوپ پەن جەم ساتىپ الۋعا قوسىمشا 5،3 ملرد تەڭگە (1،9 ملرد تەڭگە – 26 مىڭ توننا ءشوپ ساتىپ الۋعا جانە 3،4 ملرد تەڭگە – 34 مىڭ توننا جەم ساتىپ الۋعا) ءبولدى. مال ازىعى قۇنىنىڭ قىمباتتاۋىنا بايلانىستى بىرقاتار وبلىس اكىمدىكتەرى (اقتوبە، قوستاناي، پاۆلودار، سقو، اتىراۋ، شىمكەنت ق.) جەم-ءشوپ ساتىپ الۋ قۇنىن ارزانداتۋ ءۇشىن جەرگىلىكتى بيۋدجەتتەن 13،6 ملرد تەڭگە قارجى ءبولدى. اقتوبە وبلىسى بيىل 6،7 ملرد تەڭگە ءبولىپ، وبلىستىڭ بارلىق اگروقۇرىلىمدارىن سۋبسيديامەن قامتىدى.

بيىل تامىز ايىنىڭ 23-ىنەن باستاپ مالعا بەرەتىن ءشوپ تۇرلەرىن رەسپۋبليكا اۋماعىنان شىعارۋعا ۋاقىتشا تىيىم سالىندى. سونداي-اق مالعا جەم رەتىندە بەرەتىن داقىلدار ەكسپورتىن كۆوتالاۋ جونىندەگى بۇيرىقتىڭ جوباسى ازىرلەندى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز