قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ فورۋم قاتىسۋشىلارىنا بەينەۇندەۋ جولداپ, جوبانى ودان ءارى جالعاستىرۋ قاجەتتىگىن اتاپ ءوتتى. ەلباسى «باستاۋ بيزنەس» باعدارلاماسىنا جوعارى باعا بەردى.
«وقۋ اياقتالعاننان كەيىن بيزنەس-ترەنەرلەر جىل بويى كاسىپكەرلەردىڭ جوبالارىنا جەتەكشىلىك ەتەدى. ءىسىن جاڭا باستاعان كاسىپكەردىڭ پروبلەماسىن شەشۋگە كومەكتەسەدى. بۇل, اسىرەسە, بيزنەسكە جاھاندىق پاندەمياعا بايلانىستى قاتتى قىسىم تۇسكەن كەزدە وتە قاجەت. ەلىمىزدىڭ گۇلدەنۋى ازاماتتاردىڭ ءال-اۋقاتىنا تىكەلەي بايلانىستى. سوندىقتان مەن جوعارى باعالايتىن «باستاۋ بيزنەس» باعدارلاماسىنىڭ بارلىق قاتىسۋشىسىنا ساتتىلىك تىلەيمىن. ەل بويىنشا بۇل باعدارلامانى جالعاستىرۋ كەرەك», دەدى نۇرسۇلتان نازارباەۆ.
ەلباسى جوبا كاسىپكەرلىك نەگىزدەرىنە ۇيرەتۋ ارقىلى عانا ەمەس, سونىمەن قاتار «ەڭبەك» باعدارلاماسى اياسىندا جەڭىلدەتىلگەن ميكروكرەديت نەمەسە گرانت ۇسىنۋىمەن تانىمال بولعانىن جەتكىزدى. 2021 جىلدان باستاپ «اتامەكەن» اۋىل ازاماتتارىن كاسىپكەرلىك نەگىزدەرىنە وقىتىپ قانا قويماي, بيزنەس-جوبالاردى قارجىلاندىرادى ءارى سۇيەمەلدەيدى. ول ءۇشىن ەل بويىنشا 15 ميكروقارجى ۇيىمى قۇرىلدى. جەڭىلدىكپەن كرەديت بەرۋ ءۇشىن مەملەكەت 22,5 ملرد تەڭگە ءبولدى.
«اتامەكەننىڭ» تورالقا توراعاسى تيمۋر ق ۇلىباەۆ قازىر وتىنىمدەردى قاراۋ جانە قاراجات بەرۋ بويىنشا جۇمىس قارقىندى ءجۇرىپ جاتقانىن اتاپ ءوتتى.
– «اتامەكەن» ميكروقارجى ۇيىمدارىنا 2 مىڭعا جۋىق ءوتىنىم ءتۇستى. بەرىلگەن ميكروكرەديت ناتيجەسى بويىنشا 5 مىڭنان اسا كاسىپورىن مەن كەمىندە 10 مىڭ جۇمىس ورنىنىڭ اشىلۋى, سونداي-اق بيۋدجەتكە تولەنەتىن سالىق تولەمىنىڭ ۇلعايۋى كۇتىلۋدە. بەس جىل ىشىندە «باستاۋ بيزنەس» ناعىز حالىقتىق جوباعا اينالدى. اسىرەسە اۋىلدىق جەرلەردە جۇزدەگەن مىڭ قازاقستاندىقتىڭ ءومىرىن وزگەرتۋگە مۇمكىندىك بەردى دەپ سەنىممەن ايتا الامىز. ەلدى مەكەندەردە جوباعا دەگەن سۇرانىس جوعارى, – دەدى ت.ق ۇلىباەۆ.
بيىل «باستاۋ بيزنەس» جوباسى بويىنشا 30 مىڭ قازاقستاندىق ءبىلىم العان. ولاردىڭ قاتارىندا ەلوردالىق تاتيانا كۋسنۋتدينوۆا دا بار. ول وڭالتۋ ورتالىعىن اشقان. تاتيانانىڭ بالاسىنا دارىگەرلەر اۋتيزم دياگنوزىن قويعان ەكەن. 15 جىلدىق تاجىريبەسى بار پەداگوگ بىرنەشە جىل بۇرىن بالاسىن وڭالتۋ ءۇشىن اقمولا وبلىسىنان كوشىپ كەلىپتى. كەيىن لوگوپەد-دەفەكتولوگ رەتىندە ءبىلىم العان تاتيانا ۇلىن اياعىنا تۇرعىزىپ, ءوزى سەكىلدى انالارعا كومەكتەسۋگە كىرىسكەن.
– بالامنىڭ دياگنوزىن جەڭىپ شىققاندا, جەكە وڭالتۋ ورتالىعىن اشۋ قاجەتتىگىن ءتۇسىندىم. جابدىق الۋعا قاراجات بولماعان سوڭ, مەملەكەتتىڭ قولداۋىنا ارقا سۇيەدىم. 2021 جىلعى ماۋسىمدا «باستاۋ بيزنەس» جوباسىنا قاتىستىم. ەكى اي بۇرىن 5 ملن تەڭگە گرانت الىپ, «باك» جانە «ينتايم» اتتى ەكى اپپاراتتىق ادىستەمەنى ساتىپ الدىم. ەندى مەن ۇلىم سياقتى بالالارعا كومەكتەسە الامىن. سونداي-اق جۇمىس ورىندارىن اشامىن. قازىر التى ادامدى جۇمىسپەن قامتىپ وتىرمىن. تاعى ءۇش ادامدى جۇمىسقا قابىلدايمىن, – دەيدى ت.كۋسنۋتدينوۆا.
«باستاۋ بيزنەس» اياسىندا بەس جىلدا 185 مىڭعا جۋىق ادام كاسىپكەرلىك نەگىزدەرىن مەڭگەرگەن. ولار 53 مىڭ بيزنەس-جوبانى ىسكە اسىردى. جوبانىڭ ءاربىر ءۇشىنشى تۇلەگى جەكە كاسىبىن باستاعان. جوبا تۇلەكتەرى وسى كۇنگە دەيىن 70 مىڭعا جۋىق جۇمىس ورنىن اشىپ, 1,5 ملرد تەڭگە سالىق تولەگەن. «باستاۋ بيزنەس» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى اياسىندا جۇزەگە اسىرىلىپ جاتىر.
جالپى, «باستاۋ بيزنەس» جوباسىنىڭ تاريحى 2016 جىلدان باستالدى. قاناتقاقتى جوبا الدىمەن ماڭعىستاۋ وبلىسىنىڭ مۇنايلى اۋدانىندا, جاڭاوزەندە جانە اقتوبە وبلىسىنىڭ تەمىر اۋدانىندا ىسكە قوسىلدى. تۋرا ءبىر جىلدان كەيىن «ەڭبەك» مەملەكەتتىك باعدارلاماسىنىڭ ەكىنشى باعىتىن وقىتۋ فورماتى رەتىندە قابىلداندى. 2017 جىلى 80 اۋداننىڭ اۋىلدارىنداعى 15 مىڭ تۇرعىن وقىپ, ءاربىر بەسىنشى ازامات (3 314 نەمەسە 22 پايىزى) ءوز جوباسىن ىسكە قوستى. جىل سايىن جوبانىڭ اۋقىمى مەن الەۋمەتتىك ماڭىزى كەڭەيە ءتۇستى. 2018 جىلى قالالار مەن مونوقالالاردىڭ جۇمىسسىز جانە ءوزىن ءوزى جۇمىسپەن قامتىعان تۇرعىندارى وقۋعا تارتىلىپ, 160 اۋدان قامتىلدى. 2019 جىلدان باستاپ جوباعا نۇر-سۇلتان, الماتى جانە شىمكەنت قالالارى قاتىسىپ كەلەدى. 2019 جىلدان بەرى NEET ساناتىنداعى جۇمىسسىز جاستارعا, جاس وتباسى مۇشەلەرىنە, كوپبالالى, از قامتىلعان وتباسىلارعا جانە ەڭبەككە قابىلەتتى مۇگەدەكتەرگە ەرەكشە نازار اۋدارىلۋدا.
