قر بعم ءبىلىم بەرۋ پروتسەسى ساپاسىن باقىلاۋدىڭ «ويلاستىرىلماعان» ادىستەمەسىنەن مالىمەتتەردى جۇيەلى تۇردە جيناۋ مەن تالداۋعا كوشۋى ءتيىس. سونداي-اق جوعارى وقۋ ورىندارىن باقىلاۋدىڭ ساپاسىن ارتتىرۋ ءۇشىن اناليتيكالىق پلاتفورما قاجەت.
جيىنعا قاتىسۋشىلار ۋنيۆەرسيتەتتەردىڭ سەسسيا ناتيجەلەرى مەن اتالعان قاۋىمداستىقتىڭ جوعارى جانە جوعارى وقۋ ورنىنان كەيىنگى ءبىلىم سالاسىنىڭ دامۋىندا اتقاراتىن ءرولىن تالقىلادى.
ەستەرىڭىزگە سالا كەتەيىك, اكادەميالىق ادالدىق ليگاسى 2018 جىلى اقش-تىڭ جەكەمەنشىك ۋنيۆەرسيتەتتەرى مۇشەلىك ەتەتىن تانىمال «ليگا پليۋششا - The Ivy League» ۇلگىسى بويىنشا قۇرىلعان بولاتىن.
داۋىس بەرۋ بارىسىندا م.س. نارىكباەۆ اتىنداعى كازگيۋ ۋنيۆەرسيتەتىنىڭ پروۆوستى (رەكتورى) سەرگەي پەن ءبىراۋىزدان 2021-2022 وقۋ جىلىنا اكادەميالىق ادالدىق ليگاسى جالپى جينالىسىنىڭ توراعاسى بولىپ سايلاندى. جيىن بارىسىندا جاڭا توراعا وسى ۋاقىت ارالىعىندا ليگانىڭ اتقاراتىن جۇمىسى بويىنشا جوسپارلارىمەن ءبولىستى.
سەرگەي پەننىڭ ايتۋىنشا, ليگانىڭ باستى ماقساتتارىنىڭ ءبىرى – اناليتيكالىق پلاتفورما قۇرۋ. بۇل پلاتفورما مالىمەتتەرءدى بءىر ورتالىقتان جيناۋعا جانە ليگاعا مۇشە جوعارى وقۋ ورىندارىنىڭ اكادەميالىق ساپا كورسەتكىشتەرىن قاداعالاۋعا مۇمكىندىك بەرەدى.
«جوعارى وقۋ ورىندارىنىڭ ساپاسىن باقىلاۋ ءۇشىن اناليتيكالىق (BI) پلاتفورماسىن ازىرلەپ, ەنگىزۋ قاجەت. ۋنيۆەرسيتەتتەردىڭ وقۋ جۇيەسىنەن پلاتفورماعا جاريالايتىن دەرەكتەردىڭ ءتىزىمىن انىقتاۋىمىز قاجەت. ول جوعارى وقۋ ورىندارىنىڭ قىزىعۋشىلىعىن ەسكەرە وتىرا دايىندالادى. سونداي-اق دەربەس دەرەكتەردىڭ قورعالۋىن دا قامتاماسىز ەتۋىمىز كەرەك. ءبىراز ۋاقىتتان بەرى ەمتيحان فورماسى بويىنشا سەسسيا ناتيجەلەرى جايلى دەرەكتەر جيناپ, تالداپ جاتىرمىز. ەندى ستۋدەنتتەردىڭ ەمتيحانعا قاتىسۋىن, باقىلاۋ ەمتيحاندارىنىڭ ءوتۋ مەرزىمىن, قورىتىندى باعالارى مەن ولاردىڭ وزگەرۋىن تالدايتىن بولامىز», دەپ اتاپ ءوتتى سەرگەي پەن.
سونداي-اق ليگا توراعاسى «قازاقستان رەسپۋبليكاسىنىڭ 2015-2025 جىلدارعا ارنالعان سىبايلاس جەمقورلىققا قارسى ستراتەگياسىن ىسكە اسىرۋ جونىندەگى 2021-2023 جىلدارعا ارنالعان ءىس-شارالار جوسپارىن بەكىتۋ تۋرالى» قازاقستان رەسپۋبليكاسى ۇكىمەتىنىڭ 2021 جىلعى 24 تامىزداعى قاۋلىسىمەن قر بارلىق جوعارى وقۋ ورىندارىنا اكادەميالىق ادالدىق ليگاسىنىڭ قاعيداتتارى مەن تالداۋ قۇرالدارىن ەنگىزۋ كوزدەلگەنىن اتاپ ءوتتى.
«دەرەكتەردى جۇيەلەۋ جانە بىرىڭعاي تالداۋ جۇيەسىن قۇرۋ بىزگە عانا ەمەس, ۋاكىلەتتى ورگانعا اكادەميالىق ساپا ستاندارتتارىنىڭ يمپلەمەنتاتسياسىن ءتيىمدى باقىلاۋعا مۇمكىندىك بەرەتىنى ءسوزسىز. ءبىز ليگانىڭ قر ءبىلىم جانە عىلىم مينيسترلىگىنىڭ ساپانى باقىلاۋدىڭ «ويلاستىرىلماعان» ادىستەمەسىنەن دەرەكتەردى جۇيەلى جيناۋ مەن تالداۋ ادىسىنە كوشۋىنە سەبەپكەر سۋبەكت بولعانىن قالايمىز», دەپ قورىتىندىلادى سەرگەي گەننادەۆيچ.
ليگانىڭ جالپى جينالىسىنا مۇشەلىك ەتەتىن 11 جوعارى وقۋ ورنىنىڭ وكىلدەرى, قاۋىمداستىرىلعان مۇشەلەرى بولىپ تابىلاتىن قازاقستان رەسپۋبليكاسىنىڭ «اتامەكەن» ۇلتتىق كاسىپكەرلەر پالاتاسىنىڭ جانە قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگىنىڭ وكىلدەرى قاتىستى.
