ءسوز سايىسىنا وننان استام تالاپكەر قاتىسىپ, ەل بىرلىگى, تاۋەلسىزدىك جىلدارىنداعى جەتىستىك جايىن بالاۋسا جىرلارىنا ارقاۋ ەتتى. كوپتەن بەرى كوكشەتاۋدا كوبەڭ تارتقان ايتىس ونەرىن دامىتۋعا مۇمكىندىك مول ەكەندىگىن جاس تالاپتاردىڭ ءسوز ساپتاۋىنان ايقىن اڭعارۋعا بولادى. اراكىدىك جاستىقتىڭ جالىنىمەن باساساۋ ءسوز كەزدەسىپ قالعانىمەن, تۇتاستاي العاندا كوپتىڭ كوكەيىندە جۇرگەن تولىمدى ماسەلەلەردى كوتەرگەن ەل ءسوزى دە ايتىلدى. كوز كورگەنمەن كوڭىل اۋدارماعان رۋحاني الەمنىڭ كەيبىر جۇتاڭ تۇستارى دا ۇمىت قالعان جوق. ءبىر اۋىز سوزبەن جەسىر داۋىن, جەر داۋىن شەشىپ, ەل ىرگەسىن بەكىتىپ, ۇيىتقى بولا بىلگەن بابالاردان قالعان جىر بايراعى جۇرەك جىلىتار شۋاقپەن شالقىپ تۇرعان كۇن بولدى بۇل! قاسيەتتى ساحناعا تۇڭعىش شىعىپ تۇرعانىمەن, بولاشاعىنان ءۇمىت كۇتتىرەتىن جاس تالاپتار دا جوق ەمەس ەكەن.
– تاۋەلسىزدىك تويىنا ارنالعان ايماقتىق ايتىسقا وسى جولى سالماقتى سوزىمەن كورىنگەن ەكى تالاپكەر جولداما الادى, – دەيدى كوكەن شاكەەۆ اتىنداعى اقىندار مەكتەبىنىڭ جەتەكشىسى مۇحامەد قوڭقاەۆ, – ۇلتتىق بولمىستى ۇلىقتايتىن ۇلى ونەردىڭ ارناسىن وسىلايشا كەڭەيتەمىز. كوكشەنىڭ كولەمىندە قالماي ۇزاپ شىعىپ, ۇلكەن ايتىستارعا قاتىستىرىپ شىڭداساق, ءسوز ۇستايتىن جاستار بارشىلىق.
ورامدى ءسوز بەن ورىندى وي ايتىلعان ايتىستى تىڭداپ وتىرىپ, ولەڭ قونىپ, ءان ۇشقان ولكەنىڭ كەلەشەگى كەمەلدەنە بەرەتىنىنە بەك سەندىك. ءسوز تۇزەلىپ كەلەدى ەكەن, وزگەسى دە تۇزەلەر.
كوكشەتاۋ
