ەحرو-2020 كورمەسى بىلتىر ءوتۋى كەرەك ەدى. الايدا كوروناۆيرۋس پاندەمياسىنا بايلانىستى شارانىڭ مەرزىمى ءبىر جىلعا شەگەرىلدى. كورمەنىڭ ۇيىمداستىرۋ كوميتەتى حابارلاعانداي, وعان الەمنىڭ 192 ەلى قاتىسادى. كەلەر جىلدىڭ 31 ناۋرىزىنا دەيىن جالعاساتىن كورمەنى شامامەن 25 ملن ادام تاماشالايدى دەپ كۇتىلۋدە. ولاردىڭ 20 پايىزىن بيزنەس وكىلدەرى قۇراماق. 182 كۇنگە سوزىلاتىن شاراعا كەلۋشىلەردىڭ 70 پايىزى شەتەلدىك تۋريستەر بولماق. كورمەنىڭ جالپى اۋماعى 438 گەكتار جەردى الىپ جاتىر. كورمە دۋباي مەن ابۋ-دابي قالالارىنىڭ ارالىعىندا ورنالاسقان.
تاڭدالعان تاقىرىپ – «اقىل-ويدى بىرىكتىرە وتىرىپ, بولاشاقتى قالىپتاستىرۋ». ەحرو-2020 ءۇش سالالىق تاقىرىپقا بولىنگەن – «مۇمكىندىكتەر», «موبيلدىلىك» جانە «تۇراقتى دامۋ». العاشقىسى ادام الەۋەتىن دامىتۋ, تۇلعالىق ءوسۋ, يننوۆاتسيالاردى ىلگەرىلەتۋ جانە جۇمىسپەن قامتۋ سەكىلدى باعىتتاردى قامتيدى. «موبيلدىلىك» تاقىرىبىنا فيزيكالىق ۇتقىرلىق, اقپاراتتىق تەحنولوگيالاردى تاراتۋ, تاۋارلار مەن رەسۋرستاردى بولۋگە قول جەتكىزۋ باعىتتارى ءتان. «تۇراقتى دامۋ» – ەكوجۇيەنىڭ جايلى ءومىر سالتىنا, تابيعي رەسۋرستاردى ۇتىمدى پايدالانۋعا اسەرى.
QazExpoCongress ۇلتتىق كومپانياسى» اكتسيونەرلىك قوعامىنىڭ حابارلاۋىنشا, قازاقستاننىڭ ۇلتتىق پاۆيلونى «مۇمكىندىكتەر» سالالىق تاقىرىبىندا ورنالاسقان. وعان جاقىن ماڭدا بىرىككەن اراب امىرلىكتەرى, اقش, شۆەيتساريا, قىتاي حالىق رەسپۋبليكاسى, اۋستريا, جاپونيا, ءۇندىستان, ساۋد ارابياسى كورولدىگى, بەلارۋس سەكىلدى مەملەكەتتەردىڭ پاۆيلوندارى, سونداي-اق Emirates Airlines, DP World, ENOC سەكىلدى الپاۋىت كومپانيالاردىڭ كورپوراتيۆتىك پاۆيلوندارى ورنالاسقان.
پاۆيلون بەينەسى ءداستۇرلى شىعىس ساۋلەتىنەن شابىت العان زاماناۋي تسيفرلى شەشىمدەر مەن داستۇرلەردىڭ سينتەزىن, سونداي-اق قازاقستاننىڭ اشىقتىعىن بەينەلەيدى. پاۆيلون 3 قاباتتان تۇرادى. ەكى قاباتىندا 4 كورمە ايماعى بار. پاۆيلون اۋماعى – 3 400 شارشى مەتر. ول ورتا ساناتتاعى پاۆيلوندارعا جاتادى.
1 قازاندا كورمەنىڭ سالتاناتتى اشىلۋ ءراسىمى وتەدى. قازاقستاننىڭ ۇلتتىق پاۆيلونى دا سول كۇنى كەلۋشىلەردى قابىلداي باستايدى. كورمە اياسىندا 1 جەلتوقساندا قازاقستان رەسپۋبليكاسىنىڭ ۇلتتىق كۇنى وتەدى. سونىمەن قاتار شارا بارىسىندا ەلىمىزدىڭ تاۋەلسىزدىك كۇنىنە جانە ناۋرىز مەيرامىنا ەرەكشە باسىمدىق بەرىلەدى.
دۇنيەجۇزىلىك كورمە يندۋستريالاندىرۋدىڭ سيمۆولى سانالادى. مۇنى تەحنيكالىق ءھام تەحنولوگيالىق جەتىستىكتەردى پاش ەتەتىن اشىق الاڭ دەسە دە بولادى. ەحرو كورمەلەرىنىڭ اۋقىمى, ۇزاقتىعى جانە كەلۋشىلەر سانى بويىنشا حالىقارالىق ءىس-شارالار اراسىندا تەڭدەسى جوق. بۇل مەملەكەتتەردى, كومپانيالاردى, حالىقارالىق ۇيىمدار مەن ازاماتتاردى بايلانىستىراتىن بۋىن ىسپەتتى.
1928 جىلى حالىقارالىق كورمەلەرگە قاتىستى كونۆەنتسياعا قول قويىلدى. سول ساتتەن باستاپ حالىقارالىق كورمەلەر بيۋروسى كورمەلەردى وتكىزۋدى رەتتەيتىن ورگان سانالادى. العاشقى دۇنيەجۇزىلىك كورمە 1851 جىلى لوندوندا ۇيىمداستىرىلعان.
كورمەنىڭ ەكى ءتۇرى بار – دۇنيەجۇزىلىك جانە مامانداندىرىلعان. ولار 3 ايدان 6 ايعا دەيىن سوزىلادى. دۋبايدا بيىل وتەتىن ەحرو-2020 دۇنيەجۇزىلىك كورمەگە جاتادى. ال 2017 جىلى نۇر-سۇلتاندا ۇيىمداستىرىلعان ەحرو-2017 – مامانداندىرىلعان كورمە. دۇنيەجۇزىلىك كورمە بەس جىل سايىن وتكىزىلەدى. دۇنيەجۇزىلىك كورمەمەن سالىستىرعاندا مامانداندىرىلعان كورمەنىڭ جالپى قۇنى تومەن ءارى كولەمى دە الدەقايدا كىشىرەك.
دۇنيەجۇزىلىك كورمەنى سوڭعى رەت 2015 جىلى ميلان (يتاليا) قابىلدادى. ەندىگى كەزەك – دۋبايدا. 2025 جىلعى كورمە جاپونيانىڭ وساكا قالاسىندا وتپەك. 2020 جىلعى كورمەنى وتكىزۋگە دۋبايدان بولەك, ەكاتەرينبۋرگ (رەسەي), يزمير (تۇركيا) جانە سان-پاۋلۋ (برازيليا) قالالارى ۇمىتكەر بولدى. حالىقارالىق ۆاليۋتا قورىنىڭ بولجامىنشا, دۋبايداعى كورمە ەلدىڭ ىشكى جالپى ونىمىنە وڭ اسەر ەتپەك. سونداي-اق 277 مىڭ جاڭا جۇمىس ورنى قۇرىلادى دەپ كۇتىلۋدە.
