كۇنى بۇگىنگە دەيىن كوش باستاپ كەلە جاتقان «توبىل» تارازعا ساپار شەگىپ, جەرگىلىكتى كلۋبپەن كۇش سىناستى. قوس كوماندا 90 مينۋت بويى ءبىر-بىرىمەن تىرەسكەنىمەن تابلوداعى ەسەپ ەش وزگەرگەن جوق – 0:0. ەسەسىنە «استانا» ءوز مۇمكىندىگىن قالت جىبەرمەدى. ولار ءوز الاڭىندا «اقتوبەنى» قابىلدادى. ءبىر قىزىعى, بۇل باسەكەدەگى ءۇش گول دا 20-مينۋتقا دەيىن سوعىلدى. 4-مينۋتتا فاتوس بەچيراي مەرگەندىك تانىتسا, 12-مينۋتتا ماكسيم فەدين 11-مەترلىك نۇكتەدەن ءمۇلت كەتتى. 15-مينۋتتا مارين توماسوۆ ەكىنشى دوپتى قاقپاعا ەنگىزدى. 19-مينۋتتا دميتري كوركيشكو ەسەپ ايىرماشىلىعىن قىسقارتتى – 2:1. بۇل ەسەپ ويىننىڭ سوڭىنا دەيىن ساقتالدى. وسى جەڭىسىنىڭ ارقاسىندا «استانا» ەل بىرىنشىلىگىندە قايتا كوش باستادى. قازىرگى كەزدە ەلوردالىق فۋتبولشىلار 47 ۇپايدى ەنشىلەپ وتىر. ال باستى قارسىلاسىنان ءبىر ۇپايى كەم «توبىل» ەكىنشى ورىندى يەلەنۋدە.
قالاي دا «استانا» مەن «توبىلدى» الىسقا ۇزاتپاۋدى كوزدەپ وتىرعان «قايرات» بۇل جولى «قىزىلجاردى» ۇتتى. بىراق بۇل جەڭىس وڭايلىقپەن كەلگەن جوق. سولتۇستىك قازاقستاننان كەلگەن كوماندا الماتىلىقتارعا اجەپتەۋىر قارسىلىق كورسەتتى. تەك 77-مينۋتتا عانا ارتۋر شۋشەناچەۆ نىسانانى ءدال كوزدەپ, قۇربان بەردىەۆتىڭ كومانداسىنا جەڭىس سىيلادى – 1:0. قورجىنىندا 40 ۇپايى بار «قايرات» ءۇشىنشى ورىندى يەمدەنۋدە.
تالدىقورعاننىڭ «جەتىسۋ» مەن ورالدىڭ «اقجايىعى» اراسىنداعى ماتچتا تەڭ ەسەپ تىركەلدى – 2:2. تۇركىستاننىڭ «تۇرانى» مەن شىمكەنتتىڭ «ورداباسى» دا قانشا جانتالاسقانىمەن ءبىر-ءبىرىن الا-المادى – 1:1. اقتاۋدىڭ «كاسپيى» ءوز الاڭىندا اۋپىرىمدەپ ءجۇرىپ, «اتىراۋدان» ايلاسىن اسىردى – 2:1. قىزىلوردادا «قايسار» قاراعاندىنىڭ «شاحتەرىنا» ەسە جىبەردى – 1:2.
جارىس كەستەسىنىڭ جوعارعى جاعىندا كىمدەر بارىن ايتتىق. ال تومەنگى ساتىلارعا كەلەر بولساق, «جەتىسۋدىڭ» جاعدايى وتە مۇشكىل. تالدىقورعاندىقتار 12 ۇپايمەن كوش سوڭىندا كەلەدى. «قايسار» دا قۋاناتىنداي جاعدايدا ەمەس. سىر بويىنىڭ فۋتبولشىلارى 15 ۇپايدى ەنشىلەپ, 13-ورىندى قاناعات تۇتۋدا.
