قوعامدىق ومىرىمىزگە سونى سەرپىن بەرگەن جاڭا جولداۋىندا ەل پرەزيدەنتى قاسىم-جومارت توقاەۆ «وتاندىق ءىت-سەكتوردى دامىتىپ, كۇشەيتە ءتۇسۋ دە ماڭىزدى. ەلىمىزگە جاس, ءبىلىمدى ءارى ىنتالى ماماندار كەرەك. تسيفرلاندىرۋ جونىندەگى ۇلتتىق جوبانىڭ اياسىندا كەمىندە 100 مىڭ جوعارى بىلىكتى ءىت-مامان دايارلاۋ قاجەت» دەگەن بولاتىن. بۇل بولاشاقتى باعدارلاعان, ەل كەلەشەگىنىڭ كوكجيەگىن كەڭەيتۋگە باعىتتايتىن كەلەلى پىكىر.
مەكتەپ وقۋشىلارىنىڭ تۋىندىسى تاڭداي قاقتىرارلىق ەكەن. قاراپايىم عانا باسقارۋ تەتىگى ارقىلى ونەرلى وقۋشىلار روبوتتاردى ەركىن باسقارادى. انشەيىندە ءسال ەبەدەيسىزدەۋ بولىپ كورىنگەن روبوتتار الدەبىر تەتىكتەردى قۇراستىرىپ جاتىر. ايتقانىڭدى ەكى ەتپەيتىن قولقانات ءتارىزدى كەرەك زاتىڭدى دا لىپ ەتكىزىپ الىپ كەلەدى. بالا قيالىن باۋراعان عاجاپ ءبىر الەم. كۇنى ەرتەڭ وسى وقۋشىلاردىڭ زاماناۋي تەحنولوگيالاردى بۇگە-شىگەسىنە دەيىن مەڭگەرىپ, بالالىق قيالداعى ادەمى ارمانمەن استاسقان مۇراتىنا جەتەرى كۇمان تۋعىزبايدى. جاڭا ءبىلىم وشاعىندا روبوت تەحنيكامەن قاتار ءىت سالاسىنا دا ايرىقشا ءمان بەرىلىپ وتىر.
– وقۋ باعدارلاماسىندا وزىندىك ەرەكشەلىكتەردىڭ بولاتىنى ءسوزسىز. باسىمدىق ءىت سالاسىنا اۋدارىلادى. روبوت تەحنيكا, باعدارلامالاۋ, 3D مودەلدەۋ سياقتى پاندەر وقىتىلادى. ءىت سالاسى ايرىقشا قارقىنمەن دامىپ كەلە جاتقان سالا, – دەيدى ءىت ليتسەي-ينتەرناتىنىڭ ديرەكتورى ايبەك دوسىمبەكوۆ, – ءبىزدىڭ ەلدە سالا ماماندارى مول سۇرانىسقا يە. الداعى ۋاقىتتا وسى ولقىلىقتىڭ ورنىن تولتىرۋ باعىتىندا جۇمىس ىستەيتىن بولامىز.
ءبىلىم وشاعىنىڭ باسشىسى ەل پرەزيدەنتى قويعان تالاپ ۇدەسىنەن شىعۋعا ۇمتىلاتىندىقتارىن جەتكىزدى. جاڭالىقتىڭ جارشىسى بولىپ وتىرعان مەكتەپتىڭ ىرگەتاسى 2019 جىلى قالانعان ەكەن. ۇستىمىزدەگى وقۋ جىلىنان باستاپ ءىت ليتسەي-ينتەرناتىنا اينالىپ وتىر.
– وقۋشىلاردىڭ الەمدىك دەڭگەيدەگى ءىت مامانى بولۋى ءۇشىن بار مۇمكىندىكتى جۇمىلدىرۋىمىز قاجەت, – دەيدى قامقورلىق كەڭەسىنىڭ مۇشەسى ءادىلحان مۋسين, – الداعى ۋاقىتتا ءىت قاۋىمداستىعىمەن بىرلەسە جۇمىس ىستەيمىز.
ليتسەي-ينتەرنات 800 ورىنعا لايىقتالعان. جاڭا وقۋ جىلىندا 500-دەن استام وقۋشى ءبىلىم الۋدا. ءبىر جاقسىسى, وقۋشىلاردىڭ دەنى جەرگىلىكتى جەردەن. باسقا ايماقتاردان كەلگەن وقۋشىلار ءۇشىن جايلى جاتاقحانا قاراستىرىلعان. بۋراباي باۋرايىندا بولاشاقتىڭ ىرگەتاسى قالانىپ جاتىر.
اقمولا وبلىسى,
بۋراباي اۋدانى
