«ەلىمىزدەگى ەكولوگيالىق جاعدايدى جاقسارتا ءتۇسۋدىڭ ءبىر امالى ونەركاسىپتە ۇزدىك قولجەتىمدى تەحنولوگيالاردى ەنگىزۋ. جاڭا ەكولوگيالىق كودەكسكە سايكەس, 2025 جىلدان باستاپ ۇزدىك قولجەتىمدى تەحنولوگيا جۇيەسىنە كوشۋ جوسپارلانىپ وتىر. سونىڭ ارقاسىندا الداعى 10 جىلدىڭ ىشىندە شىعارىلاتىن قالدىقتار كولەمى 50 پايىزعا دەيىن ازايادى دەگەن بولجامعا كەلىپ وتىرمىز», دەدى ز. جولداسوۆ وكق-دە وتكەن ءباسپاسوز ءماسليحاتىندا.
سونداي-اق كوميتەت باسشىسى اتالعان كودەكس اياسىندا قورشاعان ورتانى قورعاۋدا جەرگىلىكتى اتقارۋشى ورگانداردىڭ دا مىندەتتەلەتىنىن ايتىپ ءوتتى.
«كودەكس كۇشىنە ەنگەننەن كەيىن, اكىمدىكتەر ءار 5 جىل سايىن قورشاعان ورتا ساپاسىنىڭ ماقساتتى كورسەتكىشى مەن ونى جاقسارتۋ جونىندەگى ءىس-شارالاردى بەكىتەتىن بولادى. ودان بولەك, اكىمدىكتەرگە اۋا ساپاسى ناشارلاعان جاعدايدا قالا اۋماعىنا كولىكتەردىڭ كىرۋىنە شەكتەۋ قويۋعا جانە اۋانى لاستاۋشى كاسىپورىنداردىڭ قىزمەتىنە ۋاقىتشا شەكتەۋ ەنگىزۋ قۇزىرەتى بەرىلەدى», دەيدى ول.
